109
Egvu-ọ ma, Dévidi deru nụ onye ishi egvu
1 Nggụbe Nchileke,
bụ onye mu anọduje aja ajaja;
byiko; ba adahụkwa mu nkịchi;
2 kẹle ndu akirishi;
mẹ ndu ẹregede gbabẹwaru mu ẹjo okfu;
l'atụ ntụmatu ekpu mu.
3 Ẹphe gudewa okfu ndụmashi
gbaa mu mgburumgburu.
Ẹphe abya etso mu okfu;
l'ẹ b'ọ dụ iphe mu meru ẹphe.
4 Teke mu mekoshiru ẹphe l'ọ
bụ ndu ọ̀nyà mu;
ẹphebedua ebolahaa mu ibo.
Obenu lẹ mbẹdua bụ
onye anọduje ekfu anụ
Nchileke; l'ekfushi iya ike.
5 Ẹphe egudeje ẹjo iphe
kfụa mu ụgwo iphe-ọma, mu meru ẹphe.
Mbẹdua wotaru ẹphe l'ọ bụ ndu ọ̀nyà mu.
Ẹphebedua egude ashị,
ẹphe kpọru mu l'akfụ mu ụgwo iya.
6 Yenu ẹjo madzụ t'o je ekechia ya ụzo.
Zinua onye a-nọdu agba iya
ire t'o je evudo iya l'ifu gbaa ya ekebe.
7 Teke e kperu iya ikpe;
t'ọ nmakwa iya.
Tẹ Nchileke gụkwaru ekfukfu,
ookfu anụ iya ye l'iphe dụ ẹji, o meru.
8 Tẹ ndzụ iya gbakwaa kwoo.
T'onye ọdo nọ-chikwaa
ẹnya iya l'oje ozi, o shi eje.
9 T'ọ tọkwaa ụnwu iya ogbe;
haa nyee ya l'ụlo-maa.
10 T'ụnwegirima iya
kwakwaa l'esu-ụzo;
l'arọ arọ.
T'a chịfukwa ẹphe
l'ọkpu-ufu ẹke ẹphe bu!
11 Tẹ ndu o ji ụgwo byakwa
bya egwoo iphe o nweru l'ọ ha.
Tẹ ndu ẹ ta madu ẹke
ẹphe shi tụkokwa akanya,
o seru esese gwota.
12 T'ẹ b'ọ dụkwa onye
e-meru iya iphe-ọma.
Ọphu ọ dụkwa onye
a-phụru ụnwegirima,
ọ tọru ogbe imiko.
13 T'awa iya chịhukwa.
T'ẹphe bụkwaru ndu,
a zaharu azaha l'ọgbo ọphu abya nụ.
14 Tẹ Ojejoje ba azahakwa
ẹjo iphe, nna iya oche phẹ meshiru.
Ọphu o fufukwa iphe dụ ẹji,
nne iya meru efufu lẹ phuu.
15 T'ẹjo iphe, ẹphe meshiru
nọdukwa Ojejoje l'ifu tekenteke;
k'ọphu oo-me t'ẹphe chịhu
lẹ mgboko; t'ẹ ba
anyatahẹ ẹphe anyata ophu;
16 kẹ l'ẹ tọ rịjedu kẹ
t'o meeru madzụ iphe-ọma.
Iphe ooshibejechia ite iya
bụ ẹge oo-me t'e wofu ndu ụkpa;
ndu ẹ-ta dụdu ẹge ọ haru ẹphe;
mẹ ndu obu tọfuru atọfu.
17 Keshinu iphe adụje iya mma
bụ oburu madzụ ọnu;
tẹ yẹbedua bụkwaru onye a tụru ọnu.
Keshinu ọgoru madzụ ọnu adụje iya ẹji;
t'ẹ b'ọ dụkwa onye a-gọru iya ọnu.
18 Keshinu ọ bụ ẹge oye uwe
dụ iya ntse bụ ẹge oburu madzụ ọnu dụ iya;
tẹ mburọnu ono tsokwaru
iya phụ l'ọ bụ mini tsọba iya l'ẹpho;
mbụ tsọo l'ọ bụ manụ tsọba iya l'ọkpu.
19 T'a phukpukwaa ya ẹya l'ọ
bụ onye a phukpuru ukpo.
E kee ya ẹya l'ọ bụ onye
e keru akpọ l'ukfu jeye lẹ gbururu.
20 T'iphe ono, mu gụshiru ono
bụkwaru ụgwo,
Ojejoje a-kfụ ndu ono,
anọduje ebo mu ibo ono;
mbụ ndu ono, anọduje
ekfuru mu ẹjo-okfu ono.
21 Obenu nggụbe Ojejoje,
bụ Nnajiufu mu;
gudenu k'okfu ẹpha ngu meeru mu ọhuma.
Gudenu kẹ n-yemobu ngu ono,
dụnukaru mma ono nafụta mu;
22 kẹle mu bụ onye ụkpa;
bya abụru onye ẹ ta dụdu ẹge ọ haru mu.
E mewaru mu iphe ruru mu lẹ meji.
23 Mu nọokwa inyoki-inyoki
l'ọ bụ nwonyonyo urẹnyashi;
a nmakofuwaru mu l'ọ bụ
onye anmakofu igube.
24 Ikpere mu ta dụhedu ọphu
shihuru ike l'ẹke ẹgu eme mu.
Mu lawaru ẹhu bụwarua ọkpu.
25 Nta-a bẹ ndu ebo mu ibo;
nọ l'ezi mu okfu.
Ẹphe -phụa mu;
ẹphe ekwe l'ishi;
sụ mu họo.
26 Yenuru mu ẹka nggụbe
Ojejoje, bụ Nchileke mu.
Gudenu kẹ n-yemobu ngu;
dzọo mu.
27 Menua t'ẹphe maru
l'ọo nggu b'o shi l'ẹka;
mbụ t'ẹphe maru l'ọo nggụbe Ojejoje;
bẹ meru iya nụ l'onwongu.
28 Ẹphe a-nọdukwaru eburu mu ọnu;
obenu lẹ nggụbedua a-nọdu agọru mu ọnu.
Ẹphe -tso mu ọgu;
bẹ ee-mee ẹphe iphe-iphere.
Obenu lẹ mụbe nwozi ngu
bụlephu ẹswa bẹ mu a-nọdu ete.
29 Ndu anọduje ebo mu ibo;
bẹ ee-ye iphere l'ọ bụ onye yeru uwe.
A phukpua ẹphe iphere
l'ọ bụ onye a phukpuru ukpo.
30 Mu e-gude ọnu mu kutsee
Ojejoje ọkpobe ekutse;
mbụ nọdu l'edzudzu ọha jaa ya ajaja;
31 kẹ l'oovudoje onye ẹ-ta dụdu
ẹge ọ haru iya l'azụ;
dzọo ya l'ẹka ndu ekpe iya nkfugbu.