18
1 Onye akpa nkịnyi;
bụ onwiya b'ọ maru.
Ire-lanụ atajẹ iya ẹra lẹ nchị.
2 Onye eswe ta akpajẹdu ishi
mẹ iphe eekfu;
?o doru iya-a ẹnya.
Iphe, ọ bụ bụ:
o-kfu-nk'iya anụ-nk'iya.
3 Ẹjo iphe -vutawa ụzo;
ndụmashi etso iya.
Iphere -byawa;
ụzu etsoru iya.
4 Okfu, shi madzụ l'ọnu adụje l'ọ bụ èbò
ẹke mmamiphe futaru;
bụru nggele, atsọ atsọtso.
5 Ẹ tọ dụkwa mma;
tẹ ikpe laarụ onye ọphu meru ẹji;
gbe nma iya onye ọphu doberu ẹka ndoo.
6 Ọ kwa iphe onye eswe kfutaru
l'ọnu iya bẹ yẹle iya emeje;
bụru ọnu iya;
bẹ oogudje kfuta ẹchachi.
7 Ọnu onye eswe bụ iya emebyije iya;
bụru ọnu iya ono abụjeru ọnya; nma iya.
8 Okfu-azụ anọdujekwa atsọ ntụmatu.
Ooshije madzụ uri jeye l'ime ẹpho.
9 Onye, ẹ-te yeduru ẹhu l'ozi,
ooje;
bẹ yẹle onye emebyishi
iphe emebyishi kwa nwunne.
10 Ẹpha Ojejoje bụ
ọkpo-mgbinyiku ụlo-eli;
ẹke ndu doberu ẹka ndoo agbabajẹ;
je ezeeru ndzụ edzua;
11 Ẹku onye nweru iphe adụje
iya l'ọ bụ agbarike iya.
Ọoduje iya l'ọ bụ eze
ụpho-mkpuma, o gude egbochita onwiya.
12 Madzụ -bụwaru
ọ-ka-onwiya-mma-l'ẹnya;
adada iya etso iya.
Obenu lẹ madzụ wozita
onwiya alị; ugvu etso iya.
13 Onye ẹ-ta nụdua iphe eekfu; je eye iya ọnu
b'ọ bụ iya ririri; bụru iya iphe-iphere.
14 Ọ bụ obu onye esedeje ndzụ iya
teke iphe eme iya.
Obenu l'obu -kofuwa madzụ;
bẹ nk'iya gvụakwaru.
15 Onye nweru egomunngo
bụ iya bẹ iphe eeje akajẹ odo ẹnya;
bụru iya akajẹ ogebe nchị
t'iphe kabaa ya rụ odo ẹnya.
16 Iphe-ọma asajẹru onye eme iya nụ ụzo;
l'ifu ndu oke madzụ.
17 Ọobuje onye lanụ -doo;
ẹba atsụkfuru;
gbururu jeye onye k'ẹbo abya eyee ọnu.
18 A -gụa ẹnwa l'iphe ada okfu; okfu alaa;
e shi ẹge ono gboo ndu ese alakahụ.
19 Ọro-buta nwunne ngu,
i mesweru kakwa ẹhuka;
mẹ l'ọluta mkpụkpu,
gude mgbodo gbabuta
onwiya mgburumgburu.
20 Ọ bụ okfu, shi madzụ l'ọnu;
bẹ oogudeje kfutaru onwiya
iphe e-ji iya ẹpho;
bụru iphe shi iya l'ọnu;
bẹ oogudeje kpajia okfuru.
21 Ndzụ l'ọnwu kwa l'ọnu b'o shi.
Ọo ya bụ l'onyenọnu
a-kwakọbe nata iphe,
o kfutaru l'ọnu iya.
22 Onye chọ-vuru nwanyi,
ọo-lụ;
chọ-vukwaru iphe dụ mma.
Onye ono atụbaje Ojejoje l'obu.
23 Onye ụkpa anọduje arọ arọro;
Obenu l'onye nweru iphe egudeje olu-ike.
24 Onye igwe-ọ̀nyà awakwa ọgu.
Obenu l'o nwekwaru ọ̀nyà,
akajẹ ọno ntse;
karia nwunne.