8
1 Amah loh kai n'doo tih, “Khohni loh lunglai he a yet ham ni a saii tedae lunghai he tah a yol ham bueng ni a thoeng.
2 Tedae nang taengah thuidoeknah kan thui Ezra. Diklai te dawt lamatah lai-am a saii te amlai a hlom meyet ha lo khaw a thui bitni. Laipi a yol mai lam loh sui a thoeng he khaw tahae kah lunglai long ni a coeng sak.
3 Te dongah muep suen mai cakhaw a yol ni a daem eh,” a ti.
Ezra kah Huithuinah
4 Te vaengah ka doo tih, “Ka hinglu aw o lamtah yakmingnah khaw hah lah. Ka thinko aw cueihnah te o lah.
5 Namah rhangneh lunglai dongla na lo pawt tih, namah taeng lamloh na khoe uh bal pueng ni. Na khosak a toi ham ni nang te dawk m'paek coeng.
6 Kaimih sokah Boeipa aw, na sal he n'rhen lamtah na mikhmuh ah ka thangthui uh mai eh. Kaimih thingko ah cangti m'pae lamtah ka yakmingnah he ka cilpoe uh eh. Te daengah ni a thaih khaw a thaih eh. Te vaengah pumsa boeih long he hlang mueimae phuei saeh lamtah hing uh thai van saeh.
7 Na mah he dawk na om coeng tih na thui bangla kaimih khaw na kut dongkah kutci la ka om uh.
8 Hingnah na paek ka pum he khaw bungko khuiah ni na hlinsai coeng tih a pumrho te na soep sak. Tui neh hmai lakli ah khaw balae na saii tih na khoem? Hlang he bungko khuiah hla ko na khueh tih, a khui kah na suen tangtae na suen tae rhoek te na ueh.
9 A khoem neh a khoem tangtae khaw namah khoembaelnah long ni bok a khoem. Bungko loh koep a paek tih a khuiah a suen vaengah khaw.
10 Amah pumrho lamkah te khaw ol na paek. (te a rhang lamkah khaw om), suktui khaw, a rhangsu lamkah a thaih khaw na paek sak.
11 A tue voeikhat kah hilsangnah ham khaw balae a hlinsai coeng. Tedae na lungvatnah dongah na hoihaeng pueng ni.
12 Te te na duengnah dongah na khut coeng tih na olkhueng neh na thuituen, na cueihnah neh na toel.
13 Na saihluen la te tah dueknah la na khueh tih, na kutci la a hingnah na khueh.
14 Na olpaek rhangneh thatloh la na hlinsai te, koeloe pahoi na phae koinih, na saii te balae na mangtaengnah?
15 Te dongah pong ka thui pawn lah eh. Hlang kawng boeih khaw a then la na ming. Tedae na pilnam kawng ni ka thui eh. Amih ham ni ka nguekcoi.
16 Na rho kawng dongah amih ham ni ka rhangsae. Israel kawng dongah amih ham kothae. Jakob tiingan dongah amih ham ni ka ngai a hmang.
17 Te dongah na hmaiah he kamah ham neh amih ham ni ka thangthui eh. Diklai khosa khuiah kaimih kah ka hlonah khaw ka hmuh coeng.
18 Laitloeknah a loenah khaw ha pai ham khaw ka yaak coeng.
19 Te dongah ka ol he hnatun lamtah ka olka he yakming laeh, na mikhmuh ah ka thui pawn eh,” ka ti.
Ezra Thangthuinah
Ezra kah ol a tongnah cuek ah a thangthuinah loh Boeipa hmai a pha coeng.
20 “Aw, Boeipa namah tah dungyan khosa ni, na mik khaw a pomsang, na imkhan khaw khohli soah,
21 na ngolkhoel khawng cungnueh kah a voelah, a thangpomah thuidoeknah voel ah, a hmai ah puencawn caempuei loh thuennah neh aka pai,
22 khohli te hmai la poeh sak ham ol aka pae, a ol paek khangmai tih a oltloeknah rhih aka om,
23 a dungnah khaw a rhae la aka hmuh tih a noihhainah loh tlang boeih aka tlae sak, a oltak aka thoh yoeyah,
24 Boeipa aw na sal kah thangthuinah he hnatun lah, na suentae kah huithuinah dongah hnatung lah, ka ol dongah hnakaeng lah.
25 Ka hing khui ah ka thui vetih, ka yakmingnah khuiah tah kan doo ni.
26 Na pilnam kah tholhnah te so boel mai ne, na oltak dongah aka thotat rhoek te hmu lah.
27 Halang la kho aka boe rhoekkah thathohnah te kopoek ah khueh boel mai. Tedae citcai khuiah na paipi aka tuem rhoekkah thathohnah te mah khueh pah.
28 Na mikhmuh ah halang la kho aka sa rhoek te poek boel mai. Tedae namah tah a hiin om tila aka ming rhoek te ham poek.
29 Saelhung kah khosing la aka om rhoek kah pocinah te ngaih boel lamtah, na olkhueng kah thuituennah aka thangpom rhoek te ham poek lah.
30 Rhamsa aka lueng lakah a thae la aka muei rhoek taengah thintoek sak boel lamtah, na thangpomnah dongah pangtungnah aka khueh rhoek te lungnah lah.
31 Kaimih neh a pa rhoeng long tah dueknah la aka khuen longpuei te ka hingnah loh a poeng coeng. Tedae kaimih hlang tholh loh namah te rhennah kang khue uh dongah ni.
32 Kaimih he lungma na ti mai koinih, ulaeng hlang dueng bibi aka om tih lungma na ti na eh?
33 Namah dongah bibi muep aka khueh hlang dueng ham tah, a khoboe kah maitlet lamkhaw a thapang te doe van saeh.
34 Tedae pumsa hlang rhoek tah, amih taengah na sai coeng tih, aka poci koca rhoek khaw a taengah a khahing la na om bang aih nim?
35 Te dongah hetah oltak coeng ni, boethae la kho aka boe mueh he, aka thang tangtae la pakhat khaw a om mueh moenih. Aka om lakli ah khaw tholh aka saii mueh he a om moenih.
36 Te dongah Boeipa aw, na duengnah neh na thennah tah doek uh pai saeh. Bibi then tunghlaepnah aka khueh mueh rhoek taengah rhennah la na om vaengah he,” a ti.
Ezra kah Thangthui Hlatnah
37 Amah loh kai n'doo tih, “Cungvan ngawn tah thuem, na ol bangla a tarhing ngawn tah mael ni.
38 Kamah ngawn tah aka tholh a hlisainah kawng khaw, a dueknah kawng khaw, a laitloeknah khaw, a cungkungah khaw ka ngaihuet pawh.
39 Tedae hlang dueng a suennah, a yincaehnah, amih khangnah, a thapang a doenah dongah ni ka omngaih eh.
40 Te dongah ka thui taengtae he thoeng van saeh.
41 Lotawn loh diklai ah cangti muep a tuh tih a mupoe soeprhaep khaw a ling. Te lalah pataeng khoning loh a tuh te boeih poe sak pawt tih a ling boeih khaw a yung sai pawh. Te dongah diklai ah a tuh boeih khaw boeih daem mahpawh,” a ti.
42 Ka doo tih, “Na mikhmuh ah he kolonah ka dang atah, ka thui mai eh.
43 Lotawn kah cangti a poe pawt khaw, khoning tuetang ah rhotui dang pawt maco, rhotui muep a tlang aih dongah cangti khaw boeih poci mai maco.
44 Tedae pilnam tah na kut neh na hlinsai tih, namah phek la na saii dongah namah mueiloh la na khue. Amih ham te a cungkuem a hlinsai coeng, a mih te lotawn kah cangti banghui la na khueh.
45 Te pawt nim aw Boeipa. Tedae na pilnam te hlun lamtah na rho te rhennah khueh mai saw. Namah kah suentae ongah rhennah na khueh te ta.
A Hnukkhueng kah Rhenbihnah
46 Amah loh kai n'doo tih, “Mikhmuh kah hno aka om te tah tahae kah aka hing rhoek ham tih, hmailong kah te tah tahae lamkah aka hing rhoek ham ni.
47 Nang tah ka suentae he kai loh ka lungnah lakah lungnah thai ham a yoei la pal na thui. Tedae namah ngawn neh aka dueng pawt rhoek vawk na thuidoek. Te tlam moenih oe.
48 He hinyahnah rhangneh Khohni hmaiah a tingtawk la na om bitni.
49 Namah ham a thoeng van bangla namah na kunyun coeng. Hlang dueng la namah na ngai pai moenih. Thangpomnah a lenkoek na dang bitni.
50 Citcai te yet long te a hnukkhueng khohnin ah tah lunglai kah khosa rhoek boeih a pha ni. Amih te koevoeinah a len neh pongpa uh coeng.
51 Na dumlai te poek lamtah, namah bangla aka om rhoek kah thangpomnah kawng khaw cae lah.
52 Nang hamla pradai te a ong coeng. Hingnah thingkung khaw a ling. Hmailong kah diklai tue ham a rhoekbah coeng. Khobuh la a khueh tih khopuei a sak coeng. Duemnah khaw a khueh coeng. Hnothen khaw a thoh tih, cueihnah khaw sikim la a pom coeng.
53 Boethae kah a yung tah nang lamloh khoep a tlaeng coeng, tloh khaw nang lamloh a khoe coeng, dueknah khaw a thuh coeng. Saelkhui khaw yong coeng tih pocinah khaw a hnilh coeng.
54 Kothae khaw a poeng coeng, a bawtnah dongah dungyan ca rhoekkah kawn te khaw mingpha la a khueh coeng.
55 Te dongah muep aka poci kah hlangmi a yetnah kawng te koep n'dawt voel boeh.
56 A tueknah tue a om vaengah Khohni te a hnoel uh tih, a olkhueng te a palet uh, a khosing te khaw a hnawt uh coeng.
57 Te phoeiah a hlangdueng pakhat te khaw a suntlae uh.
58 A thinko nen tah, ‘Pathen om pawh,” a ti uh. A duek uh kuekluek ham khaw phaeng a ming uh dae ta.
59 Ka thui tangtae bangla nang n'rhing coeng. Te dongah tuihalh neh phaepnah a khueh loh amih a rhing coeng. Khohni loh pakhat ca khaw phae hamla cai pawt dae ta.
60 A suen rhoek khuiah kah long khaw amih aka saii kah ming te amamih loh a poeih uh. Amih hamla hingnah aka hmoel te khaw yah a bai uh coeng.
61 Te dongah a yoei takek la om coeng.
62 He he pilnam boeih taengah ka tueng moenih. Te dae nang neh namah bang hlang sii taengah ka tueng.
63 Te vaengah ka doo tih, “Boeipa aw, kai taengah miknoek khaw a len khaw muep nan tueng coeng. A hnukkhueng ah te a saii ni, kai he boeih nan tueng pawt dae, na saii ngawn bitni,” ka ti nah.