64
Egvu-ọma, Dévidi deru nụ onye ishi egvu
1 Nggụbe Nchileke;
nụnua mkpu, mu echi echiku ngu!
Mu atsụkwa ndu ọhogu mu egvu.
Gbochitanu mu l'ẹka ẹphe.
2 Dominua mu t'ẹjo idzu,
ndu ẹjo madzụ achịru mu;
be eru mu l'ẹhu.
Domianua mu l'ẹjo ụzu ono,
ndu ẹjo madzụ atụ ono.
3 Ẹphe abajẹ ire ẹphe ọba mma;
gude ọnu l'agba okfu ọgba akfụ.
4 Ẹphe anọduje; kwabẹru onye
ẹ-ta dụdu iphe o meru.
Onye ono -bya amaru;
bẹ akfụ bụwaru iya l'ẹhu kfụu.
Ẹ tọ dụdu iphe ẹphe atsụ egvu.
5 Ẹphe anọduje eyeru onwẹphe ọkpu-ikike
t'ẹphe keshia ẹhu l'ome ẹjo iphe.
Ẹphe asụje l'ẹphe e-je
agbashịa ọnya ẹphe l'edomi.
Ẹphe asụ: “?Bụkwanu onye a-phụ ẹphe?”
6 Ọobuje teke ẹphe chịeberu
ẹjo idzu ono; ẹphe asụ:
“L'idzu, ẹphe chịru nta-a;
bẹ dụkpoo mma nshinu!”
Uche madzụ; mẹ obu iya
bụlephu ẹregede kpụu.
7 Obenu lẹ Nchileke a-gba ẹphe akfụ.
Ẹphe -bya amaru;
bẹ ẹphe zẹshiwa l'alị.
8 Ẹphe e-gude ọnu ẹphe
kfutaru onwẹphe ọkpu-akpọhu.
Iphe bụ ndu phụru ẹphe,
e-kwe l'ishi; sụ:
Họo! Ẹge ọo-dụ ẹphe!
9 Ndiphe kpoo-gbaa
a-wata ọtsu egvu.
Ẹphe arakashịlahaa iphe
Nchileke meru arakashị;
rịlahaa k'iphe ono, meru nụ ono arịri.
10 T'ẹhu tsọjekwa ndu doberu
ẹka ndoo ẹna l'ime Ojejoje!
T'ẹphe gbabakwa l'ime iya
je edomia onwẹphe!
T'iphe bụ ndu obu gụru
iphoro jakwaa ya ajaja!