30
Egvu-ọma, Dévidi deru
A gụru iya gude woru eze-ụlo Nchileke ye Nchileke l'ẹka
1 Mu a-nọdu ekutse nggụbe Ojejoje;
kẹ l'i sefutaru mu l'iduma;
ti kwe tẹ ndu ọhogu mu zụaru mu ukwe.
2 Nggụbe Ojejoje, bụ Nchileke mu;
mu rakuru ngu t'i yeru mu ẹka;
Nggu emee; mu akọrohu.
3 Nggụbe Ojejoje;
ọ bụ nggu lọfutaru mu l'alị-maa,
I meru mu; t'ẹ ba tụ mu ẹja.
4 Unu gụa egvu gude tua
Ojejoje ẹpha;
unubẹ ndu nk'iya, dụ nsọ!
Unu kele iya ekele; l'ẹpha iya dụ nsọ!
5 Kẹ l'ẹ to dojedu iphe l'ọkpoma.
Obu-ọma iya anọje jeye ẹge madzụ a-nọ-bebe.
Ẹkwa bụ-a l'ẹnyashi;
bẹ aa-kwa iya kpụu;
o -be l'ụtsu; ẹhu-ọtso-ẹna adalahaa.
6 Teke mu nọ l'ẹke ẹhu dụ mu agu; bẹ mu sụru:
“L'ẹ to nwedu iphe bya
enwubata mu enwubata.”
7 Nggụbe Ojejoje;
teke ayi shi eshi ọnya;
b'i meru tẹ mu bụru
'enwuribe enwuribe l'ọ bụ ugvu.
Obenu lẹ teke ị gharu mu azụ;
bẹ meji tọfuru mu.
8 Ọ bụ nggụbe Ojejoje;
bẹ mu rakuru;
bụru nggụbe Nnajiufu;
bẹ mu rọru t'ị phụaru mu imiko.
9 Mu sụru: “?Bụ uru ngụnu;
bẹ ii-rita teke mu nwụhuru?
Mbụ; ?nanụ uru, ii-rita iya; mẹ a tụa mu ẹja.
?Bụ ẹja, nọ l'alị a-wata ngu ajaja tọo.
?Bụ iya a-ra iya arara l'ị bụ o-me-g'o-kfuru.
10 Nggụbe Ojejoje;
nụaru olu mu;
phụaru mu rụ imiko!
Nggụbe Ojejoje;
yeru mu ru ẹka!”
11 Ẹkwa, mu raru
b'ị gbanweru; mee ya;
yọ bụru mu ote ẹswa.
I yefuru mu uwe-aphụ,
mu yeru; woru;
ẹhu-ọtso-ẹna ye mu l'ọ bụ uwe.
12 Iphe ono bụlephu ẹge ee-me
t'obu mu gụlahaa egvu
gude etu ngu ẹpha;
t'ẹ b'ọ nọhe nwanggijinggiji.
Nggụbe Ojejoje,
bụ Nchileke mu;
ọ bụ nggu;
bẹ mu a-nọdu
ekele ekele jeye lẹ tutu yoyo.