31
Egvu-ọma, Dévidi deru nụ onye ishi egvu
1 Ọ bụ nggụbe Ojejoje;
bẹ mu nọ l'ẹka ezeru ndzụ.
Be kwekwa t'e kpua mu ifu lẹ
ntụ gbururu jeye gbururu.
Gude kẹ l'ị bụ onye,
doberu ẹka ndoo nafụta mu.
2 Ngabẹnuru mu nchị.
Bya ẹgwegwa bya agbafụta mu.
Bụru mu agbara-mkpuma,
mu a-gbabajẹ zeeru ndzụ;
mbụ a-gbabe-a-dzụru,
a-dzọfuta mu nụ.
3 Keshinu ọ bụ nggu bụ
agbara-mkpuma mu;
bụru a-gbabe-a-dzụru nke mu;
dunua mu l'onwongu;
kpọziaru mu ụzo;
l'ọgvu ẹpha ngu.
4 Hafụta mu l'ọnya ono,
a gbaru mu ono;
kẹ l'ọ bụ nggu bụ
a -gbabe-e-zee-ndzụ mu.
5 Mu yeru ngu ume mu l'ẹka.
Gbafụtanu mu;
nggụbe Ojejoje,
bụ Nchileke,
bụ o-me-g'o-kfuru.
6 Ndu akpọjeru obu yeru
ọla l'iyi ono; mbụ agwa;
adụjekwa mu ashị.
Onye mbẹdua dakoberu bụ Ojejoje.
7 Mu ete ẹswa; ẹhu l'atsọ
mu ẹna l'i yeru mu obu;
kẹ l'ị phụwaru iphe-ẹhuka, mu jeru;
maru iphe-ọtsu-l'anụ mu;
8 ọphu i woduru mu ye
l'ẹka ndu ọhogu mu;
nggu egbe kutachia mu
dobe l'ẹke ọkpa ruru mu alị.
9 Byiko nggụbe Ojejoje;
phụnuaru mu imiko;
kẹle mu nọkwa l'oke mkpamẹhu.
Mu ratawaru ẹkwa;
l'aphụwaa ragaraga.
O mekwaruphu;
ike agvụshikotawa mu.
10 Aphụ gbuakwaru mu.
Mu tsụtawaru ude; kahụ l'ọkpehu.
Ike gvụkotawaru mu;
kẹle mu menụkawaru ẹjo iphe.
Ọkpu, nọ mu l'ẹhua erishi mu avụrukpa.
11 Ndu ọhogu mu l'ẹphe ha mewaru mu;
ndu obutobu mu akpọlahaa mu ẹbo-ẹbo-l'afụ.
Ndu mu l'ẹphe shi eshi
ọ̀nyà atsụkotawa mu egvu;
k'ọphu bụ lẹ ndu phụru mu l'ụzo
anọduje agbaru mu ọso.
12 Ẹphe zahawaru mu ẹge
aazahajẹ onye nwụhuru anwụhu.
Mu dụwa l'ọ bụ ite,
tụkposhihuru atụkposhihu.
13 Kẹle mu nụwaru ẹjo idzu,
ẹphe dụ l'igwe achịru mu.
Nta-a ta dụdu ẹke mu nọ;
tẹ mu ba anọdu atsụ egvu.
Ẹphe anọduje achịru mu ẹjo idzu.
Iphe ẹphe tụberu abụru
t'ẹphe wofu ndzụ mu.
14 Obenu l'ọ bụ nggu;
bẹ mu dakoberu nggụbe Ojejoje.
Mu ekfu: “L'ọ bụ nggu bụ Nchileke mu!”
15 Ẹge mu a-nọ-bebe lẹ
mgboko-a bụ nggu b'ọ nọ l'ẹka.
Nafụtanu mu l'ẹka ndu ọhogu mu;
mẹ l'ẹka ndu, achị mu nụ.
16 Lenua mụbe nwozi ngu ẹnya-ọma!
Guderu n-yemobu ngu dzọfuta mu!
17 Nggụbe Ojejoje;
be ekwekwa t'e kpua mu ifu lẹ ntụ;
kẹ l'ọ bụ nggu bẹ mu rakuru.
Ọ bụ ndu akirishi ono;
bẹ ee-kpuchia ifu lẹ ntụ;
t'ọnu bụru ẹphe kpụrumu l'alị-maa.
18 T'ọnu ono, ẹphe gude adzụ ẹjire ono;
bụru ẹphe kpụrumu;
kẹ l'ẹphe gude oku
onwẹphe iphe ẹphe,
ẹ ta hadu l'ọbu iya;
mẹ ọkpo madzụ ẹbo-ẹbo-l'afụ;
l'ekfubyishi ndu doberu ẹka ndoo.
19 Haa! Ị dụnukakwaru mma
adụnuka; mbụ mma ono,
ị kwakọberu ndu atsụ ngu egvu ono.
Yọ bụru l'ifu ụnwu eliphe bẹ ịi-nọdu;
meeru ẹphe k'ọma;
mbụ ndu gbabataru ngu l'ime; zeeru ndzụ.
20 Iidutaje ẹphe domia l'iku ẹke, ị nọ;
t'ẹjo idzu ụnwu eliphe achị;
be eru ẹphe l'ẹhu.
Yọ bụru l'ụlo ngu;
bẹ iidobeje ẹphe;
t'ẹ ẹjo-okfu be eru ẹphe l'ẹhu.
21 T'e tua Ojejoje ẹpha;
kẹ l'o koshiru mu
n-yemobu iya, dụ biribiri
teke ndu ọhogu mu
yechiru mu ẹge ono,
eeyechije mkpụkpu ono.
22 Mu echia mkpu; sụ:
“A laa mu-o!”
Nggu anụa mkpu ono;
bya agbaaru mu mkpu.
23 Unu yeru Ojejoje obu;
unubẹ ndu nsọ kẹ Ojejoje l'unu ha;
kẹle ndu Ojejoje eletaje
ẹnya; kwa ndu bụ
o-me-g'o-kfuru phẹ.
Obenu lẹ ndu eku onwẹphe
ẹge ẹphe ẹ-ta hadu;
bẹ ọokfuje ụgwo kfurua ya ẹphe l'ishi.
24 Unu shihukwa ike;
unu egude ẹka l'ọkpoma;
unubẹ ndu echeru Ojejoje!