29
Egvu-ọma, Dévidi deru
1 Unubẹ ụnwu imigwe;
unu kwabẹ Ojejoje ugvu!
Unu kfua ẹge ike iya habe!
2 Unu kwabẹ Ojejoje ugvu, gbaru ẹpha iya!
Unu baaru Ojejoje ẹja;
mbụ onye ono,
dụ nsọ bya adụ biribiri ono.
3 Olu Ojejoje tụkoru
eze ẹnyimu ngashịa angashị.
Ọ bụ Nchileke ono,
dụ biribiri ono atụ
egbe-igwe.
Ojejoje atụ egbe-igwe
l'eli eze ẹnyimu.
4 Ojejoje bẹ olu iya adakwa ike-ike ike-ike;
mbụ lẹ Ojejoje bẹ olu iya ada kẹ kpaa kpaa.
5 Olu Ojejoje agbawashije oshi sida;
Ojejoje agbawashịje oshi sida,
nọgbaa l'ugvu ugvu Lébanọnu vịriviri.
6 Oomeje ugvu ugvu Lébanọnu;
t'ọ nmahu jijiji l'ọ bụ
nweswi, ebu nggada;
l'emejekwaphu Ugvu Siriyọnu;
yo tehu kfụkakfuka l'ọ bụ
nwa atsụ, akfụ nkfụ.
7 Olu Ojejoje echije taa l'ọ bụ ebemu-igwe.
8 Olu Ojejoje emeje tẹ echi-ẹgu nmahu jijiji.
Ojejoje emeje tẹ echi-ẹgu
Kedeshi nmahu jijiji.
9 Olu Ojejoje anmajẹ achị yikayika.
Oomeje t'ọswa laa ẹkwo;
daburu karaphongu.
Iphe bụ onye, nọ l'eze-ụlo iya e-bu mkpu;
sụ: “Nchileke dụkwa biribiri.”
10 Ojejoje nọ l'aba-eze iya
dzọpyabe utso l'ọkpa.
Ọo-bụru eze gbururu
jeye lẹ gbururu.
11 Ojejoje emeje tẹ ike dụ ndibe iya.
Yọ gọru ọnu ẹhu-agu nụ ndibe iya.