11
Egvu, Dévidi deru nụ onye ishi egvu
1 Ọ bụ l'ẹka Ojejoje;
bẹ mu domiru onwomu.
?Bụ ngụnu kparu iphe
unu sụru tẹ mu phehu l'ọ bụ nwẹnu
je edomia onwomu l'ẹke ugvu nọ?
2 Lekpoduanu!
Lẹ ndu akirishi setaakwaru
ụta ẹphe; mẹ akfụ ẹphe
gọberu iya ndu obu gụru iphoro.
3 Keshinu e mebyishiwaru ekemu,
bụ iya gude mkpụkpu;
?bụhunu ngụnu b'a sụru
tẹ onye doberu ẹka ndoo mee?
4 Ojejoje nọkwa l'eze-ụlo iya, dụ nsọ.
Ọ bụ l'imigwe; bẹ aba-eze iya nọ.
Yọ nọdu l'ẹke ono; ẹnya
iya anọdu lẹ mgboko-a;
tuko ndiphe l'ẹphe ha l'enyocha.
5 Ojejoje enyochajekwa ndu
obu gụru iphoro;
mẹ ndu akirishi.
Obenu lẹ ndu, bụ iphe-kpaa
adụje ẹphe mma
adụjekwanu iya ashị.
6 Ndu akirishi; bẹ oo-mekochaa
kpukposhi icheku-ọku;
mẹ ọku nshị-egbe
l'ọ bụ igwe achị mini.
Yọ bụru ẹjo phẹrephere,
ekpo ọku a-bụru òkè-iphe ẹphe.
7 Ojejoje bụ onye
doberu ẹka ndoo.
Ndu eme iphe vudo
nhamụnha adụje iya mma.
Ndu obu gụru iphoro;
bẹ e-mekochaa phụ ifu iya.