7
Ezra Ol Hlatnah
1 Hekah ol ka thui bawt vaengah hlaemvai yiin kah puencawn han tueih te kai taengla koep han tueih.
2 Anih loh kai te, “Thoo, Ezra, na taengah ol thui hamla ka lo coeng tih, hatun laeh,” a ti.
3 “Ka Boeipa, thui laeh,” ka ti nah.
Te vaengah kai te, “Tuitunli khaw hmuen a yaai dongah ni a dung tih a ka.
4 Tedae a vongka tah caek tih tuiva bangla om.
5 Tuitunli la pha aka ngaih long tah te te a sawt tih a hlaikan. Longcaek te a poeng pawt atah a dangka hmuen te metlam a pha eh?
6 Thuinuetnah pakhat tah, khopuei pakhat omtih kolvan ah a thoong uh. A khuiah hnothen khaw boeih cungkuem.
7 Tedae vongka tah a caeknah neh caehthae ah ni a khueh. Te dongah bantang ah hmai neh banvoei ah tui dung a khueh.
8 Te rhoi laklo ah caehlong pakhat ni dawk a om. Tui neh hmai laklo ah a om dongah tekah caeh long ah hlang khat ni dawk a caeh thai.
9 Khopuei te hlang khat taengah rho la phaeng koinih, te kah muei rhih long te a pah mueh ah metlam lae khopuei te a dang eh,” a ti.
10 “Thuem ngawn Boeipa,” ka tinah hatah,
Anih loh kai te, “Israel kah khoyo khaw tlam van ni.
11 Lunglai he amih ham la ka saii. Adam loh ka olrhi a poe vaengah tah laitloeknah te om van coeng.
12 Te dongah diklai vongka khaw a caek la, kothae, patangnah la a khueh. Amih a yol loh a thae khaw, mueirhih khaw, rhainah a len khaw a tong uh.
13 Te phoeiah ni aka len ngai lunglai kah vongrhai te a om pueng. Te tah longpuei ka tih dingsuek, hingcim kah a thaih khaw thai.
14 Te dongah rhainah pah tih, thingthuel tongnah dongah n'caeh hlan atah, amih ham a tung hno te dang hamla a coeng moenih.
15 Balae tih na ingang sut? Na poci coeng te so nawn? Balae tih na thoeih, nang hlang mailai ni tila ming.
16 Na lungbuei long khaw balae tih aka thoeng ham te tahae kah nawn lakah a poek pawh?” a ti.
Lailak kah Hmailong
17 Te vaengah ka doo tih, “Tloengkhoelh Boeipa aw, he hlangdueng loh pang saeh lamtah lailak tah milh saeh, tila olkhueng na cak sak.
18 Te cakhaw thayoei-tuipan rhoek loh a ngaiuep uh vaengah aka dueng loh kaepvai kah rhainah a ueh aya? Halang ka aka saii rhoek loh rhainah khaw a yook vetih, thaiyoei-tuipan rhoek khaw phoe pawt mako” ka ti nah.
19 Anih loh kai te, “Boeipa lakah laitloekung then la na om a? Khohni lakah na cueih a?
20 Amih mikhmuh ah Pathen kah olkhueng yah a bai lakah tah tahae kah aka hing rhoek khaw muep milh uh ngawn saeh saw.
21 Diklai la aka lo boeih te boeipa loh rhep a uen coeng. A hing ham te metla a saii ham khaw, dantatanah rhael ham metla a tuem uh ham khaw.
22 Te lalah hnatun uh pawt tih amah taengah cal uh bal pueng.
A poeknah hinghong neh amamih vuelvaek uh,
23 A lolh neh halang la amamih te canot uh,
Khohni pataeng khaw om pawh a ti uh,
Boeipa kah khosing te a hnoelrhoeng uh,
24 A olkhueng te a soehsal uh tih,
A paipi te khaw a aal uh,
Boeipa kah oltlueh soah hnukpoh uh tih,
a bibi dongah a bisai khaw khueh u pawh.
25 He dongha ni, Ezra, a hong te a hong ham, a tak te a tak ham a om van.
Messiah kah Ram
26 A tue ha pai ngawn bitni, nang taengkah minoek ka thui te khaw a khum vaengah, tahae kah khopuei aka tueng pawt khaw phoe vetih, khohmuen a thuh li he khaw a phoe ni.
27 Yoethae kawng ka thui boeih khui lamloh a hlawt hlang rhoek long tah kaikah khobae rhambae te a hmuh ni.
28 Ka capa Messiah tah amah khuikah aka om rhoek te ha phoe ni. Amih rhoek tah kum yakhat khui omngaih la om uh ni.
29 Tekah kum phoeiah tah ka capa Messiah te duek vetih hlang kah a hilnah boeih a doek ni.
30 Te phoeiah lunglai he suen kah bangla poeh vetih hnin rhih khuiah sap duem ni. Te khaw a tongcuek kah bangla om vetih pakhat khaw sueng mahpawh.
31 Hnin rhih phoeiah khaw lunglai he a haenghang ham khaw haeng hlan vetih aka poci thai boeih tah milh ni.
32 Diklai loh amah dongah aka ip rhoek te, laipi long khaw amah dongah sipdip la aka duem rhoek te koep a paek ni. Im khan long khaw amah dongah hinglu a paek rhoek te koe a paek ni.
33 Khohni tah laitloeknah ngolkhoel dongah ngol ha phoe ni. Te vaengah thinphoei lungvat khaw khum vetih, thinsen khaw a voeih ni.
34 Laitloeknah te naeh vetih oltak te pai ni, uepomnah khaw khangmai la rhoeng ni.
35 Dantatnah te ha bang vetih kuthungnah khaw phoei ni. Khoboe dueng te haenghang vetih khoboe aka dueng pawt khaw ip mahpawh. Phaepnah tangrhomha thoeng vetih a rhaldan ah duemnah hmuen om ni. Hell dongkah hmai ulh a dah pawt vaengah paradai kah a then tah paa tlaih mahpawh. Te vaengah Khohni loh duek lamloh aka thoo namtom rhoek te, ‘So uh laeh lamtah na hnawt te ming uh laeh, amih taengah na thotat uh pawtnim? amih kah olpaek la na hnoel. He ben he bang ah khaw so uh lah, heah he damyalnah neh duemnah om, ke ben ah hmai neh phaepnah om. Te dongah amh loh laitloeknah hin te thui uh saeh. He khohni ah khomik khaw, hla khaw, ai si khaw tueng pawh. Khomai neh khophaa, khohum khaw om pawh, khohli, tui neh yilh khaw om pawh, khokhup, hlaemhmah neh mincang khaw om pawh. khohal khaw, lomai khaw, kholing khaw, sikding khaw, khomong khaw, khosik khaw, rhael khaw, khotlan khaw, buem khaw, khothun khaw, khoyin khaw, aikong khaw, khosaeng khaw, hmai-aa khaw, vangnah khaw ngoe pawh. Khohni kah thangpom rhuepomnah neh a om eh. Aka dil tangtae khaw boeih a hmuh uh ni. Te tah yaehnah kum la a hnukkhueng hil a poek ni. He tah ka laitloeknah la om tih oepsoeh ka soepsoei coeng. Te dongah he hno he nang ni dawk kan tueng.
Hlangsi Ni A Daem Eh
Ka doo tih, “Tloekhoelh Boeipa aw, I thui tangtae ni ka thui coeng. Hing tih na olpaek aka tuem rhoek tah a yoethen uh. Tedae ka thangthui pah rhoek te tah? Ka hing khuiah ulae aka tholh pawh?. Diklai hlang khuiah ulae na paipi aka poe pawh? Lunglai he omthen halo khaw yol vetih tlohtat a kum ni ka hmuh. Kaipi khuiah thinko boethae rhoeng tih te long te Pathen lamloh kaimih n'kholong puei. Kaimih he pocinah neh dueknah longpuei la m'mawt, cungkunah caehlong te kaimih n'tueng tih hingnah lamloh a hla la n'thak. Te a yolkai mai pawt tih a suen tangtae boeih te coeng ni.
Amah loh kai n'doo tih, “Ezra kai ol hnatun lah. Nang kan thuituen vetih koep kan thuinuet bal bitni. He kawng dongah Khohni loh diklai he pakhat bueng pawt ni panit a saii. Na thui bangla hlang dueng he yet pawt tnih yol, lailak khaw thawt dae ha thuicaihnah he mah hnatun dae lah.
Lungvang a yol na khueh koinih te rhoek te kawnlawk neh, paikaek neh na tom aya?” a ti.
“Ka Boeipa aw, te te metlam a coeng eh?” ka ti nah.
Amah loh kai te, “Kai bueng pawt tih, diklai na dawt dawt lamtah nang ham a thui bitni. A taengah tloeng pa lamtah amah loh nang taengah a thui bitni. Diklai te, ‘Nang loh sui, cak neh rhohum khaw, thicung khaw, kawnlawk neh amlai khaw na khueh. Tedae sui lakah cak, cak lakah rhohum, rhohum lakah thicung, thicung lakah kawnlawk, kawnlawk lakah amlai,’ ti nah. Te dongah melae a phu aka tlo neh ngaih aka om. Te dongah ke tah pul tih ke tah kha,” a ti.
“Tloeng khoelh Boeipa aw, me bangla aka pul tih a phu aka yol, me lae aka kha tih a phu aka tlo?” ka ti nah.
Anih loh n'doo tih, “Namah khaw thuep mai lah, balae na poek. A rhaicakue la aka dang tah a coipaek la aka khueh lakah omngaih ta. Te dongah ka olkhueh soah te khaw ka tang ngawn ni. A yol aka daem rhoek taengah khaw ka omngaih ni. Amih long ni ka thangpomnah a muekdah uh. A mih rhang neh kaming khaw a hiyahnah uh coeng. Hlangmi a yet aka poci rhoek ham khaw ka kothae pawh. Tahae ah maih te khomong banghui, hmaisai neh hmaikhui banghui ni. Amih te hmai ah a pup vetih ngawlngawl a ung phoeiah hma uh ni,” a ti.
Ezra kah Rhahlung neh Hlatnah
Ka doo tih, “Diklai aw, bang nim na thoeng sak? Lungbuei he a tloe suentae bangla laipi lamloh na saii koinih? Laipai amah he thang pawt koinih then ngai mai sue. Te lamlong te lungbuei he saii pawh mai lah sue. Tedae lungbuei he kaimih ah rhoeng tih kaimih m'phaep coeng. Ka poci uh dongah te khaw ka ming uh. Hlang hing he a ko a thae vaengah kohong kah rhamsa aka lueng khaw a kohoe uh. Kaimih khuikah lakah amih khuikah tah then ngai coeng. Amih tah laitloeknah khaw hmu uh pawh. Amih loh phaepnah neh dueknah hnukah amih ham khangnah olkhueh khaw ming uh pawh. A hing la ka om dae phaepnah a tloh la om te kaimih ham balae a hoeikhang eh? A cun tangtae rhoek khaw boethae dongah tinghil uh. Tholhnah hah uh tih boekoeknah loh a nan. Dueknah hnukah khaw laitloeknah khuila ka pawk uh pawt koinih, te khaw kaimih ham tah a then la om mai khaming,” ka ti nah.
Anih loh kai n'doo tih, “Khohni loh lunglai a saii vaengah Adam neh a cungkuem eh amah lamkah ha thoeng, amah loh laitloeknah neh laitloeknah aka yook ham hno te khaw a khueh coeng. Tedae namah ol lamkah te mah yakming laeh. Kaimih ah lungbuei he rhoeng na ti te. He poeknah dongah he, diklai dongkah khosa rhoek tah phaepnah a dang ni. Amih loh a yakming uh lalah boethae a saii uh. Olpaek a dang uh lalak tuem uh pawh. Olkhue a pom uh lalath a doe nawn khaw uepom la om uh pawh. Laitloeknah hnin ah tah balae a thui uh eh? Hnukkhueng tue vaengah la meltam a lan uh eh? Khohni loh diklai khosa rhoek soah mevaeng hil lae a ueh eh? A tue a khueh tangtae te amih ham moenih a?” a ti.
Laitloenah Hmaikah Dueknah
Te dongah ka do tih, “Na mikhmuh ah kolonah ka dang atah, na sal taengah he tueng sak lah. Dueknah hnukah tah, kaimih khuikah boeih ka hinglu ka hlah uh van bangla, na suentae koep na thai sak tue a pha hil atah ngaimong la ka khoem uh aya? Phaepnah a rhenten ka pha uh eh?” a ti.
Amah loh kai n'doo tih, “Te khaw nang kan tueng ni, tedae ka ho ham rhoek khuiah nang te ka thum sak mahpawh. Nanagmih lakli kah hlangmi tarhing la a hnaemtaek ni. Nang ngawn tah bibi kawnthen te Khohni taengah na tueng coeng. Tedae te te a hnukkhueng khohnin a pha hlan hil kan tueng mahpawh. Dueknah kawng neh kan cangpuei he, laithae ha lo vaengah Khohni kah oltloek te cet vtih tekah hlang te duek ni. Mueihla loh pum a caeh tak vetih aka pae kung taengla mael ni. A cungkuem boeih loh Khohni kah thangpomnah a bawk uh ni. Khohni kah khosing aka khoem pawt khaw, a olkhueng aka hnoel tih Pathen aka rhih aka thiinah rhoek tah a honah ni a tueng sak eh. Tekah mueihla rhoek tah khosa khuila khu pawt vetih, phaepnah khuiah ni pahoi pongpa uh eh. Yoeyah la nguek uh vetih a long parhih la kothae uh ni. Lamhma la amih loh Khohni kah olkhueng te a tluung uh. A pabae ah a hingnah te a then la yutnah a khueh uh moenih. A pathumnah ah Khohni kah paipi dongah aka pangtung rhoek ham a khueh thangpang te a hmuh uh ni. A palinah dongah a hnukkhueng khohnin ah amah ham a khueh phaepnah te hmu uh saeh. A panganah dongah atloe kah khosa rhoek tah bidip la puencawn loh a tawt te hmu uh saeh. A parhuknah dongah amih khuikah hlang vang loh phaepnah metla a poeng te khaw hmuh uh saeh. A parhihnah te ngawn tah a longpuei kan thuinuet khui boeih ah a thae koek la om. A hing vaengkah aka tholh rhoek mikhmuh ah Khohni kah thangpomnah te a hmuh vaengah rhihnah neh boeih hmawn uh ni. Te rhoek mikhmuh kah te a tue hnukkhueng vaengah laitloeknah om ni.
Khohni kah khosing aka tuem rhoek ham tah hekah oltloeknah he om coeng. Te vaengah pumsa kah pum lamloh paekboenah om pawn ni. Te vaeng tue ah tah amih te a khuiah hing uh vetih Khohni teangah thohtat hamla haam uh ni. Khonoek takuem ah mueirhih neh a pai thil daengah ni olkhueng paekung kah olkhueng te a tuem uh pai eh. Te kawng dongkah thuituennah tah he tlam he om ni. Lamhmacuek te rhoek aka doe tah a thangpomnah dongkah omngaihnah te a lenkoek la a hmuh ni. Amih tah oltloeknah parhih nen te mong uh ni. Oltloek pakhatnah; amih aka oel bathaenah boeih te ta ham la amih tah thingthuel uh. Te boethae loh amih te hingnah lamloh dueknah la taengphael ham aka mawt la om coeng dae ta. Oltloek pabae ah; lailak rhoek kah a hinglu pam tih dantanah loh amih a rhing vaengah mawn uh coeng. Oltoek a pathumnah dongah tah, amih aka hlinsaii loh amih kawng a phong vaengkah laipai kawng a hmuh tih, a hing khui amih dongah a a khueh olkhueng te a pai [puei uh. Oltloek palinah dongah tahae kah omngaih la a mong uh te khaw, a imkhui la a coi uh te khaw, ngaimong la a tawt uh te khaw, hnukhueng khohnin ah thangpomnah loh a rhing te khaw a ming uh. Oltloek a panganah dongah, amihtah pocinah khui lamloh loeih uh tih aka lo ham te a pang ham dongah omngaih uh coeng. Bohnah, thakthaenah a hmuh uh khui lamloh amih te a loeih sak coeng. A phu tlo loeih nah a dang uh tih dungyan pum dongah omngaih uh coeng. Oltloek a parhuknah dongah, amih kah maelhmai tah khomik kah a aa bangla sae vetih, aka pocithai pum rho mai te metlam lae aisi kah a vangnah bangla a aa co ti khaw tueng ni. Oltloek a parhihnah dongah a thui boeih khui laka ah tanglue koek la om uh tih, amih tah thinomnah neh a kohoe uh vetih limlum kolla a thincak uh ni. Tonga kolla a kohoe uh ni. A hing khuiah a thohthat thil uh a Boeipa kah maelmai hmuh ham a hmaila thoeih uh ni. A Boeipa taengah thangpomnah kudtoe dang hamla cet uh ni. He tah thui tangtae bangla hlangdueng rhoek kah hinglu ham oltloeknah ni. Thuinuet tangtae phaepnah longpuei te khaw he phoei lamkah tah amih taengah pae pawt vetih patang uh voel mahpawh,” a ti.
Te vaengah amah te ka doo tih, “Pum lamloh a paekboe phoeiah tah a hinglu te mevaengah khohnin ah lae na paek eh? kai taengah na thuinuet tangtae te hmuh hamla,” ka ti nah.
Amah loh kai taengah, “Amih loh hnin rhih khuiah sayalhnah a dang uh ni. Te hnin rhih khuiah tah nang taengkah kan thuinuet hno te boeih a hmuh ni. Te phoeiah tah amih te a khosaknah la tun tingtun uh ni,” a ti.
Lailak Ham Khaw Thangthui Voel Pawh
Amah te ka doo tih, “Na mikhmuh ah kolonah ka dang atah na sal kai taengah he koep n'tueng dae saw. Laitloeknah hnin ah tah aka dueng loh lailak ham rhi a khang vetih Khohni taengla amih kun venim? a napa rhoek loh a ca rhoek ham, a ca rhoek loh a manu napa ham, a huiko loh cakoparhaeng ham, paya rhoek loh a oingaih koek ham thangthui uh aya?” ka ti nah.
Amah loh kai n'doo tih, “Ka mikhmuh ah kolonah na dang coeng tih he khaw kan tueng bal bitni. Laitloeknah khohnin tah olhuep la om tih oltak loh kut-ha a khueh thil boeih taengah tueng ni. Tahae kah bangla a napa loh a capa,a capa loh a napa, a boei loh a sal, paya loh thintlo paya tueih voel mahpawh. He hmuen ah satloh khaw, ih khaw, caak ham khaw, hoeih ham ti khaw om mahpawh. Te khohnin ah tah hlang tloe ham thangthui ti om pawt vetih hlang soah hnorhih tloeng pah mahpawh. Amah amah kah duengnah neh duengnah pawt khaw rhip a phueih uh ni,” a ti.
36 Amah te ka doo tih, “Balae tih Abraham loh Sodom pilnam a thangthui pah, a pa Moses loh khosoek ah hlang tholh ham a thangthui te m'hmuh.
37 Akhan tue vaengah Joshua loh Israel ham thangthui bal.
38 Saul tue vaengkah Samuel, David khaw a lucik vaengah, Solomon te bawkim a nawn vaengah,
39 Elijah te loh khotlan a dangnah ham neh aka duek a hingnah hamla,
40 Sennakhrib tue vaengah Hezekiah loh a pilnam hamla thangthui ta, a tloe rhoek khaw muep thangthui uh ta.
41 Te cakhaw thaesainah khaw rhoeng tih hlangthae khaw pieng coeng. Hlang dueng loh lailak ham a thangthui pah lala balae tih a then a om tlaih pawh,” ka ti nah.
42 Amah loh kai n'doo tih, “Mikhmuk kah lunglai he bawt aih hlan ni, a khuiah thangpomnah khaw muep bae pueng.Te dongah thahnoeng rhoek ham khak thangthui uh.
43 Tedae laitloeknah hnin ah tah he dieklai tue a bawtnah pai vetih dungyan kah a tue te a pai pawn ni. Te vaengah boethaenah khaw boeih khum pawn ni.
44 Tholh pumdomnah khaw bawt pawn vetih aka tangnah mueh khaw a khoe ni. Hlang dueng khaw rhoeng vetih oltak he phoe pawn ni.
45 Laitloeknah hnin ah a boe cang te tah aka rhen thai kung pakhat khaw om mahpawh. Tanah dongah aka om coeng te kah khat long khaw nganboh pae thai mah pawh.
Pilnam hamla rhahlung
46 Ka doo bal tih, “He tah lamhma neh hnukkhung ka kamkaihnah coeng ni. Diklai loh Adam khaw khueh pawt koinih then palueng ni. Amah te a thoeng sak bal a tah tholhnah lamloh a tuengaep ka noek mako.
47 Kothae la aka hing boeih ham tah banglae a then bal pueng eh, a dueknah hnukah khaw dantatnah om bal.
48 Adam aw balae na sai mai? Na tholh sitoe cakhaw namah dongah dawk tla mai mako? Na cadil kaimih soah khaw boeih tla coeng he.
49 Kaimih hamtah balae a then bal pueng eh? Dungyan tue te kaimih hamla ol a khueh coeng dae, dueknah la aka thak ham khoboe ni ka saii uh coeng he.
50 Dungyan ngaiuepnah dongah ol na khueh te kaimih ham then a te? Tedae kaimih citcai la ka hloo uh coeng.
51 Kaimih hamla hil-uepnah eh sadingnah hmuen khaw na hoep coeng dae halang lam ni ka hing uh.
52 Hingnah tuicil la a mawt rhoek te Khohni kah thangpomnah loh a tungaep ni, tedae balae tih halang koek longpuei ah ka pongpa uh?
53 Paradai khaw tueng venim? teah ah aka rhong pawh thingthaih om tih, a khuiah hoeihnah muep cungkuem, tedae ka kun thai hae mahpawh.
54 Kaimih he longpuei paihaeh ah ni kho ka sak uh.
55 Pumsa cuenah aka khueh rhoek kah maelhmai tah aisi lakah khaw sae ngai dae kaimih maelhmai tah hmuep ai tih yin ngai coeng he.
56 Ka hing uh vaengah boethae ka saii uh tih dueknah hnukah ka yook ham khaw ka poek uh voel pawh,” ka ti nah.
57 Diklai kah aka thang boeih he coilung neh a khiing vaengah he tah aka lang la om coeng.
58 A hlo uh vaengah tah na thui bangla yook uh saeh lamtah a ta uh atah ka thui te dang uh saeh.
59 He tah Moese kah a khosing pawn ni. Amah a hing vaengah a pilnam taengah a thui tih, “Hingnah te namamih loh tuek uh, te daengah ni na hing uh eh,” a ti nah.
60 Tedae anih khaw, a hnukah tonghma rhoek khaw tangnah uh pawh. Ka mah nawn khaw amih taengah ka thui dae ta.
61 Te dongah maih kah pocinah dognah ngaihlihnah khueh boeh, te lakah tah khangnah dongah ngaikhuek rhoek ham mah te om ngaih lah,” a ti.
Ezra Loh Rhennah A Bih
62 Ka doo tih, “Boeipa ka ming toeng, Khohnin tah rhennah a ti uh pai. Amah long tah diklai la aka thoeng hlan rhoek taengah khaw rhennah a khueh pai.
63 Sitlohnah la om pai, amah tah a olkhueng dongah yutnah neh ka mael rhoek taengah rhennah om pai.
64 Thinsennah amah kah a suentae rhoek, tholh uh pai dae amih taengah thinsennah a tueng sak.
65 Coihpai oe, amah long tah a loh lakah a paek ngai coeng.
66 A thinphoei lungvat khaw kum pai, amah longtah aka hing rhoek taengah khaw, aka cet tangtae rhoek taengah khaw, aka thoeng hlan rhoek taengah khaw thinphoei lungvat a coih sak pai.
67 Amah loh saelong pawt koinih lunglai neh a khuikah khosa rhoek khaw hing uh mah pawh.
68 Amah tah aka paekung la a khue pai. Amah loh a then khui lamkah te pae pawt koinih amih boethae aka saii khui lamkah te ulae aka hing he. Hlang hing thawngrha ah pakhat khaw hing thai mahpawh.
69 Lailtoek kung ni, a ol aka saii pah tah tholh hlah pah pawt tih a tholh uh dongah hlangping khaw muep a khoe.
70 Te dongah hlangping toeklek na pawt khui ah khaw a yol ca tangkik ni a hlun mai eh,” ka ti.