6
1 Te dongah a rhah khaw vik a toeng
Rages La Caehnah
Cadong te a caeh van neh puencawn khaw anih taengah cet.
2 Te vaengah a taengkah ui te halo tih amih rhoi te a caeh puei. Te phoeiah longpuei te phat te uh. Lamhma cuek hlaem ah amih rhoi te Tigris tuiva ah rhaeh rhoi.
3 Te vaengah cadongah suntla tih Tigris tuiva ah a kho a silh. Te vaengah nga a lennu te tui khui lamloh a cungpet tih ca dongkah a kho te dolh hamla a cai dongah anih khaw pang.
4 Tedae puencawn loh cadong, “Nga te kop lamtah dingkoei pah,” a ti nah. Te dongah cadong pa loh nga te a kop tih lan so la a voeih.
5 Tedae puencawn loh cadong te, “Nga te phak boe lamtah a kuel, a then, a hmuet te loh pah. Te rhoek te namah taengah khoem. A rhil te voei. A hmuet, a thin, a kuel te si la hnonah om,” a ti nah.
6 Te dongah cadong pa nga te phak a boe tih a hmuet, a thin neh a kuel te a loh. Te phoei ah nga te a hak. Rhakthuem te a caak tih rhakthuem te baek hamla a khueh. Te phoeiah tah amih rhoi khaw a caeh longpuei ah phat cet rhoi tih Media neh a yoeinah ah om rhoi coeng.
7 Te vaengah cadong pa loh puencawn te a dawt tih, “Manuca Azaraih, nga kah a hmuet, thin neh a kuel dongah mebang si nim ca aka om?” a ti nah.
8 Te dongah, “Rhai neh mueihla thae loh a hnaem taek tongpa khaw, huta khaw a hmai ah nga ka a hmuet, a thin ne a kut a khu la hlut pah. Te vaengah tloh te vil yong vetih te kah hlang taengah koep om voel mahpawh.
9 Hlang mik te khomai loh a cun vaengah nga hmuet nen te koelh pah. A khomai so ah ueng pah lamtah a mik te hoeih bitni,” a ti nah.
Raphael kah Uentonah
10 Media la a kun neh Ecbatana a yoeinah la om coeng.
11 Te vaengah Rhaphael loh cadong pa te, “Manuca Tobias,” a ti nah. “Heah ka om,” a ti nah van. Te phoeiah tah Raphael loh anih te, “Tihin hlaem tah Raguel im ah n'rhaeh rhoi pawn ni. Anih he mah huiko la om. Anih he canu pakhat Sarah a sui te a khueh.
12 Sarah bueng phoeiah tah canu a tloe, capa a tloe khaw anih loh a khueh moenih. A napa kah khuehtawn aka pang te nang ham khaw then coeng. Te phoeiah he hutah cueih, a rhal then, a hlang bahoeng then tih a napa khaw hlang then la om,” a ti nah.
13 Te phoeiah, “Anih na yuunah te boeih thuem coeng. Te dongah ka mana nang, kai ol he hnatun. Hlaem ah huta kawng te a napa taengah ka thui bitni. Te vaengah anih he nang ham nungak la khuet sieh. Rages la m'mael vaengah anih lueinah te saii saih. Raguel loh nang ham te hloh loengloeng mahpawh tila ka ming. Moses cabu dongkah oltloek bangla dueknah oltloek a om pawt tah anih te a tloe ham kam pa mahpawh. Anih loh nang te hlang tloe boeih lakah rhep m'ming ta. A canu yunah sak ham khaw a moeh ta. Te dongah kam mana nang hnatun. Hlaem ah huta kawng te thui sih lamtah bae hamla khueh sih. Te dongah Rages lamloh m'mael vaengah khaw anih te mah rhoi loh nang imla khuen sih,” a ti nah
14 Te vaengah Tobias loh Raphael te, “Ka maya Azariah, anih te a va voei rhih a sak dae yulueinah imkhan ah pahoi duek tila ka yaak coeng ta. Hlaem ah anih te aka kun tah duek ni ta. Rhaithae loh amih te a ngawn tila pilnam loh a thui khaw ka yaak ta.
15 Amah soah tah a thae khaw saii pawt dae anih taengah caeh aka ngaih boeih te a ngawn. Te dongah, kai a pa loh capa khat bueng lamni ng'khueh. Kai tah ka rhih. Ka duek vetih a pa neh a nu te phuel la ka suntlak sak ve. Kai ham a rhap rhoi koinih aka vuei ham capa a tloe a khueh rhoi moenih,” a ti nah.
16 Tedae Raphael loh anih te, “Na pa kah oluen dongah, na yuu te napa imkhui kah mah lo,’ a ti te na poek pawt nim? Ka mana, kai ol he hnatun lam te rhaithae kawng te vawk thui boeh. Anih na loh ham te thuem coeng. Na yunah ham khaw paek la om bitni.
17 Lueinah im khan la na kun vaengah nga kah a kuel neh a thin te bet khuen lamtah imkhan kah botui dongah khueh.
18 A hmuehmueih te a rhim vaengah rhai te a uet vetih yong bitni. A taengah khaw na hmuh voel mahpawh. Anih neh thingkong dongla na yalh tom vaengah lamhma la bok pai rhoi lamtah thangthui rhoi. Vaan kah BOEIPA te hloep lamtah nangming rhoi taengah rhennah neh sadingnah m'paek bitni. Mawnnah khueh boeh, diklai a saii hlan lamloh anih te nang ham ni a hmoel coeng. Anih te khang lamtah anih te nang taengah pongpa saeh. Anih rhangneh nang khaw ca na sak bitni ka ti. Amih rhoek te nang ham manuca la om bitni. “Moenih,” ti voel boeh,” a ti nah.
Tobias loh Raphael ol te a yaak vaengah anih te a cako ni tila a ming. A napa kah rhuirhong neh khaw a pha uh dongah anih te bahoeng muep a lungnah tih a thinko boeih anih taengla a hong.