29
1 Onye aabaru m̀bà tekenteke;
yo mele-e iphe oome;
bẹ ọtu-gbirimu a-tụ;
ọphu a byadụ aghata iya aghata
2 Ndu doberu ẹka ndoo -bata l'ọchichi;
ndiphe etelahaa ẹswa.
Onye ẹjo iya ono -bata l'ọchichi;
ndiphe atsụlahaa ude.
3 Onye yeru mmamiphe obu
emeje t'ẹhu atsọ nna iya ẹna.
Obenu l'onye eme
k'ụnwanyi ọkpara;
bẹ erigbuje iphe iya.
4 Ọ bụ ikpe, dụ maa;
bẹ eze egudeje mee mkpụkpu, ọ chị;
yo keru ekeru.
Obenu l'onye ẹnya
ori wuruwuru nọ egudeje
ẹka-azụ kpakashịa ya.
5 Onye aja madzụ ibe iya ajaja eli-ọnu
bụ ụgbu, e-kota iya l'ọkpa; bẹ ooge.
6 Ẹjo madzụ; bẹ ẹjo iphe oome
anmajẹ l'ọ bụ ọnya.
Obenu l'onye doberu ẹka ndoo
anọduje agụ egvu; ẹhu l'atsọ iya.
7 Onye doberu ẹka ndoo ezije
obu l'alị;
l'ekpe ndu ụkpa ikpe nhamụnha.
Obenu l'ẹjo madzụ ta bụdu iphe oome;
b'ọ kpa ishi iya.
8 Ọ kwa ndu, bụ
o-gude-ọnu-akpa-nko bụ
ndu emeje tẹ okfu l'ada lẹ mkpụkpu.
Obenu lẹ ndu, maru iphe;
abyanyije iphe-eghughu.
9 Onye nweru egomunggo
-kpụru onye eswe je ụlo-ikpe;
bẹ iphe onye eswe ọbu
awataje ememe bụ:
ọchi-phe mkpọkoro ọchi;
mẹ ọba-phe korokoro;
ọphu 'oo-kwedu tẹ nchị dụ ndoo.
10 Ndu mgbugbu-madzụ;
bẹ onye eme iphe vudo
nhamụnha adụjekwa ẹji.
Ẹphe awata ọcho ẹge ẹphe e-shi wofu iya.
11 Onye eswe avụ-geje ọvuma l'ẹge o ghu iya.
Obenu l'onye maru iphe
akpadeje onwiya.
12 Ọ -bụru l'onye achị achịchi
angajẹ nchị l'iphe bụ ẹjo-ire;
bẹ iphe bụ ndu ejeru iya
ozi abụkotalephu ndu ẹjo iya.
13 Onye ụkpa; mẹ onye akpa
madzụ ẹhu nweru iphe, ẹphe gba mgba.
Iphe ọbu bụ l'ọ bụ Ojejoje
asajẹ ẹphe ẹnya.
14 Onye eze -gude ire-lanụ
l'ekpe ndu ụkpa ikpe;
bẹ aba-eze iya a-ngụru
angụru gbururu jeye.
15 Ọ bụ ẹchachi b'e gudeje
hụ̀a nwata;
yọ maru iphe.
Obenu lẹ nwata, a haru ẹhu;
emechije nne iya ifu.
16 Ndu ẹjo iya ono aka nshinu eje;
ẹjo iphe l'akakwaphu nshinu eje.
Obenu lẹ ndu ọphu doberu
ẹka ndoo e-gude ẹnya
phụ teke ẹphe a-nọdu ada.
17 Hụ̀a nwa ngu àhụ̀hù;
ẹge nchị adụ ngu ndo;
mẹ k'ọphu oo-me t'obu tsọ ngu ẹna.
18 Ẹke ẹ te nwedu onye àphụ̀;
bẹ onyenọnu emeje ẹge dụ iya mma.
Obenu l'ọnu-ọma bụ
k'onye eme iphe a tụru l'ekemu.
19 Ẹ tọ bụlekwa-a okfu-ọnu;
b'e gude ezi ohu iphe nwẹnkinyi;
kẹ l'iphe i kfuru iya e-do iya-a ẹnya;
obenu l'ẹ too yeduru ngu ọnu.
20 ?Ị phụru onye awọ okfu kpokongu?
Onye ono bẹ onye eswe
a-kakwa ọburu madzụ.
21 Nwoke -shi lẹ nwata
l'aswaru nwozi iya aswaru;
bẹ nwata ọbu e-mekochaa naa ya ufu iya.
22 Onye ọvuma akpalije okfu;
onye ọkpoma-ọku l'eme
tẹ ẹjo iphe ka l'igwe.
23 Madzụ -watawa oku
onwonye ekuku;
a maru l'adada iya ruwaru.
Obenu l'onye eme agu;
bẹ ugvu etsoje.
24 Onye gbaru l'ọgbo iphura;
bẹ kwa onwiya dụ iya ashị;
kẹ l'aanụje onye ọbu nte;
t'ẹ b'ọ dụ teke ọo-gba ama.
25 Onye atsụ madzụ egvu;
kwa ọnya b'ọ gbaru onwiya.
Obenu l'onye, bụ Ojejoje
b'ọ chịru ụkfu kwẹe
te nwekwa iphe eme iya nụ.
26 Aadụje igweligwe achọ
t'onye ishi meeru ẹphe
iphe-ọma.
Obenu l'ọ bụ Ojejoje bụ
onye ekpeje ikpe, dụ mma.
27 Onye ẹ te emedu iphe vudo nhamụnha;
adụje onye doberu ẹka ndoo ashị.
Ẹge ono bẹ onye obu gụru iphoro
adụje ẹjo madzụ.