4
Tobit loh A Capa A Uen
1 Te vaengah Tobit loh Media Rages kah Gabael im ah tangka a khueh tih a caeh tak te a poek.
2 Te dongah amah te, “Kai tah dueknah ham ka bih. Balae tih ka capa Tobias te ka khue pawh. Ka duek hlan tangka kawng te anih taengah ka thui dae mako,” a ti.
3 Te phoeiah a capa Tobia te a khue. A taengla a caeh vaengah anih te, “Ka capa ka duek vaengah rhok a then hang khoem, na nu te a hing tue khuiah hno boeh. A kongaih boeih te tah vai pah lamtah anih te kothaenah khat khaw pae boeh.
4 Ka capa aw, anih te anih ngai thuen. A bung khuiah na om vaengah nang hamla la rhainah muep a tong. A duek vaengah khaw hlan pakhat dongah kamah taengah up.
5 Ka capa aw, na hing tue khuiah BOEIPA te hinyah, tholh ham neh a olpaek aek ham khaw ngaih boeh. Halang rhoek kah longpuei ah pongpa boeh
6 Oltak dongah aka saii rhoek boeih tah a saii boeih dongah thaihtak ni. Duengnah aka saii rhoek boeih te khaw.
7 Na khueh tawn te paek hamla na ban te thueng. Kutdoe na paek vaengah na mik te mike voel boeh. Khodaeng taeng lamloh na mik te a tloe la hoi boeh. Te daengah ni Pthen te nang taeng lamloh a mael pawt eh.
8 Khuehtawn te muep na khueh atah te khuilam kah te kutdoe hamsum khueh. Yol sitoe cakhaw, a yol te paek hamla rhih boeh.
9 Te daengah ni na kueknah hnin ah tah namah hamla kawn then na tung eh.
10 Doedannah long tah dueknah khui lamloh a hlawt tih khohmuep la aka cet khui lamloh nang n'hlawt.
11 Doedanah nah aka boeih ngawn tah tah Khohni ka mikhmuh ah kutdoe thenkoek la om coeng.
12 Ka capa kaw, cukhalhnah cungkuem he tah rhalrhing ne. Lamhma cuek la na pa rhoek kah a yuunah khui lamkah a tiingan boeih te. Kholong nu khaw yunah boeh. Amih te na pa rhoek kah koca moenih. Mamih he tah tonghma koca ni. Ka capa aw, Noah, Abraham, Isaak neh Jakob te poek. Mamih napa rhoek tah patong uh coeng. Amih boeih long amah huiko khuikah ni a yunah uh. Te dongah a ca rhoek khaw yoethennah om tih a khohmuen te rho la a pang.
13 Te dongah ka ca aw, na manuca te lungnah laeh. Na huiko taengah na thinko thah sak boeh. Na pilnam kah canu neh capa rhoek taengah khaw. A mih lamkah te namah yuu la loh ham hil ah khaw. Kohangnah he tah pocinah neh kopoek paekboenah la muep om. Thangak dongah khaw hlongnah neh khodaeng la om. Thangak he tah khokha kah a manu la om.
14 Na bi aka bi kah thapang te a vuen duela khoem pah boeh. Pahoi pae laeh. Pathen taengah na thohtat ah thapang na dang bitni. Ka capa aw, na saii boeih dongah khaw namah ngaithuen. Na omih boeih dongah khaw namah toel uh.
15 Namah loh na thiinah te tah pakhat taengah khaw saii boeh. Misur tui khaw a pueh la o boeh. Na rhui doela longpuei ah cet boeh.
16 Na buh te bungpong taengah bet pae. Na himbai khaw pumtling taengah bet pae. Na kut dongah a baecoih la boeih pae. Na kut loh a paek coeng tah na mik loh koep mike boel saeh.
17 Na buh te hlang dueng kah phuel ah khaw tawn mai saw. Te dae hlangtholh rhoek tah pae loengloeng boeh.
18 Hlang cueih taengkah cilsuep te tlap lamtah hnonah koi poeknah te tah sawtsit boeh.
19 A tue rhoepsaep ah khaw Pathen te uem. Te vaengah amah te dawt lamtah na longpuei te a dueng la han saii saeh. Te daengah ni na caehlong boeih neh na poeknah khaw a thaihtak eh.
Yakmingnah aka khueh ram he a om pai moenih. Tedae BOEIPA amah long ni amih te poeknah then khaw a paek. Te cakhaw a tloe a tuek atah a mah loh Saelkhui kah laedil la anih te a voeih. Te dongah ka ca aw, he kah olpaek he poek lamtah na lungbuei lamloh te te phae hamla saii boeh.
Gabael Taengkah Tangka Khueh
20 Ka capa aw, Media Rages kah Gabrias capa Gabael taengah tangka talen parha ka khueh te nang taengah kan thui mai pawn eh.
21 Ka capa khaw khodaeng la ng'om uh akhaw rhih boeh. Pathen te na rhih atah boeinah a lenkoek na khueh ni. Te dongah tholnah cungkuem lamloh yong lamtah BOEIPA na Pathen mikhmuh a then mah saii laeh.