9
1 Ƀình plình ma padam hlui ken, aih au hnoq mòeq toq halŏng enh plình clìh ta crŏng taneh, khoe jah am ka halŏng aih khwaq da hwinh jrùq ùh lùch,
2 Halŏng aih pèch hwin jrùq ùh lùch aih, i nhòe enh qneq pan ta atŏc, tìah ka nhòe da tanùh kàn; mat mahì xam hòe cayêu loh dŏng ka clam ka nhòe enh hwin jrùq.
3 Enh nhòe aih prai loh ƀài lìp pan jàp ta crŏng taneh; i mangai am ka wì haq cwìang tìah qmang ka agôt ta taneh.
4 I bàu ùh lòh wì haq apaq troq đac ƀài nhat oe ta crŏng taneh, enh long qyoh trùh long kàn, mahaq jah troq đac toq ƀài mangai ta ngòng wì haq ma ùh i ka teo da Boc Plình.
5 Èh am ka wì haq cwìang ùh xài đòeq hujêh đac, mahaq đòeq toq pani ƀài mangai aih ta padam khê, kan baxa aih tìah ka jò agôt kap.
6 Ta ƀài hì aih, kon mangai chaq kan cachìt mahaq chaq ùh jah; wì tangèh ka jah cachìt yàng kan cachìt wia đac ka hangai.
7 Ƀài lìp aih tìah ka axêh khoe padon đòeq hu lam tajêh tablah: Tagàu wì haq i cadoh bùa tìah taiq ka wang, mùh mat haq qmang ka hadrò mangai;
8 haq i xàc qmang ka xàc gàu gucadrì, hanenh haq qmang ka hapoh sutùh.
9 Haq i caqmoc qmang ka caqmoc mem, atêh panan da haq tìah ka atêh bàc toq xê ma i bàc toq axêh dùi tùh loh tanòe tajêh.
10 Tênh haq i nŏc qmang ka agôt, haq yŏc tênh aih ma baxa pani kon mangai ta padam khê.
11 Haq i bùa pagàu, aih mangai da hwin jrùq, bàu Hêbru doe: Abađôn, bàu Grec doe Abôliôn.
12 Kan ranàc ma adroe bu khoe; manòeq kô oe i tam baiq kan ranàc trùh atìq ka aih hòm.
Bình plình ma tadràu hlui ken
13 Ƀình plình ma tadràu hlui ken, aih au tàng i bàu loh enh pôn toq haki da prang kùh waiq broq xi wang ma đoèq enh ngèa ka Boc Plình.
14 Bàu aih doe ka ƀình plình ma tadràu qnang wê ken: “Drah caqnaih pôn ƀình plình ma qnang ƀìq kàt đòeq ta cròng diac kàn Ophorat beq”.
15 Pôn ƀình plình aih khoe rap gòm đòeq waq toq hi troq deh jò, hì, khê, hanam, jah caqnaih hu lam jêh cađac mòeq ta piq phàn kon mangai.
16 Lình kòe axêh da ƀài lình aih rèn jah baiq hrinh trìuq; aih sôq au ma khoe tàng.
17 Axêh xam mangai kòe axêh au ma hnoq takan mahnò aih qmang kô: Ƀài wì aih dìq caxùnh eo jop gòh qmang ka ùnh, mau nget gam, mau drinh da liu hwình; gàu axêh tìah ka gàu sutùh, hacùng haq caprôh loh ùnh, loh nhòe xam liu hwình.
18 Mòeq phàn piq kon mangai cachìt ka piq kan ranàc kô aih: ùnh, nhòe, xam liu hwình loh enh hacùng axêh.
19 Majah qmang aih cwìang itai da axêh aih oe jang hacùng xam ajang tênh haq, ƀài tênh aih tìah qmang ka ƀìh, i gàu, wì haq yŏc deh gàu aih hu ti jôh mangai.
20 Ƀài mangai ma oe rìh, aih ƀài mangai ma ùh hìaq cachìt ka ƀài kan ranàc aih, dua ùh raxach hu cađac ƀài ngè tì kŏng wì haq ma broq loh, dua toq kùh waiq kiac chŏc xam radua qmù broq xi wang xam bac xam đùng, xam hmo, xam long aih ƀài kan cato qmù ùh qnì hnoq, ùh xau tàng, ùh qnì lam.
21 Wì haq ùh raxach ka jêh mangai, ka blòeh blŏng, ka tango, atùng.