111
1 T'ajaja bụru kẹ Ojejoje.
Mu e-gude obu mu l'ọ ha kutsee Ojejoje.
Mu e-kutse iya l'ẹke ndu
obu gụru iphoro nọ;
kutsee ya l'ẹke ẹphe nọ ndzukoru.
2 Iphe bụ iphe Ojejoje eme;
bẹ paru apaa.
Iphe bụ ndu ọ dụ mma
anọduje arị iya arịri.
3 Iphe bụ iphe Ojejoje eme;
bẹ dụ ugvu; dụ biribiri.
Odobe-ẹka-ndoo nk'iya
anọje jeye lẹ tutu yoyo.
4 O mewaru t'a nyata iphe dụ biribiri, oome.
Ojejoje emejeru madzụ
eze-iphe-ọma; l'aphụru madzụ imiko.
5 Ndu atsụ iya egvu;
bẹ ọonoduje anụ nri.
Ọgba-ndzụ iya;
bẹ ọonyataje jeye lẹ tutu yoyo.
6 O koshiwaru ndibe iya ẹge ike iya habe;
kẹ l'ọ nataru ndu ọhodo
alị ẹphe woru nụ ẹphe.
7 Iphe bụ iphe o gude ẹka iya
eme bụ ire-lanụ;
bụru iphe vudo nhamụnha.
Ekemu iya l'ọ ha te nwejedu ntụpo.
8 Ekemu ono a-nọ gbururu jeye lẹ gbururu.
E gude obu, gụru iphoro;
mẹe ire-lanụ l'etso iya.
9 Ndu nk'iya b'ọ gbafụtaru;
bya atụa ekemu;
sụ tẹ ọgba-ndzụ iya bụru ojejoje.
Ẹpha iya dụ nsọ; dụ egvu.
10 Ọ kwa ọtsu Ojejoje egvu;
bụ ẹke mmamiphe adụbeje.
Iphe bụ ndu etso ekemu iya;
bẹ iphe edoje ẹnya.
T'e tua ya ẹpha jeye lẹ gbururu.