28
Egvu, Dévidi deru
1 Ọ bụ nggụbe Ojejoje, bụ
oke mkpuma nke mu;
bẹ mu araku.
Ba dahukwa mu nkịchi;
kẹ l'ị nọdu nggujingguji;
bẹ mu lẹ ndu, a tụwaru ẹja a-dụkokwa.
2 Nụaru mkpu, mu echiku ngu;
ẹge-a mu chiliru ẹka;
mabẹ l'ụzo
Ẹke-Kakọta-ọdu-Nsọ nke ngu-a.
3 Ba tụkokwa mu lẹ ndu
akirishi kpụta kpụfu;
mbụ ndu anọduje eme iphe dụ ẹji;
ndu okfu ẹphe anọduje
atsọ ẹna lẹ nchị;
obenu l'obu ẹphe bụ ọkpoma-nshi.
4 Kfụa ẹphe ụgwo iphe ẹphe meru;
mẹ ụgwo iphe dụ ẹji,
ẹphe shi anọduje eme.
Kfụa ẹphe ụgwo iphe ẹphe
gude ẹka ẹphe meta.
Nggu emee ẹphe ẹge gbaru ẹphe.
5 Keshinu ẹ to nwedu iphe
ẹphe gụberu ozi,
Ojejoje jeru;
mbụ iphe Ojejoje gude
ẹka iya mee l'onwiya;
bẹ oo-gude ẹka iya gwaa ẹphe maa;
ọphu ọ byadụ bya
abyakọbe ẹphe abyakọbe ọdo.
6 Unu tua Ojejoje ẹpha;
kẹ l'ọ nụaru mkpu,
mu chikuru iya sụ t'ọ phụaru mu imiko.
7 Ọ bụ Ojejoje bụ ike mu;
bụru iya bụ onye
egbochitaje mu nụ.
Ọ bụ iya bẹ mu dakoberu;
yoo yeru mu ẹka.
Mu egudeje obu mu ete ẹswa.
Mu a-gụ egvu gude kele iya.
8 Ọ bụ Ojejoje bụ ike kẹ ndu nk'iya;
bụru ụlo-ozeru-ndzụ onye o teru manụ.
9 Dzọfutanu ndibe ngu;
gọnuru ọnu-ọma nụ ndu,
bụ òkè-iphe ngu!
Chejenu ẹphe l'ọ bụ onye
eche atụru;
nggu ehee ẹphe jeye lẹ tutu yoyo!