30
1 Ọwaa bụ ọnu-okfu Agụru Jake kẹ Masa.
Nwoke ono kfuru iya Itiyẹlu.
O kfuru iya Itiyẹlu; kfuaru iya Ukalu; sụ:
2 “Ọ bụ iya katsụkpo ọbuta idigagalogo
l'iphe bụ madzụ;
lẹ ya te nwekpodua
egomunggo madzụ lẹ phuu.
3 Lẹ ya ta mụdu mmamiphe;
ya ta ma onye nsọ ono amama ophu.
4 ?Bụ onye nyibajewaru imigwe; nyizita?
?Bụ onye gbajẹwaru
okoroko; kuta phẹrephere?
?Bụ onye gudejewa uwe
iya kechia mini, nọ iya nụ?
?Bụ onye meru tẹ mgboko
jebebetsua ẹke o jebeberu?
?Ẹpha onye ono bụ ngụnu?
?Bụ ngụnu bụ ẹpha nwa iya?
Kanụru mu iya m'ị maru iya.
5 Okfu Nchileke l'ọ ha ta adakwa ẹda.
Ọobụje mgbaru-ike iphe bụ
ndu gbabaru l'ime iya;
k'ọphu ndzụ e-dzu ẹphe.
6 Be eyekwakwa iphe l'okfu iya;
ọdumeka bẹ ọo-bakwaru ngu mba;
gụbe ngu onye ẹjo-ire.
7 Iphe labụ bẹ mu arọ ngu;
nggụbe Ojejoje;
ba ajịkakwa mu omeru iphe
tẹmanu mu anwụhude.
8 Mee tẹ mu be ejejeshi
oye ẹka l'iphe-mmanu.
Be emekwa tẹ mu kpaa ụkpa;
ọphu i mekwa tẹ nweru iphe.
Nụjele mu phụ ọphu
e-dzuru mu nụ.
9 Ọdumeka; bẹ mu
e-nwenukakwaru iphe;
shi ẹge ono jịka ngu;
kfulahaa; sụ:
‘?Bụ onye bụ Ojejoje ọbu’;
m'ọ bụ mu akpalahaa ụkpa; yo zia mu oshi;
shi ẹge ono mebyia ẹpha
nggụbe Nchileke mu.
10 Ba atụjekawaru nwozi
yẹle nnajiufu iya mgba;
Ọdumeka bẹ oo-bukwaru
ngu ọnu, e-re nụ.
11 O nwekwaru ndu anọdije akọ nna ẹphe ọnu;
ọphu ẹphe emedu nne ẹphe ọhuma.
12 Mbụ ndu arịje l'ẹphe dụ-geru;
ọbu l'ẹjo adụdu, ẹphe dụ
ta alụfukwa ẹphe l'ẹhu.
13 Mbụ ndu anọduje eku
onwẹphe ekuku;
l'ele kọrobangu.
14 Eze, nọ ẹphe l'ọnu
bụ ogu-mbeke; mẹ nkogo,
ẹphe gude t'ẹphe tụko
ndu ụkpa, nọ lẹ mgboko
gbushikota;
mbụ mee tẹ ndu ẹ tọ
dụdu ẹge ọharu ẹphe
chịhu lẹ mgboko.
15 Etu-mini mụtaru
ụnwu-mgbọko labụ;
Iphe ẹphe anọduje
ararụ iya abụru:
‘Nụ mu! Nụ mu!’
O nweru uzi iphe ẹto,
ẹpho te ejijedu ejiji;
mbụ ụzi iphe ẹno,
ẹ-ta sụbua: ‘L'o dzuwaru!’
16 Iphe ono bụ: ili; ẹkpa-nwa nwanyi,
ẹ-ta atsụdu ime; yẹle alị;
kẹ l'alị t'angụnyabudua min
i sụ lẹ ya ta angụhedu.
Ọwaa ọku, enwu enwunwu.
Ọku te nwedu l'ọo-nọnyaa;
sụ: ‘L'o dzuwaru!’
17 Onye egvu nna iya ẹnya;
t'ọo ngaru nne iya nchị l'iphe o ziru iya;
bẹ egbe-nwọku e-shi lẹ
nsụda ugvu bya aswọta iya ẹnya.
Yọ bụru udele e-ri iya.
18 O nweru uzi iphe ẹto,
dụ mu biribiri nshinu;
mbụ uzi iphe ẹno, ẹ-te edodu mu ẹnya:
19 Ụzo ugo l'akpamigwe;
ụzo agwọ l'eli mkpuma;
mẹ ụzo ụgbo-mini l'eze ẹnyimu;
yẹle ụzo nwoke yẹle nwanyi.
20 Ọwaa ẹge nwanyi ọkpara emeje:
Oorije; fuchaa ọnu.
O me; yọ sụ:
‘L'ẹ tọ dụkwa iphe dụ ẹji ya meru.’
21 O nweru uzi iphe ẹto,
mgboko anmajẹ jijiji;
mbụ uzi iphe ẹno kpọru mgboko ẹka:
22 Iphe ono bụ:
ohu, ghọru onye eze;
onye eswe, dafụtaru nụ bya enweru iphe;
23 nwanyi, dụ madzụ ashị,
mekochaaru; lụa nji;
ọdo bụ nwamgbọko,
e gude egude; yọ kpafụ
nnufu, gude iya nụ.
24 O nweru iphe ẹno haje,
nwanshịi lẹ mgboko;
Obenu l'ẹphe manwụru iphe ẹhu:
25 Ndada bụ iphe agburu-ẹhu
ta nọdu, e meru dobe lẹ mgboko.
Obenu l'ọ pakọje nri
l'ọnanwu dobe, o e-ri l'udzu-mini.
26 Ewalị bụ ụnwu anụ,
ụvo ẹ-ta nọdu, e meru dobe lẹ mgboko.
Obenu l'ọ kpakahụjele eze mkpuma buru.
27 Igube te nwedu ézè;
ọbule ọonodujele ephe l'ọgbo l'ọgbo.
28 Ngwere; bẹ ee-gude ẹka anwụta.
Obenu l'ọo-nọjele-e l'ufu-eze.
29 O nweru uzi iphe ẹto,
ahaje ọkpa ije ọhuma;
Mbụ uzi iphe ẹno,
ahaje ọkpa ije k'ugvu ugvu.
30 Iphe ono bụ agụ.
Agụ bụ iya bụ anụ,
kakọta ike l'iphe bụ anụ.
Ẹ tọ dụdu iphe ọ gbaru ọso;
31 Ọdo bụ oke-ọku, adzọ
kfụngangangu kfụngangangu;
mẹ mkpi;
yẹle onye eze, ndu sọja iya
dọ-pheru mgburumgburu.
32 Ọ -bụru l'i shi mewaa
l'ọ bụ onye eswe;
shi atụ-lije onwongu atụ-li;
m'ọ bụ l'o nweru idzu iphe dụ ẹji, i chịwaru;
kpuchikwaa ẹka l'ifu l'iphere iya!
33 Kẹ l'ọ bụ ẹge ono, bụ:
e -gude mini ẹra-eswi;
e meta iya manụ-buredu,
eeku Bọta, abụje;
a -swịkpoo imi aswịkpo;
yọ wụfuta mee;
bụ ẹge bụkwaphu;
a -kpalia iphe-eghughu; okfu ada.”