9
Egvu-ọma, Dévidi deru nụ onye ishi egvu. T'e gude olu egvu “Ẹkwa Nwa” gụa ya
1 Nggụbe Ojejoje;
mu e-gude obu mu l'ọ ha ekele ngu ekele.
Mu a-nọdu ekfukashi kẹ
iphe dụ biribiri, iimeshibebe.
2 Ẹhu a-nọdu atsọ mu ẹna;
mu egude ngu ete ẹswa.
Mu a-gụ egvu gude
jaa ẹpha ngu ajaja; nggụbe
Ọkaribe-Kakọta-Nụ!
3 Ndu ọhogu mu tsuphuwaru azụ!
Ẹphe kpakotawaru iphe dashịa;
tugbushia onwẹphe l'ifu ngu!
4 Kẹ l'ikpe, i kperu
b'i kperu ọhuma;
hawaru mu enge.
Ị nọwa l'aba-eze ngu
kpee ikpe, dụ maa.
5 Iphe bụ mbakeshi b'ị bawaru mba;
bya emewa ndu akirishi;
ẹphe abụru kpurupyata.
I mewaru tẹ ẹpha ẹphe
chịhu gbururu jeye lẹ gbururu.
6 Ndu ọhogu mu; bẹ nk'ẹphe gvụaru.
Ufu ẹphe a-bụkotaru
ọkpu-ufu gbururu jeye lẹ gbururu.
Mkpụkpu ẹphe b'ị vụwaru l'ọ́gbaragba;
k'ọphu bụ l'ẹ to nwedu onye
ephotajekwadu iya nụ.
7 Ojejoje a-bụru eze jeye tutu yoyo.
O mewaru aba-eze iya ono;
yọ ngụru angụru;
k'ọphu ọo-nọdu iya kpee ikpe.
8 Oo-kpe ndu mgboko ikpe ọhuma.
Ikpe iya adabujeru adaburu.
9 Ojejoje bụ a -gbaba;
e zeeru ndzụ kẹ ndu aakpa ẹhu;
ndu iphe-ẹhuka byaru
agbabajẹ iya phụ l'ẹka je edomia onwẹphe.
10 Iphe bụ ndu maru ngu nụ
bụ nggu bẹ ẹphe adakobeje;
kẹle nggụbe Ojejoje ta
ahabụkwaa ndu agbakfuta ngu nụ.
11 Unu gụa egvu gude jaa
Ojejoje ono,
bu lẹ Záyọnu ono ajaja.
Unu raaru iphe bụ
mbakeshi iphemiphe ọbule ono,
o meshiru ono.
12 Kẹ l'onye ono,
agwatajẹ ụgwo ọchi ono
bẹ nyatakwarụa ẹphe.
Ndu iphe-ẹhuka byaru -chia mkpu;
b'ẹ tọo dahụjekwa ẹphe nkịchi.
13 Nggụbe Ojejoje;
phụnuaru mu imiko!
Lewaru ẹge ndu ọhogu mu akpabe mu ẹhu!
Nafụtanu mu l'ẹka anwụhu ono;
14 k'ọphu mu anọdu l'ẹke eeshije
abahụ Záyọnu jaa ngu ajaja;
tee ẹswa l'ị dzọfutaru mu.
15 Iphe bụ mbakeshi
dalahuakwaru l'iduma,
ẹphe tụru l'onwẹphe.
Ẹphe nmakwarụphu l'ọnya, ẹphe gbaru.
16 Iphe e gude maru Ojejoje
bụ kẹ ikpe, dụ mma, ookpeje.
Obenu lẹ ndu akirishi;
bẹ iphe dụ ẹji, ẹphe eme
abụje ọnya hata ẹphe.
17 Ndu eme ẹjo iphe a-lakọta maa;
mbụ l'iphe bụ mbakeshi,
zaharu Nchileke aa-lakọta alị-maa.
18 Obenu lẹ ndu, nọ lẹ mkpa
b'ẹ ta zahadu jeye lẹ tutu yoyo;
ọphu iphe ndu ụkpa ele ẹnya
lẹ Ojejoje e-meru ẹphe
ta abyadụ bya abụ kẹ mmanu.
19 Zilihu nggụbe Ojejoje!
T'ẹ b'ọ bụbukwaa madzụ
e-gbe ka ngu ike!
T'e kpee iphe bụ mbakeshi ikpe l'ifu ngu!
20 Nggụbe Ojejoje; yenua ẹphe egvu!
Te iphe bụ mbakeshi ono
maru l'ọ bụ madzụ mmanu bẹ ẹphe bụ.