8
Nìm ma tapèh, Pôn bình plình hlui ken
1 Jò Kon Trìu pèh nìm ma tapèh, ta trŏc hatinh jah qnah qne jò.
2 Au hnoq tapèh ngai ƀình plình yòng enh ngèa Boc Plình, i mangai am ka wì haq tapèh toq ken.
3 Khoe aih i mòeq ƀình plình qnoeq trùh yòng ajang prang kùh waiq oe enh ngèa ka gèq bùa, haq wê abôq broq xi wang, haq jah bàc gahnàu, đòeq dèch atŏc gahnàu aih taprang kùh waiq broq xi wang enh ngèa ka gèq bùa pajùm ti bàu waiq khàn da ƀòe mangai Boc Plình.
4 Nhòe linh gahnàu enh tì ƀình plình aih, pajùm ti bàu waiq khàn da ƀòe mangai da Boc Plình pan tŏc trùh enh ngèa Boc Plình.
5 Khoe aih ƀình plình wê abôq wang yŏc ùnh enh prang kùh waiq tah bình ta aih, khoe aih hwênh qnìh ta crŏng taneh: Tajòe qmòe jò aih i ƀòe atêh hilùng dêh, cađah, camlet xam kan taneh ralàng.
6 Tapèh ƀình plình wê tapèh toq ken hi padon hlui.
7 Ƀình plình ma adroe hlui ken, trŏc loh ka clìh preo i xam ùnh clai pajùm ti mahim dahrôq loh ta crŏng taneh. Mòeq ta piq phàn taneh loh ka ùnh cheo, mòeq ta piq phàn ƀài long, ùnh cheo dŏng, rìm adrech nhat cheo dìq.
8 Ƀình plình ma baiq hlui ken: i kan cato kàn tìah taiq ka bui wang kàn xi ùnh hwênh qnìh ta diac raxìq. Mòeq ta piq phàn diac wìa mahim,
9 mòeq ta piq phàn ngè rìh ta diac raxìq cachìt dŏng, mòeq phàn piq ƀài boang loh ka raliang.
10 Ƀình plình ma piq hlui ken, aih i mòeq toq halŏng kàn clìh enh plình, cheo loh qmòe pla ùnh qmang ka hiloeh hadreo; halŏng aih clìh ta mòeq phàn piq cròng diac xam goe diac.
11 Yiniq halŏng aih: Cachiq xang, mòeq phàn piq cròng diac loh dŏng ka xua qmang ka cachiq xang, broq ka bàc ngai cachìt, majah qmang aih diac khoe loh ka xang.
12 Ƀình plình ma pôn hlui ken, mòeq phàn piq mat mahì pi qngah, mòeq pàn piq mat khê xam mòeq phàn piq ƀài halŏng hadai, dôq mòeq phàn piq ƀàikan qngah aih loh dŏng ka clam, đòeq jò dahì hnhung mòeq phàn piq kan qngah, damang hanoh.
13 Jò aih au ti ngan, au tàng bàu cliang kèn pan taqne trŏc rai crêu cadêh: Haƀo qnàng! Haƀo qnàng! Haƀo qnàng! Ka ƀài mangaima rìh ta crŏng taneh, majah qmang aih oe i bàu ken da piq bình plình qnoeq ma padon hlui hòm.