19
1 Ọ kakwa mma ọ bụ
onye ụkpa, ụta ẹ-ta dụdu l'ẹhu iya;
mẹ l'onye eswe,
ẹ te gudedu ire iya ẹka.
2 Ẹ tọ dụkwa mma lẹ madzụ;
b'o vu evuvu;
mbụ iphe ẹ tọ madụ ishi iya.
Onye kọrokoro-mẹremere
eshiswekwa ụzo.
3 Eswe, madzụ eme emebyijeru iya iphe.
Teke ono; yọ ghakọbe; bobe iya Ojejoje.
4 Ẹku ezetaje igwe ọ̀nyà;
obenu l'ụkpa anọduje
achịka ndu ọ̀nyà achịka.
5 Onye ẹjo ekebe ta alakwa kẹ manụ;
ọphu onye ẹjo-ire ta byakwa bya anahụ.
6 Aadụje l'igwe achọ t'onye
eme úkò meeru ẹphe úkò.
Ẹge ono bẹ onyemonye
ọbule abụjeru ọ̀nyà onye asa ẹka.
7 Onye ụkpa adụje ndu yẹle iya bụ ashị.
?Buchia ndu yẹle iya eshi
ọ̀nyà ta anọdu agbaru iya ọso.
Ọonoduje agbatso ẹphe;
to nwe onye agharu iya ẹnya.
8 Ọ bụ onye maru iphe eyejeru onwiya obu;
bụru onye ẹnya eru alị;
b'ọ dụjeru lẹ mma.
9 Onye ẹjo ekebe ta alakwa kẹ manụ.
Ẹge ono bẹ onye ẹjo-ire
a-bụru ọ-la-l'iyi.
10 Ẹ tọ gbakwa t'onye eswe rije ugvu;
k'ọphu ọ bụru t'ohu bụru
onye ishi ụnwu eze.
11 Ọ kwa iphe-odo-ẹnya emeje
tẹ madzụ ba abụ onye
obu-ọku;
bụru iya ugvu teke e meru iya ẹji.
12 Iwe eze adụjekwa l'ọ bụ ẹke agụ ede ekiri.
Obenu lẹ madzụ -bawa iya
l'obu bẹ ọoduje l'ọ bụ ẹke iji dashịru.
13 Ọkpara-rigbarigba; bụ ụsu; sụ nna iya;
nwanyi okfu-ọnu adụ l'ọ bụ
nwa tẹyiteyi mini tekenteke.
14 Ụlo; mẹ ẹku nwoke;
bụ ụnwu iya enweje iya.
Obenu l'ọkpoberu nwanyi;
bụ Ojejoje anụje iya.
15 Ẹnyiru atụjeru madzụ ye lẹ mgbẹnya;
bụru onye nọ kẹ manụ azẹje ẹgu.
16 Onye eme iphe ekemu kfuru
kwa ndzụ iya b'o che.
Obenu l'onye aalọ ẹka lẹ nchị;
to nwe iphe ọ gụberu iya
achọkwaru onwiya
ishi-ephuhu.
17 Onye asa ẹka l'anụ ndu ụkpa
iphe kwa Ojejoje bẹ ooje ụgwo.
Ọ bụ Ojejoje e-bu iya nggo.
18 Hụ̀je nwatibe ngu àhụ̀hù teke ịi-hụ̀ta iya.
Ole ba ahụ̀kwa iya kẹ ahụ̀-gbu.
19 Onye ọkpoma-ọku;
bẹ ọkpoma-ọku iya
e-butajekwa;
kẹ l'ị -dzọo ya l'ọwaa;
bẹ ịi-dzọje nụ iya phụ l'ọdo.
20 Ngabẹje nchị teke
aakpọ-ziru ngu ụzo;
nggu angabẹje nchị l'iphe, eezi ngu;
k'ọphu ii-mekochaa bụru onye maru iphe.
21 Iphe, nọ madzụ l'obu
k'ememe ahajẹ l'igwe.
Obenu lẹ kẹ Ojejoje mefutaje.
22 Iphe eele madzụ ẹnya l'ẹka
bụ owozita onwonye alị.
Ọ kakwa mma lẹ madzụ
bụ onye ụkpa; mẹ l'ọ bụru onye ẹjo-ire.
23 Ọtsu Ojejoje egvu emejekwa tẹ madzụ kaa nka.
Teke ono; obu erua onye ọbu alị;
iphe-ẹhuka eburu ụba yeru iya.
24 Onye ẹnyiru;
bẹ ẹka iya akwajẹ l'efere;
tọo dụhe ike palia ya ye l'ọnu.
25 I -chia onye ụru-ọnu iphe;
onye ẹ-ta mafụdu iphe
egude iya mụta iphe.
Onye iphe doru ẹnya abụje:
ị -baaru iya mba;
yo gude iya kabaa ọmuta iphe.
26 Onye etsuje nna iya iphe; chịfu nne iya
bụkwa iphe-iphere;
bụru iphe-ọchi.
27 Nwa mu; ị -haa ọngabe nchị
l'iphe eezi ngu;
bẹ ii-phukwa ụzo lẹ k'iphe odo-ẹnya.
28 Ẹjo ekebe anmajẹ ewotaje ikpe,
vudo nhamụnha nmaa swọkoswoko.
Ọnu ẹjo madzụ abụru ẹjo
iphe bẹ ọonoduje eri ori nri.
29 Ndu ụru-ọnu; b'e kpewaru
ikpe ẹphe; dobe edobe;
ẹchachi anọduwa l'eche ndu eme eswe.