10
1 Nggụbe Ojejoje;
?bụ ngụnu kparu iphe i je akfụru gegerege?
?Bụ ngụnu kparu iphe
i woharu onwongu l'oge iphe-ẹhuka-a?
2 Ndu akirishi egudeje ekuku
l'achị nta ndu ụkpa.
Tẹ ẹjo idzu, ẹphe chịru
doberu ndu ọdo
bụkwaru ọnya; nma ẹphe!
3 Iphe ndu akirishi egudeje asa
nsasa bụ iphe dụ ẹji, l'agụ ẹphe.
Ẹphe anọduje aja ndu iphe
ẹ-te edzujedu edzudzu ajaja;
gbe l'ekfubyishi Nchileke.
4 Ẹphe egudeje oku onwẹphe
jịka ọcho Nchileke.
Ẹphe ta arivujedu
Nchileke l'ọriri lẹ phuu.
5 Iphemiphe ọbule, ẹphe eme
abụjeru ẹphe ụpete.
Ẹphe akakputaje ndu
ọhogu ẹphe l'ẹnya.
Ẹphe ta aphụjedu ikpe ono,
Ojejoje e-mekochaa kpee ẹphe ono.
6 Iphe ẹphe arịje bụ l'ẹphe
bụwa 'enwuribe enwuribe;
l'ẹ t'o nwedu l'ẹphe ejee iphe-ẹhuka.
7 Iphe ejije ẹphe ọnu bụ iphu;
mẹ ụgho; mẹ ọhashi ẹnu
ẹjo iphe ẹphe e-me madzụ.
Iphe ẹphe akpụje l'ọnu bụ
ẹregede; mẹ ẹjo iphe.
8 Ẹphe anọduje l'iku mkpụkpu;
domishia onwẹphe;
kwaaru ndu e-ta adụdu iphe
ẹphe meru; l'egbushi ẹphe.
9 Ọ bụ ẹge agụ edomije
onwiya l'egbushi
ụnwu-anụ; bụ ẹge ẹphe
edomije onwẹphe kwabẹru ndu ụkpa.
Ẹphe hatalẹphu ẹphe;
ẹphe akpụru ẹphe lashia.
10 Ndu ẹphe hataru;
bẹ ẹphe egweje rakaraka;
jeye nk'ẹphe agvụ.
Ẹphe egudeje k'ẹhuka
kụa ndu ụkpa pyaapyaa.
11 Ẹphe arịje lẹ Nchileke
zahawaru iphe ẹphe meru;
l'ọ ghawaru ẹphe azụ;
l'ẹ t'ọo phụhedu ẹji ono, ẹphe eme ono.
12 Nggụbe Ojejoje;
gbeshikpoduaphu egbeshi!
Nggụbe Nchileke;
palikpoduaphu ẹka ngu apali!
Ba azahakwa ndu ono, aakpa ẹhu ono!
13 ?Bụ ngụnu meru iphe ndu
iwe anọduje ekfubyishi Nchileke?
?Nanụ ẹge ọ dụ bẹ ẹphe
anọduje arị l'ẹ to nwedu
iphe Nchileke emeghe ẹphe?
14 Obekwanu l'ị phụkotaje iphemiphe ọbule.
Ịiphuje ndu eje iphe-ẹhuka; mẹ ndu, agụ aphụ.
Ẹ tịi hajẹkwa ẹphe.
Ndu ụkpa bụ nggu;
bẹ ẹphe turu ume tukobe.
Ndu nna ẹphe ta anọhedu
abụru nggu agbajẹru ẹphe mkpu.
15 Nyakwonua ndu iwe ẹka;
mẹ ndu eme ẹjo iphe.
Vọkwaa ẹjo iphe ẹphe
meshiru l'ọ ha.
Ba ahakwa m'ọo nanụ.
16 Ojejoje bụ Eze jeye
lẹ tutu yoyo.
Ndu ọhodo a-chịhu l'alị Ojejoje.
17 Nggụbe Ojejoje;
iphe ndu dụ agu rọru ngu b'ị nụwaru.
Ọ bụ nggu adụje ẹphe ike;
bụru nggu anụje ẹkwa, ẹphe ara.
18 Haaru ndu nna ẹphe ẹ-ta
nọhedu enge;
mẹ ndu aakpa ẹhu;
k'ọphu ndiphe a-hakwanu
ẹphe ọkpa ẹhu.