17
1 Ọ kakwa mma l'ọ bụ
nwẹcha ọkponku bẹ madzụ nweru;
l'ata iya l'ẹhu-gudangu;
mẹ l'ufu ẹke aagba ajị;
ụswo l'ada iya.
2 Onye ozi, maru iphe bụ iya
e-mekochaa bụru onye ishi nwata,
emechishi nna iya ifu.
Ẹge ono bẹ nwozi ono e-tso
keta iphe nnajiufu iya ono;
l'ò -tsò bụru ụnwu iya.
3 Mkpọla-ọcha bụ ite b'e
gudeje nụ̀a ya ánụ̀nù.
Mkpọla-ododo abụru
ọku-ụzu;
bẹ eegudeje data iya;
maru m'ọ dụa mma.
Obenu l'obu madzụ bụ
Ojejoje adataje iya.
4 Onye eme iphe dụ ẹji
angabẹje nchị l'ẹjo ọnu.
Ẹge ono bẹ onye ẹjire
angabẹje nchị l'okfu,
erekuta madzụ anụ.
5 Onye, achị onye ụkpa ọchi;
kwa Nchileke, keru iya nụ;
b'o me iphe-iphere.
Onye, ete ẹswa lẹ ndakfu
dakfuru madzụ te nwedu
iphe e-me t'onye ọbu laa kẹ manụ.
6 Ụnwu nwanwa bụ ùgvù,
madzụ gude aka nka.
Nne lẹ nna abụru iphe
ụnwegirima gude eku onwẹphe.
7 Onye eswe te ekfukwa okfu, nweru ishi.
Ọ kwaphụ ẹge ono;
b'ẹ tọ gbadu tẹ onye ishi dzụje ẹjo-ire.
8 Ẹka-azụ erejeru onye,
anụ iya nụ l'ọ bụ ọgvu;
k'ọphu bụ l'ọ nọduje
agbaru iya ụpha-ẹka.
9 Onye agụje nvụ l'ẹke e
mesweru iya;
bẹ yẹle ndu ọdo adụje lẹ mma.
Obenu l'onye ta azahajẹdu
iphe e meru iya anọduje
achịka ndu ọ̀nyà iya achịka.
10 A -baaru onye nweru egomunggo mba;
b'ọ kajẹkwa iya oru l'ẹhu;
karia ụkporo-ọnu ẹchachi ise,
e chiru onye eswe.
11 Onye eme ẹji eshibeje l'ọo nk'iya e-me.
Obenu l'ọ bụ nwozi,
ẹ-ta phụjederu madzụ imiko
e-mekochaa hụ̀a ya àhụ̀hù.
12 Ọ kakwa mma lẹ nne agụ,
a naru ụnwu iya fụru ngu l'ụzo;
mẹ l'i jekfuru onye eswe
l'ẹke ọono l'eme eswe.
13 Onye, gude ẹjo iphe kfụa
ụgwo iphe-ọma, e meru iya
bẹ ẹjo iphe ta abyakwa bya
alụfu alụfu lẹ nk'iya.
14 Ọwata ụswo dụ l'ọ bụ ọswoha mini.
Ọo ya bụ t'ị haa nko;
tẹ okfu ba ada.
15 Okpefu onye iswi ta dụdu mma;
mẹ ọnma onye iswi dụ mma ikpe;
tụkokwa bụru akpamara l'ifu Ojejoje.
16 ?Bụ uru ngụnu; bẹ okpoga
barụ l'ẹka onye eswe;
l'ẹ-ba abụ lẹ mkpa kẹ
egomunggo dụ iya.
17 Ndu eshi ọnya ekoshije
l'ẹphe yeru onwẹphe obu tekenteke.
Obenu lẹ nwunne bụlephu l'ọ̀gvù iphe-ẹhuka.
18 Onye egomunggo swehuru
ewojeru onwiya ye l'itumo;
gude naa madzụ mkpalẹka.
19 Onye ụswo kwa ẹjo iphe
b'o yeru obu;
onye apali onwiya apali
abụru eyifu bẹ ọocho ụzo iya.
20 Onye ọkpoma iya gọru agọgo;
bẹ iphe iya anọduje ala azụ azụ.
Iphe-ẹhuka abụru kẹ onye ntuphu-ire.
21 Ọkpara-rigbarigba;
bụ aphụ tsaru nna iya;
ẹhu-ọtso-ẹna ta bụ kẹ nna,
nwatibe iya eme eswe.
22 Ẹhu-ọtso-ẹna kwa ọkpobe ọgvu.
Obenu lẹ meji-atọfu
anọduje amị madzụ ọkpu
wọngu-wọngu.
23 Ẹjo madzụ anatajẹ ẹka-azụ;
k'ọphu oo-kpe ẹjo ikpe.
24 Onye egomunggo ruru alị;
bẹ amajẹru iphe.
Obenu l'onye eswe;
bẹ ẹnya te egvujeduru egvuru.
25 Ọkpara-rigbarigba;
bụ ọbyaru byaru nna iya;
bụru nggụmaphu nọduru nne, mụru iya nụ.
26 Ẹ tọ dụkwa mma oreta onye
ẹ-ta dụdu iphe o meru nre.
Tọ dụ mma ochi ndu
oke amadụ iphe l'ẹphe meru iphe, dụ mma.
27 Onye nweru egomunggo
ekfuje okfu zee ọnu.
Onye eme agu abụru onye, iphe doru ẹnya.
28 Ọobuje onye eswe -daa ashị;
e tubesu l'ọ maru iphe.
Teke bụ l'ọ taru ire iya ẹra;
e tubesu l'ọ bụ onye iphe doru ẹnya.