12
Egvu-ọma, Dévidi deru nụ onye ishi egvu; t'e gude olu, ede edede gụa ya
1 Nggụbe Ojejoje;
bya agbaa mkpu
lẹ ndibe ngu gvụakwaru!
Ẹ to nwehekwa ẹke
onye ire-lanụ nọkwadu!
2 Onyemonye adzụru ibe iya ẹjo-ire.
Ẹphe egudeje ajaja-njagbu
eduphushi ibe ẹphe.
3 Nggụbe Ojejoje;
menua t'ire nyaru ẹphe l'akpo;
mbụ ndu ono, anọduje
aja ibe ẹphe ajaja-njagbu;
mẹ ndu ono, anọduje
atụ ọnu onwẹphe ẹge ẹphe ẹ-ta hadu ono.
4 Mbụ ndu ono, asụje l'ọo
iphe dụ ẹphe mma;
bẹ ẹphe ekfuje;
l'ẹ to nwedu onye
a-gbọ-bugheru okfu ye ẹphe l'ọnu.
?Bụ onye a-tụkwanuru
ẹphe iphe ẹphe e-kfu?
5 Obenu lẹ Ojejoje byaru
bya eyeeru ẹphe ọnu; sụ:
“L'o ruakwaru teke ya
a-byakfuta unu;
kẹle ndu ụkpa;
bẹ unu kpatashiwaru ẹhu;
ndu, nọ lẹ mkpa agụwaru unu aphụ.
Nta-a b'o ruwaru teke
ya a-dzọ ẹphe ẹge ẹphe ele ẹnya iya.”
6 Iphe Ojejoje kfuru bụ ọkpobe okfu.
Okfu iya ono dụ l'ọ bụ
ọkpobe mkpọla-ọcha,
a hụru l'ọku-ụzu ugbo ẹsaa
t'o gbuchafu egbuchafu.
7 Ọ bụ nggụbe Ojejoje;
bẹ eche ayi;
bụru nggu anọduje eletaje
ayi mkpụrumkpuru
tẹ ẹka ndu akirishi be ru ayi l'ẹhu.
8 Ndu akirishi chịkowa
ẹkemeke ọbule tụa;
iphe ndiphe gharu ifu abụwaru ẹjo iphe.