3
Tobit Kah Thangthuinah
1 Te vaengah muep kothae neh ka thinko khaw thiip tih ka rhap. Ka rhungrhah neh thangthui hamla ka tong;
2 BOEIPA namah tah duengnah la na om tih, na khoboe boeih khaw a tiktam la om. Na longpuei khaw sitlohnah neh oltak la om, namah loh diklai khaw lai na tloek tih.
3 Te dongah aw BOEIPA, kai he m'poek lah, Kai he kolo la n'so lah. Ka tholnah neh ka poek mueh kah boei thai boeih khaw han cawh boel mai. Te rhoek te a pa rhoek loh na mikhmuh a saii uh. Nang taengah tholh uh coeng tih, m
4 Na olpaek te ngai uh pawh. Te dongah kaimih ta aka poelyoe taengla, tamna neh dueknah ongah nan voeih, Te dongah hlang aka thui la, ol la, kokhahnah la ka om uh. Namtong boeih taeng khaw kaimih he nan taekyaak.
5 Namah kai tlaitloeknah tah muep thuem coeng, Kai lamkah ka tholnah dongah cawhnah khaw buelh thoeng coeng. Na olpaek te ka tuem uh pai pawt tih, Na mikhmuh ah oltak dongah khaw ka pongpa uh pawh.
6 Te dongah na kongaih bangla kai taengah saii, Kai lamkah ka mueihla he loh hamkhaw ol pae mai. Te daengah ni laipi la aka om kai he diklai maelhmai lamloh ka daem eh. Kai hamtah hing lakah duek he ni hnothen la a om mai coeng. A tingtawk pawt kah kokhahnah khaw ka hnatun mai coeng. Ka khuiah kothaenah muep hah coeng. Aw BOEIPA, ol pae lamtah he citcai lamloh ka loeih mai eh. Dungyan im la caeh ham kai n'hlawt lah. Aw BOEIPA, na maelhmai te kai taenglam loh mangthung boeh. Kai hamtah duek he hnothen la om mai coeng. Te dongah ka hingnah citcai he muep ka hmu lah ve kokhahnah he ya lah ve.
Sarah A Khotohnah Tholh
7 Te khohnin ah Media kah Ecbatana ah Raguel canu Sarah kah kawng khaw om bal. Anih te a napa kah salnu loh a soehsal.
8 Anih te a va parhih a khueh. A yuu kah khosing bangla anih te a khueh uh coeng dae amih mikhmuh ah rhaithae halang Asmodes loh boeih a ngawn pah. Te dongah anih te salnu loh, “Na va rhoek aka ngawn khaw nang ni. Va parhih na khueh dae amih khuikah pakhat ming ham khaw ca na sak pah moenih.
9 Balaetih kai mih nan boh? Na va rhoek te a duek dongah nim? Amih taengla cet laeh, na canu neh na capa khaw ka hmuh uh voel boel mai eh,” a ti nah.
Sarah kah Thangthuinah
10 Te khohnin ah anih te mueihla neh nguekcoi tih rhap. Te phoeiah anapa kah imhman la luei tih amah kuiok ham cai. Tedae amah te poek uh tih, “A pa te kokhahnah uh voel boel saeh. A nih te, ‘Canu oingaih cangloeng la na khueh dae a ngaihmang ah mah kuiok coeng,’ ti uh lah ve. Te dongah a pa te a patong soi ah kothae neh saelkhui la ka suntlak sak lah ve. Ka kuiok pawt he kai ham hnothen la om coeng. Tedae BOEIPA taengah ka thangthui vetih ka duek mai bitni. Te vaengah he kokhahnah ka ya voel mahpawh,” a ti.
11 Amah te vaengah a kut te bangbuet ah a doh tih thangthui. Te vaengah, Rhennah Pathen namah tah na yoethen pai, Na ming khaw kumhal duela a yoethen pai, Na bibi boeih loh namah te kumhal n'koeh pai saeh.
12 Te dongah BOEIPA nang taengla maelhmai ka hoi coeng,
13 Ka mik khaw saeh namah taengla kang huel coeng Diklai lamloh ka daem ham ol pae laeh Te bang kokhahnah te ka ya voel boel eh.
14 Aw Boeipa, ka ommongsitoe he na ming coeng, Hlang aka poeih khui lamloh khaw,
15 Ka ming he ming thae ka khueh moenih, Ka vangsawn khohmuen kah a pa ming he khaw, Kai tah a pa kah khuehduen ca la ka om, Anih loh a pang ham camoe khaw om pawh, Anih loh huiko neh cakoparhaeng a khueh moenih, U long nim kai n'yunah lah ve? Ka va parhih la rhen duek uh coeng. Balae ka hing thil eh? Te ni na ngaih pawt oeh atah, BOEIPA aw, ka hingnah he lo mai Kai kah yahpohnah he hnatun lah,”
Thangthuinah A Rhoi Pah
16 Te vaengah amih rhoi kah thangthui nah te vaan ah Pathen mikhmuh ah thangpomnah la a yaak pah.
17 Te dongah Rhaphael te a tuei pah tih amih rhoi te a hoeih sak. Tobit te khaw a mik dongkah a lip te a khoe pah. Te phoeiah tah Pathen kah vangnah te amik neh a hmuh. Raguel canu Sarah te khaw Tobit capa Tobias neh yuva rhoi ham a pae. Te dongah halang rhaithae Asmodeus taeng lamloh loeih sak a khueh. Anih yunah aka ngaih boeih khuiah khaw Tobias loh anih te a ngaih. Te vaengah Tobit te kohong lamloh im la mael. Raguel canu Sarah khaw imhman lamloh suntla.