50
Egvu-ọma, Ásafu deru
1 Ọ kwa Ọkaribe-Kakọta-Ike,
bụ Nchileke; mbụ Ojejoje bẹ ekfu nụ.
Ooku ndiphe mgburumgburu;
tsube l'ụzo ẹnyanwu-ahata;
rua l'ụzo ẹnyanwu-arịba.
2 Nchileke nọ lẹ Záyọnu
l'enwu l'ọ bụ ọku;
mbụ Záyọnu ono, ama ntụmatu ono.
3 Nchileke ayi abyaakwa.
Ọbule ẹ tọo dakwa ashị.
Ọku, ata chịchichi nọ iya l'ụzo ifu.
Oke phẹrephere anọ-phee
ya mgburumgburu.
4 Ooku igwe; l'eku alị;
t'ẹphe bya abụru ndu ekebe;
phụ ẹge ya gude ekpe ndu nk'iya iya ikpe.
5 “Unu chịkoberu mu ndu,
bụ ndu nke mu l'ẹphe ha;
mbụ ndu mu l'ẹphe gude
ngwẹja gbaa ndzụ.”
6 Imigwe l'ọ ha anọduje atụ ọnu
ẹge Nchileke bụ-be onye doberu-eka-ndoo;
kẹle Nchileke l'onwiya bụ onye ikpe.
7 “Ndu mu; unu ngabẹ nchị;
tẹ mu kfuru yeru unu.
Tẹ mu gbaa unubẹ ndu Ízurẹlu ekebe.
Ọ kwa mụbe Nchileke bụ Nchileke unu.
8 Ẹ tọ bụkwa kẹ ngwẹja,
unu egwoje anụ mu;
m'ọ bụ kẹ ngwẹja-ukfuru,
unu egwojeru mu;
bẹ mu abaru unu m̀bà iya;
kẹle ndu onanu;
bẹ unu emeje ẹge gbaru nụ.
9 Mkpa eswi, nọ l'ọka unu ta dụkwa mu;
ọphu mkpa eghu unu,
kụru l'ọdu-eghu unu 'adụkwa mu;
10 kẹ l'iphe bụ anụ, nọ l'ọswa bụ nke mu.
Eswi, nọkota l'ụnukurunu
ugvu abụru nke mu.
11 Iphe bụ nwẹnu, ephe l'eli;
bẹ mu makọtaru l'ọ ha.
Iphe bụ anụ-ẹgu-ẹgbudu
l'ọ ha abụkotaru nke mu.
12 Ọ -bụru l'ẹgu agụ mu;
bẹ mu ta abyakwa unu ọrota nri;
kẹ l'ọo mbẹdua nwekota
mgboko-a l'ọ ha
yẹle iphe nọ iya nụ.
13 ?Unu tubesu lẹ mu atajẹ anụ eswi.
?Tẹ unu tubesu lẹ mu angụje mee eghu.
14 Ngwẹja, unu e-gwojeru nụ
mu kwa t'unu keleje mu ekele.
Unu meje iphe unu
riburu l'unu e-meru mụbe
Ọkaribe-Kakọta-Nụ.
15 Unu -kua mu oku l'oge
iphe-ẹhuka;
bẹ mu a-dzọfuta unu;
unu akwabẹ mu ugvu.”
16 Obenu l'ẹjo madzụ; bẹ Nchileke sụru:
“?Nanụ ẹge ọ dụ;
bẹ iigudeje ọnu ngu agụ
ekemu mu ọgu egvu;
gude ọnu ngu ephota
ọgba-ndzụ mu ephota?
17 Ị jịkaru tẹ mu ba alọshi ngu ẹka lẹ nchị;
nwuru okfu mu l'ọ ha ye l'azụ.
18 Ị -phụa onye iphura;
nggu eje etsoru iya.
Ị -phụa onye eri ogori;
nggu l'iya eshilahaa ọnya.
19 Iphe eshije unu ọnu bụlephu ẹjo-okfu;
ụgho akwọwaru ngu ẹhu.
20 Ịinoduje l'ekfubyishi
unwunne ngu phẹ ekfubyishi.
Yọ bụru nwunne ngu,
nggu l'iya shi l'ẹpho lanụ;
bẹ ịinoduje ekfuru okfu-azụ.
21 Iphemiphe ono;
b'i mekotaru;
mu adakọta ashị;
nggu arịa l'ọo ẹge ị dụ;
bẹ mu dụ.
Ọle mu a-bakwanụru ngu mba;
tụa ngu iya too l'ifu.”
22 Unu ngabẹ nchị l'iphe-a,
mu abya ekfukfu-wa;
unubẹ ndu zaharu mụbe Nchileke!
Ọdumeka; bẹ mu a-lakwa unu vịriviri;
t'ọ dụ onye abya unu adzọta.
23 Ọ bụ onye gude ekele mee
ngwẹja iya bụ onye akwabẹ mu ugvu.
Yọ bụru onye doberu ẹka ndoo
bẹ mu e-koshi l'ọo mụbe
Nchileke adzọje madzụ.