16
1 Madzụ arịje iphe oo-me.
Obenu l'ọ bụ Ojejoje ekfuje
ọphu e-mekochaa mee nụ.
2 Uche onye 'adụ iya njọ.
Obenu l'ọ bụ Ojejoje maru
iphe bụ uche onye.
3 Woru iphe bụ iphe iime
ememe; ye Ojejoje l'ẹka;
nggu aphụ l'iphe bụ iphe
bụ idzu ngu a-nọdu eme
l'ẹge ị tụberu iya.
4 Iphe, bụ iphe, Ojejoje meru;
b'o meru dobe t'ọ gaa mkpa nk'iya;
Ndu ẹjo iya ono b'o meru doberu mbọku,
a-ta ẹphe aphụphu.
5 Iphe, bụ onye eku onwiya
ekuku bẹ kwa akpamara l'ifu Ojejoje.
Iphe ịi-hụbe ama;
abụru l'ẹ taa hadu ẹphe t'ẹphe laa ẹwoma.
6 Onye wozitaru onwiya alị
l'ẹke Ojejoje nọ;
l'ekfu ire-lanụ;
b'ọ kfụjeru ụgwo iphe ẹji iya.
Yọ bụru ọtsu Ojejoje egvu
emeje madzụ t'o sefu ẹka l'ẹjo iphe.
7 Iphe madzụ eme -dụwa Ojejoje mma;
bẹ oomeje mee tẹ yẹle
ndu ọhogu iya dụ lẹ mma.
8 Nwẹku, e doberu ẹka ndoo kpaa kakwa mma;
ma l'ẹku, a kparu l'ụzo, ẹ ta dụdu mma.
9 Iphe madzụ e-me b'ọ rịje arịri dobe.
Obenu l'ọ bụ Ojejoje
ekoshije iya ẹge ọo-hata ọkpa iya.
10 Okfu onye eze adụje l'ọ bụ
okfu, shi Nchileke l'ọnu;
ọphu 'ookpeswejedu ikpe ekpeswe.
11 Iphe eegude atụ ẹra iphe,
dụ ẹge gbaru t'ọ dụ
bụ Ojejoje b'o shi l'ẹka.
Iphe bụ ẹra iphe nọ l'ẹkpa;
abụru iya b'o shi l'ẹka.
12 Ọ kwa akpamara lẹ ndu eze meru ẹjo iphe;
kẹ l'ọ bụ l'odobe-ẹka-ndo;
bẹ onye eze egudeje mee tẹ
aba-eze iya ngụru angụru.
13 Ire-lanụ atsọje ndu eze ẹna.
Ẹphe te gude onye ezi-okfu egvu egvu.
14 Ẹhu -ghua eze eghughu;
ishi madzụ abaa ya.
Obenu l'ọ bụ onye maru
iphe abyanyije iya.
15 Ifu -tụshihu onye eze;
ndzụ edzua madzụ.
Ị -laa onye eze l'obu;
b'ọ dụ l'ọ bụ eruru mini ọdungu.
16 Madzụ ọmaru mmamiphe
kakwa mma; mẹ l'onweru okpoga.
Iphe-odo-ẹnya aka mma;
ma lẹ mkpọla-ọcha.
17 Ụzo, ndu obu gụru iphoro eshije
bụ ụzo, buru ụba yeru iphe dụ ẹji.
Onye afọ ẹke ooye ọkpa iya afọfo;
bụ ndzụ iya bẹ ooche nche.
18 Madzụ -watawa oku onwiya ekuku;
ọ-la-l'iyi etso iya.
Madzụ -bụwaru
ọ-ka-onwiya-mma-l'ẹnya;
adada etso iya.
19 Ọ ka mma l'ị bụ onye
wozitaru onwongu alị;
nggu lẹ ndu ụkpa l'ayị;
mẹ l'i tsoru ndu gude
oke-ẹpha
l'eke iphe ẹphe nataru lẹ nfụ.
20 Onye anata ntuzi-ẹka;
bẹ iphe adụjeru lẹ mma
ọnu-ọma abụru k'onye
tukoberu Ojejoje ishi.
21 Onye iphe doru ẹnya bụ iya;
bụ lẹ madzụ bẹ obu ruru alị.
Onye olu-odoo abụru iya
a-dụ ike ozi ndu ọdo iphe.
22 Mmamiphe bụ iya bụ ishi
nggele mini ndzụ l'ẹhu ndu nweru iya nụ.
Obenu l'onye eswe;
bẹ eswe iya ono abụjeru
iphe eegude àhụ̀ iya àhụ̀hù.
23 Onye maru iphe agụje okfu,
shi iya l'ọnu ọgu.
Okfu, shi iya l'ọnu
abụkwanuru iphe eegude amụta iphe.
24 Okfu-ọma dụ l'ọ bụ
manụ-ẹngu.
Ooguje ẹhu egugu;
mee t'ẹhu dụ madzụ npho.
25 O nweru ụzo, abụje;
madzụ eshi iya;
yọ dụ iya l'ọ bụ ọkpobe ụzo.
Obenu lẹ mkpọ-chi ishi ụzo ono bụ anwụhu.
26 Ọ bụ iphe agụ nwozi;
bụ iya emeje; yọ kabaaru oje ozi.
Yọ bụru ẹgu, agụ iya nụ
anọduje eyeshiru iya ọku.
27 Ẹjo madzụ eshibeje ite ẹjo iphe.
Ẹge ono bẹ okfu, shi iya
l'ọnu anọduje ereku l'ọ bụ ivovo-ọku.
28 Onye ẹlukfu anọduje akpa okfu;
onye ntụmatu l'ebukahuje ndu
ẹphe l'iya shi dụ lẹ mma.
29 Onye eme ọnwuu-ọnwuu
anọduje ezi ibe iya ẹjo nzizi;
l'edu iya eshi ụzo, ẹ-ta dụdu mma.
30 Onye ajị-buru ibe iya ẹnya
abụru ẹregede bẹ ọogba;
onye ọphu kpụruberu ọnu
abụru ẹjo iphe b'ọ tụberu k'ememe.
31 Ishi-ẹwo bụ ùgvù, dụ egvu.
Ọ bụ onye doberu ẹka ndoo b'o ruje ẹka.
32 Onye ẹ-ta bụdu onye
obu-ọku
kakwa mma; ma l'onye bụ mkparawa.
Onye akpadeje onwiya teke
iphe eghu iya eghughu
aka mma mẹ l'onye ọphu
a-lụ;
lụta mkpụkpu ophu.
33 Ọ bụ madzụ agụje ẹnwa.
Obenu l'ọ bụ Ojejoje ekfuje onye ọo-larụ.