31
Ọnu-okfu eze, bụ Limẹlu
1 Ọwaa bụ okfu mmamiphe
eze, bụ Limẹlu.
Okfu ọwaa bụ okfu
mmamiphe, nne iya ziru iya:
2 “Byiko nwa mu.
Nggụbe nwa ọphu,
shi mu l'ẹpho;
nwa, mu kwetaru l'ụkwa iphe.
3 Be ezikwa ike ngu
l'ome kẹ nwanyi!
Be ewokwaru onwongu
haaru ndu ono,
emebyije ndu eze ono.
4 Byiko Limẹlu; ẹ tọ bụkwa kẹ ndu eze.
Ọngu mẹe ta gbakwa ndu eze.
Ẹ tọ gbakwa tẹ mẹe,
eme l'ẹnya gụje ndu ishi.
5 E -menyaa; ẹphe ngụa mẹe;
zahaa iphe ekemu kfuru;
nafụ ndu eemegbu
emegbu ikpe, dụ maa, gbaru ẹphe.
6 Nụ ndu ala l'iyi mẹe, eme l'ẹnya;
nggu anụ ndu aphụ byaru mẹe;
7 t'ẹphe ngụa; zahaa ẹge ọ dụru ẹphe.
Mbụ; t'ẹphe ba anyatahẹ
iphe-ẹhuka, byaru ẹphe.
8 Dzọje ọdzo ẹhu ndu ono,
ẹ-ta dụjedu ike ọdzo ọdzo
ẹhu ẹphe ono
Dzọjeeru ụnwu-ogbe iphe gbaru ẹphe.
9 Kfuje iphe gbaru ngu l'ekfukfu;
nggu ekpeje ikpe nhamụnha.
Gbajẹru ndu ụkpa yẹle ndu
ẹ to nwedu ẹge ọ ha ẹphe ọdzori.”
Nwanyi umere ọma
10 Nwanyi, bụ ọkpobe nwanyi;
?bụ onye a-chọ-vughe iya?
Egbe nwanyi ono kakwa
mkpuma, vu oke aswa ire.
11 Nji iya egudeje ire iya ẹka;
ọphu ọ dụdu ọkpobe
iphe akọ iya ụko.
12 Iphe-ọma bẹ
oo-walatajeru nji iya.
Ẹ too wolatadu iphe-emeka;
jeye l'oge nka-ezekuna nk'iya.
13 Ọofoje ẹji atụru yẹle owu;
fọta ndu ọphu dụ mma;
gude ekwe ẹkwa; yo he iya uhere.
14 Egbe nwanyi ono dụ
l'ọ bụ ụgbo-mini ndu agba ikike nghọ;
kẹ l'oojeje ẹke teru ẹnya
je akpata nri.
15 Ootehuje lẹ gẹrigeri nchi-abọhu;
mee nri; doberu ndibe iya;
bya ekeeru ụnwu-mgbọko,
ẹphe l'iya bu ọru.
16 Ooleje ẹnya ọkpobe alị; zụa;
bya egude okpoga,
o jetaje kọo mgbo vayịnu.
17 Ọ -nọje ozi iya kẹ kerere lẹ phụruru;
Ẹka eshihuje iya ike l'ozi.
18 Nghọ, ọogba;
bẹ ọogbaje iya rita iya uru;
Ọphu iphe-ọku iya
anyịhudu ẹnyashi mgburumgburu.
19 Oo gudeje ẹka iya gbaa òwúú;
gude ẹka iya kwee ẹkwa l'onwiya.
20 Ọ sajẹ ẹka l'emeru ndu
ụkpa mẹ ndu ẹ tọ dụdu
ẹge ọ ha ẹphe iphe-ọma;
21 Teke oyi atsụshi ike;
b'ẹ tọ kpajẹdu ishi;
kẹle ndibe iya b'ọ
dzụshiwaru uwe oyi.
22 Oogudeje ẹka iya
kwee ẹkwa, ọotoje l'iphe-azẹe ya.
Uwe iya bụ ọkpobe ẹkwa
ọcha yẹle k'uswuswe.
23 Nji iya bẹ aakwabẹje ugvu
k'iche l'obu-edukfu l'ẹke
ndu bụ ọgurenya mkpụkpu dzuru.
24 Oogudeje ẹka iya kwee uwe ọcha;
dobe l'ere.
Ọ bụ iya bẹ ndu agba nghọ
azụtaje iphe oke-l'ukfu.
25 Ọkpehu yẹle ọdu ugvu;
bẹ tsoru iya ẹhu;
Oo-mekochaa mụmua
ọnu-ọchi l'ụzo ifu.
26 Oogudeje mmamiphe ekfu okfu;
ẹge ono b'ọ bụje;
ọ -kpọ-ziru madzụ ụzo;
yọ bụleruphu ọkpobe
iphe b'o zije onye ọbu.
27 Ndibe iya bẹ ooswijeru
eswiru; eleta ẹphe ẹnya;
Ọphu ẹnyiru anọdu iya.
28 Ụnwu iya awụ-lihuje;
kua ya onye a gọru ọnu-ọma.
Nji iya l'ekukwa iya phụ
ẹge ono; l'aja iya ajaja.
29 “Lẹ mgboko ọwaa;
gbaa mgburumgburu;
bẹ ụnwanyi, eme iphe,
dụ mma; dụ ugvu jikwaru ejiji.
Ọ bụ l'ọo nggụbedua kakọta iya ẹphe!”
30 Ọdu ugvu l'ẹnya
eduswejekwa madzụ;
ọma-mma abụru
iphe ẹ-ta kpọjedu ụkfu.
Obenu lẹ nwanyi,
atsụ Ojejoje egvu;
bẹ gbaru t'a jaa ya ajaja.
31 Bua ya obunggo, gbaru iya nụ;
Mbụ t'ozi, o gude ẹka iya eje mekwaa
t'e tua ya ẹpha l'obu-edukfu.