7
Boc Plình hadro đòeq deh ƀòe hapŏng
1 Khoe ka aih, au hnoq i pôn ƀình plình yòng ajang pôn toq mùm taneh, tì wì haq rùp padràng pôn qngèa cayeo, dôq ùh hìaq i cayeo hlui ta taneh, ta diac raxìq, tagoe long.
2 Au hnoq hòm i mòeq bình plình qnoeq, tŏc enh apah mat mahì loh, tì haq wê ngè pateo da Boc Plình ma rìh halình. Haq dêh bàu crêu rai doe ka pôn ƀình plình ma khoe jah cwìang đòeq broq kan haƀo ka taneh xam diac raxìq.
3 “Apaq broq kan haƀo ka taneh, ka diac raxìq xam ƀài long trùh jò leq bèn khoe pateo hadro ta ngòng ƀài hapŏng da Boc Plình bèn.
4 Au tàng, ƀài mangai majah pateo hadro aih jah: 144.000 ngai loh enh ƀài xinoe Isorali;
5 Enh xinoe Juđa jah: 12.000 ngai;
Enh xinoe Rubên jah: 12.000 ngai;
Enh xinoe Gat jah 12.000 ngai;
6 Enh xinoe Ase jah 12.000 ngai;
Enh xinoe Neptali jah 12.000 ngai;
Enh xinoe Manase jah 12.000 ngai;
7 Enh xinoe Sime-ôn jah 12.000 ngai;
Enh xinoe Lêwi jah 12.000 ngai;
Enh xinoe Ysaca jah 12.000 ngai.
8 Enh xnoe Sabulôn jah 12.000 ngai;
Enh xinoe Jôsep jah 12.000 ngai;
Enh xinoe Bênjamin jah 12.000 ngai jah pateo hadro.
9 Hi khoe ka aih, au hnoq ƀài mangai haraya rayùc, pi bô oe dìq rèn, loh enh rìm diac, rìm xinoe, rìm gùng, rìm bàu capoch; wì haq yòng enh ngèa ka gèq bùa xam enh ngèa Kon Trìu, caxùnh eo yôh taboc, tì wì haq wê hamenh hla hanoc,
10 wì haq creo cadêh:
“Kan dèch claih loh enh Boc Plình bèn,
aih Mangai ma haqngui tagèq bùa,
Xam enh Kon trìu”.
11 Dìq dŏng ƀình plình yòng dudan ka gèq bùa, dudan ka ƀài gucraq hloe xam pôn toq ngè rìh, kùp deh hadrò enh ngèa ka gèq bùa rai kùh waiq Boc Plình,
12 wì doe:
“Amen! Bàu manè enh, kan ranhòm, kan rabiaq, kan manè apôi, kan tajì, kan itai xam padren dêh, hlài dìq ta Boc Plình bèn mòeq đòeq ùh lùch! Amen”.
13 Jò aih i mòeq ngai gucraq bòch au: “Dìq ka mangai ma caxùnh eo yôh taboc qmat ìq cabô, wì haq trùh enh leq?
14 Au padreo bàu: “Wì craq! Ìh loq trong aih”. Haq doe ka au: “Wì haq qmat aih la ƀài mangai ma khoe loh enh kan nanxa kàn, khoe rùh, khoe broq dèh eo jah taboc ta mahim Kon Trìu.
15 Qmang aih, dài wì haq majah haqngui enh ngèa ka gèq bùa Boc Plình, dahì damang jah patìh ta hnim kùh waiq da haq; Mangai ma haqngui tagèq bùa jah wèq ban wì haq.
16 Wì haq pi pangot, pi croh ranŏng hòm; pi i ka mat mahì, pi i kan tôq enh leq oe jraq wì haq.
17 Majah qmang aih Kon Trìu oe taqne gèq bùa jah rai ban rai ajèn qnung wì haq trùh ta ƀài cròng diac rìh; Boc Plình jah xùt dìq dŏng diac mat wì haq.