110
Egvu-ọma, Dévidi deru
1 Nchileke sụru Nnajiufu mu:
“Nọdu iya l'ẹka-ụtara;
jeye teke ya e-me ndu ọhogu ngu
t'ẹphe bụru iphe
ịi-dzọpyabe l'ọkpa.”
2 Ojejoje a-nọ lẹ Záyọnu;
nụ ngu mgbọro,
ekoshi ẹge ike ngu habe nshinu.
Ọo-sụ ngu: “T'ị bụru Eze
chịa ndu ọhogu ngu!”
3 Ndu sọja ngu; bẹ ọo-nọdu
ehe uhere oje ọgu teke ọgu daru.
Ọ bụ ẹge iji nchi-abọhu
anọduje ada;
bụ ẹge ụnwu-okorọbya ngu
a-wụ-kfuta ngu l'ugvu ono, dụ nsọ ono.
4 Ojejoje ribuwaru iya;
ọphu ọogba-nwehedu iphe o kfuru.
Ọ sụru: “L'ịi-bụru onye
achịjeru Nchileke ẹja jeye lẹ tutu yoyo
ẹge Melikízedeku bụ iya.”
5 Nnajiufu nọ nggụbe Ojejoje l'ẹka-ụtara.
Ndu eze bẹ oo-gwe
rakaraka mbọku,
iphe e-ghu iya eghughu.
6 Oo-kpe iphe bụ mbakeshi ikpe;
kụa odzu madzụ l'ikpo;
bya achịko ndu achị
mgboko l'ẹphe ha gwee ogwe ujimu.
7 Ọ bụ lẹ nggele,
nọ l'iku esu-ụzo;
bẹ ọo-ngụ mini;
shi iya;
mee ya t'ọ palia ishi.