48
Egvu-ọma, Ụnwu Kora gụru
1 Ojejoje ha nshinu.
T'a jakwaa ya phụ ajaja, gbaru iya nụ
lẹ mkpụkpu kẹ Nchileke ayi;
mbụ ugvu ono, dụ nsọ ono.
2 Mkpụkpu ono ama ntụmatu l'eli ugvu ono;
bụru iya bụ ẹhu-ọtso-ẹna
ndiphe mgburumgburu.
Ugvu Záyọnu nọ l'ụzo
isheli Jerúsalemu,
bụ mkpụkpu eze,
ha nshinu.
3 Nchileke nọwa
l'ụlo ozeru-ndzụ iya.
O mewaru t'a maru l'ọo yẹbedua
bụ a-gbabe-a-dzụru.
4 Ndu eze chịkoberu ndu sọja
ẹphe wụru bya t'ẹphe bya
etso mkpụkpu ono ọgu.
5 Ẹphe abyaruta bya ebu iya ifu;
tsụhu egvu; gbalashịa.
6 Ẹphe tsụru egvu nshinu l'ẹke ono.
Ẹhu ahụa ẹphe ọku l'ọ bụ nwanyi, ime eme.
7 I mebyishiru ẹphe ẹge phẹrephere,
shi l'ụzo ẹnyanwu-ahata
emebyishije ụgbo-mini Tashishi.
8 Ọ bụ iphe ayi nụru; bẹ ayi
phụru lẹ mkpụkpu Ojejoje,
bụ Ọkaribe-Kakọta-Ike;
bụ iya bụ mkpụkpu Nchileke ayi;
bẹ Nchileke mewaru t'ọ ngụru angụru
gburu jeye lẹ gbururu.
9 Ayi anọduje l'ime eze-ụlo nggụbe Nchileke
l'arị k'obu ono, i yeru ayi ono.
10 Nggụbe Nchileke;
ọ bụ ẹge ẹpha ngu ngaru
ẹkemeke ọbule;
bụ ẹge aajaberu ngu ajaja
lẹ mgboko gbaa mgburumgburu.
Ọ bụ ikpe, dụ mma;
b'i gude achị.
11 Ẹhu atsọ Ugvu Záyọnu ẹna;
l'atsọkwaphu ndu Júda;
kẹ l'iikpeje ikpe nhamụnha.
12 Unu jepheedu Záyọnu.
Unu tsophee ya mgburumgburu;
gụa ụlo-eli, o nweru ọgu!
13 Unu anyatakwa kẹ ụpho-mkpuma,
e gude kpụ-pheta iya mgburumgburu!
Unu egbukwaaphu igo
l'ụlo ozeru-ndzụ, nọgbaa ya nụ;
k'ọphu unu a-kọru iya
ọgbo ọphu nọ l'ifu.
14 Ishi iya abụru l'ọo
Nchileke a-bụru Nchileke
ayi gburu jeye lẹ gbururu;
bụru iya a-nọdu edu ayi jeye lẹ tutu yoyo.