5
Puencawn Raphael
1 Te phoeiah Tobias loh a napa Tobit te, “A pa kai nan uen bangla boeih ka saii bitni.
2 Tedae metlam lae anih taengkah tangka te ka dang eh. Anih loh kai m'ming pawt tih kai long khaw anih ka ming moeh nih. Mebang mingphanah nim anih te ka paek vetih m'ming eh. Kai n'tangnah vetih kai te tangka m'paek venim? Media longpuei te ka ming bal pawt tih, te te metlam ka pha eh?” a ti nah.
3 Te vaengah Tobit loh a capa Tobias te, “A nih loh kai pinnah m'paek tih anih khaw pinnah ka paek coeng. Te te panit la ka boe tih rhakthuem ah ka loh rhoi. Rhakthuem te tangka neh ka khueh pah. Anih taengah tangka ka khueh te kum kul a poeng coeng. Te dongah ka capa, uepom hlang te tlap lamtah namah neh cet rhoi. Na mael rhoi vaengah anih te thapang m'paek bitni. Gabael taeng lamkah tangka mah ham bal puei dae,” a ti nah.
4 Te dongah Tobias te cet tih hlang pakhat, longpuei aka ming te Media la amah neh caeh ham a tlap. A caeh hatah a hmai ah puencawn Raphael a pai te a hmuh. Tedae anih te Pathen kah puencawn la hmat pawh.
5 Tobias loh anih te, “Cadong pa, me lamkah nim na loh?” “Israel ca khuikah uh hoel lae?” a ti nah. Anih te, “He la bibi sai hma ka lo he,” a ti nah. Te phoeiah Tobias loh anih te, “Media la aka cet longpuei te na ming a?” a ti nah.
6 “Ka ming ta, teah te a tue a sen ka om ta, te te ka hmat tih longpuei khaw boeih ka ming. Media la puet ka cet coeng. Media Rages kah Gabael khaw mah huiko ni. Anih taengah khaw puet ka om coeng. Ecbatan lamloh Rage tah hnin nit longcaeh ah om. Te tah tlang rhoek laklo ah om tih, Ecbatatah kolbawn laklo ah om,” a ti nah.
7 Te dongah Tobias loh anih te, “Cadong pa, kai n'rhing dae, A pa taengah ka thui mai dae eh. Kai he nang neh hmai caeh ham ka ngaihnah om. Na thapang kam paek bitni,” a ti nah.
8 “Kang rhing bitni, tedae muep koe boeh ne,” a ti nah.
9 Te dongah Tobias te a napa taengah thui hamla cet tih a mah taengah, “Hlang pakhat ka hmuh coeng, anih te mah Israel ca khuikah ni,” a ti nah. Te vaengah, “Ka capa aw, anih te khue lamtah a cako kawng khaw, mebang a khueh tih, nang neh na caeh ham khaw meyet nim a uep om tih khaw ka ming lah eh,” a ti nah.
10 Te dongah Tobias te cet tih anih te a khue. Te vaengah, “Cadong pa, a pa loh nang n'khue,” a ti nah. Tedae Tobit loh, “Kai hamla mebang omngaihnah nim nang khueh? Kai tah khosae aka hmuh mueh hlang la ka om. Vaan kah khosae khaw ka hmu voel pawh. A hmuep ah hlang duek bangla ka yalh. Vangnah khaw ka hmuh voel pawh. Ka hing dae aka duek lakli ah ka yalh. Pilnam kah ol te ka yaak dae ka hmuh hae pawh,” a ti nah.
Te dongah cadong pa loh, “Na rhalthen sak, Pathen tah nang hoeih sak hamla ha tawn uh coeng, na rhalthen sak,” a ti nah.
Tobit loh anih te, “Ka capa Tobias he Media la caeh a ngaih. Anih te na puei tih na tueng thai aya? Ka manca aw, thapang kam paek bitni,” a ti nah.
Anih long khaw, “Anih te ka caeh puei thai bitni, long boeih ka ming. Media te ka cet noek tih van te khaw boeih ka lan coeng. Tlang neh longpuei rhoek boeih ka hmat ngawn,” a ti nah.
11 Te dongah Tobit loh, “Manuca nang, na imkhuikho ta mekah nim? Namah koca ta meka nim? Manuca nang thui lah,” a ti nah.
12 Tedae anih loh, “Balae tih kai koca te ming na ngaih?” a ti nah.
Tedae Tobit loh, “Manuca nang, nang u capa nim, na ming u nim? ti khaw rhep ming ka ngaih tih,” a ti nah.
13 “Kai tah namah huiko, Hanaiah puei kah capa Azariah ni,” a ti nah.
14 Te dongah Tobit loh anih te, “Manuca nang kan uem, Pathen loh n'khang coeng. Kai taengah olkhaa lamkhaw poek boel mai ne manuca. Kai tah nangkah a khuui te rhep ming ka ngaih. Te dongah ka huiko la na om khaw, hlang then neh hlang rhoei rhuirhong la na om khaw thui lah. Shemeliah ca rhoi Hananiah neh Nathan te ka ming ta. Amih rhoi te kai neh Jerusalem la ka puei tih tho ka thueng uh ta. Longpuei khaw a phaelh rhoi moenih. Nang tah pilnam then kah huikoi pai nih. Nang tah bawn then khui lamloh na lo pai. Thinko boeih neh kan uem,” a ti nah.
15 Te phoeiah, “Nang te hnin at thapang la drakma pakhat kam paek bitni. Namah neh ka capa loh na hnonah rhoi ham khaw. Te phoeiah na thapang khaw bet kan tom bitni,” a ti nah.
16 Raphael loh, “Anih te ka caeh puei bitni. Sading la ka cet rhoi vetih sading la ka mael bitni. Longpuei khaw a dingsuek la om om,” a ti nah.
17 Tobit loh anih te, “Manuca nang soah yoethennah om saeh,” a ti nah.
Te phoeiah a capa te a khue tih amah taengah, “Ka capa, longpueng hamla lampu cun lamtah na manuca neh hlah uh saeh. Vaan dongkah Pathen loh te lamte sading la n'khuen saeh. Kai taengah sading la ha mael. Ka capa nang te amah kah puencawn loh longpuei tah sading la m'puei saeh,” a ti nah.
A caeh hamla a tong vaengah a manu a napa te a mok. Tobit loh anih te, “Longpueng ah sading la ne,” a ti nah.
18 Tedae a manu tah pahoi rhap tih Tobit te, “Balae tih camoe te vik na tueih. Anih la mah rhoi loh n'conghol nah tih, mamih hmai ah a caeh moenih a?
19 Tangka so tangka koep poep boeh. Te te mah ca kah tlansum la om mai saeh.
20 BOEIPA loh mamih rhoi hingnah m'paek he tah mamih rhoi ham rhoeh coeng,” a ti nah.
21 Tobit loh anih te, “Mawn boeh; mah ca te tah sading la cet tih, sading la ha voei bitni. Sading la ha voei vaengah khaw na mik loh a hmuh bitni. Thui voel boeh. Amih rhoi ham khaw mawn boeh ka ngannu.
22 Puencawn then loh anih a puei vetih a yincaeh khaw thaihtak bitni. Te dongah sading la ha voei bitni,” a ti nah.