49
Egvu-ọma, e deru nụ onye ishi egvu tẹ Ụnwu Kora gụa
1 Unubẹ ndiphe;
unu nụkwaa iphe-a.
Unu ngabekwa nchị;
unubẹ ndu bu lẹ mgboko-a.
2 Tẹ ndu ha nshinu gebekwa nchị;
ndu ha nwanshị egebe.
Tẹ ndu nweru iphe gebekwa nchị;
ndu ụkpa egebe.
3 Okfu, shi mu l'ọnu a-bụru
okfu onye maru iphe;
iphe mu rịtaru l'obu emee t'iphe doo ẹnya.
4 Mu e-woru nchị gebe l'ẹtu,
gude iya; kpọo une
shi iya kọshia iphe ẹtu ono bụ.
5 ?Bụnua ngụnu e-me tẹ mu
tsụa egvu teke iphe-ẹhuka byaru;
mbụ teke ndu, mu dụ ashị
nọ-pheru mu mgburumgburu;
6 mbụ ndu achịjeru obu ye
l'ẹku, ẹphe kpataru;
gude akanya, ẹphe setaru l'eku onwẹphe.
7 Ẹ tọ dụkwa madzụ
nwigbaleke-ọma, a-du ike gbafụta ibe iya;
tọ dụ onye a-dụ ike kfụa
Nchileke aswa ishi onwiya.
8 Ishi iya abụru l'iphe aakfụje
gude gbata ndzụ hanụkakwa l'uru.
Ẹ tọ dụkwa iphe madzụ,
kfụru, dzuru iya nụ;
9 mbụ ụgwo, ọo-kfụ nọdu
ndzụ gbururu jeye;
tọo nwụhu anwụhu.
10 Onyemonye phụnuaru-a
lẹ ndu mmamiphe anwụhuje;
ndu eswe;
mẹ 'o-nwe-egomunggo phẹ
anwụhujekwaphu;
haaru ndu ọdo ẹku ẹphe.
11 Ọ bụ ili ẹphe a-bụru ẹphe
ụlo gburu jeye.
Ẹke ono; bẹ ẹphe a-nọ
jeye lẹ nwanwanwaranwa;
e guderu l'ẹphe shi
nwetsuaru alị, ẹphe gụshiru onwẹphe.
12 Obenu l'ẹku, madzụ nweru
ta akpọshijekwa iya anwụhu.
Ọ bụ-a ẹge anụ ẹgu-ẹgbudu
anwụhuje bụ ẹge oo-mekochaa nwụhu.
13 Phụaru ẹge ọoda-kfuje ndu,
sụru onwẹphe ẹka nahụ;
mẹ ẹge ọomujeru ndu awụ etso ẹphe;
mbụ ndu iphe ẹphe anọduje ekfu adụje mma.
14 Ẹphe e-mekochaa nwụshihu l'ọ bụ atụru.
Yọ bụru ndu doberu ẹka
ndoo a-bụru ishi l'achị
ẹphe; m'o -be l'ụtsu.
Ẹphe ereshihu;
m'e -shilephu l'ẹgiri ufu ẹphe ono
paru ẹphe eje oye nsụ.
15 Obenu lẹ mbẹdua;
bẹ Nchileke a-dzọta
tẹ mu ba abahụ l'alị-maa;
kẹ l'oo-mekochaa duta mu donyabe onwiya.
16 T'ẹ b'ọ tsụjekwa ngu l'ẹhu
m'ọ -bụru lẹ madzụ nọnyaaru;
bya enwee iphe;
k'ọphu ndiphe wataru iya
ọkwabe ugvu nshinu;
17 kẹ l'ẹ to nwedu iphe oo-gude
ala maa teke ọo-nwụhu;
ọphu ugvu iya ọbu
'etsokwa iya ala l'ili.
18 Ọ bụ oswi-okfu lẹ teke ọ nọ ndzụ;
b'o shi gụa onwiya lẹ ndu
a gọru ọnu-ọma nụ;
ndiphe eshi ajaja iya ajaja;
l'ọ bụ onye ẹka atụ atụtu.
19 Obenu l'ọ -nwụhulephu;
yọ lakfushia ndiche iya phẹ l'alị-maa;
ẹke ẹ tọo phụdu iphoro jeye lẹ tutu yoyo.
20 Onye nweru ẹku; t'ọ ma iphe;
bụ-a ẹge anụ-ẹgu-ẹgbudu anwụhuje-a
bụ oo-mekochaa nwụhu.