9
Hnukkhueng kah Miknoek
1 Amah loh kai n'doo tih, “Na lungbuei ah nueh hueltue lah, miknoek ka thui te cungvang tah thoeng coeng.
2 Lunglai a saii he khohni loh a hip ham a tue rhep a yoei vaengah na ming bitni.
3 Diklai kah lingluei, pilnamkah soekloeknah, namtom kah cikcoknah, mawtkung rhoek kah vikvawknah, mangpa rhoek kah lilumnah a phoe vaengah,
4 he rhoek he a rhuem suen khohnin a tongcuek ah ni Khohni loh a thui coeng tila na ming bitni.
5 Diklai dongah a soeprhaep boeih a thoeng van bangla mingphanah loh a tong tih, a bawtnah khaw phoe coeng.
6 A tue khaw Khohni kah la om coeng. A tongnah tah khobae rhambae la, a tloengkhoelh bibi la, a bawtnah kah dantatnah la, miknoek la om coeng.
7 Aka daem boeih te khaw amamih kah a bibi rhangneh, a tangnah dongkah tangnah rhangneh loeih uh ni.
8 Phong tangtae mueirhih dongah khaw thingthuel uh ni. Te vaengah ka khohmuen neh ka khorhi khui ah khangnah a hmuh uh ni. Te tah a tong lamloh kamah ham ka ciim coeng.
9 Te dongah ka khosing aka poeih rhoek tah limlum uh ni. Te te a hnawt uh uh dongah a khui kah phaepnah he phat kho a sak uh ni.
10 Ka hoeikhangnah a dang uh lalah a hing tue khui ah kai m'ming tlaih moenih.
11 Sayalhnah a khueh uh li vaengah ka olkhueng te puet a tlaitlaek uh. Amih ham yutnah tuethen a ong li vaengah a hnoelrhoeng uh tih yakming uh pawh.
12 He rhoek loh a dueknah hnukah phaepnah khuiah ming kuekluek saeh.
13 Lailak rhoek dantat ham dongah ngaisahueng la muep om voel boeh. Tedae hlang dueng rhoek a daem ham te mah cae laeh. Amih tahae diklai tue ah aka om rhoek neh diklai tue a saii pah ham rhoek ham te.
Oelhnah Olrhaep
14 Ka doo tih,
15 “Lamhma ah khaw ka thui, tahae ah khaw ka thui, te ni koep ka thui eh. ka poci ham te a yet atah u lae aka daem eh?
16 Tuiphu he tuicip lakah a tlung bang mai la,” ka ti nah.
17 Amah loh kai n'doo tih, “Khohmuen a om bangla cangti khaw om, rhaipai a om bangla pangcik khaw om. Bibi om bangla a thaih khaw om, lotawn om bangla cangtil hmuen khaw om van.
18 Tahae kah aka om rhoek hamla ka rhoekbah vaengah tahae kah diklai due he om coeng. A khuiah khosak sak ham diklai ka suen vaengah he pakhat khaw a om hlan dongah pakhat long khaw n'oelh pawh.
19 Tahae ah he lunglai ah a suen taengtae rhoek loh, amih caboei khangmai neh, rhamtlim ramthen neh ka khut uh mai ah, a longpuei ah poci uh.
20 Te dongah lunglai he thuep vaengah a hmata te ka hmuh coeng. Ka diklai he a khui ah aka om rhoek kah thailatnah rhangneh tloh a kaem coeng.
21 A ngen tah rhainah a len neh a paekboe te ka hmuh, misur bom at dongah a thaih pakhat ni kamah ham ka khueh, duup kah thingnu khuiah khaw kung at ni a tuek.
22 A poeyoek la a cun mailai ngawn tah muep a duek mai akhaw ka misur te ka thingling ngawn tah daem saeh. Ka thadueng a yet neh amih te ka soep sak coeng.
23 Tahae lamloh hnin rhih na poeng pueng ni, tedae te vaengah te yaeh boeh.
24 Im a sak nah hlan rhaipai hmuen la cet lamtah lo kah rhaipai te dawk ca. Yu khaw o boeh, rhaipai mah dawk ca.
25 Khohni taengah phat thangthui. Ka lo vetih nang taengah kan thui bitni,” a ti.
Moese Olkhueng Thangpomnah
26 Te dongah amah loh n'thuinuet bangla Ardat a ti na hmuen la ka cet. Rhaipai lakli ah ka ngol tih lo kah toi-an te ka caak, te long te ngaikhuek la n'duel tih ka thaa a tom.
27 A hnin rhih phoeiah tah taitin dongah ka yalh, ka thinko he hnukbuet kah bangla limlum.
28 Te vaengah ka ka ong tih Khohni hmai ah pahoi ka cal.
29 “Boeipa aw, namah he kaimih taengah khaw, a pa rhoek te Egypt lamloh khosoek la ha coe vaengah khaw, khosoek longhmang ah thaihuk la a pongpa vaengah khaw na phoe coeng.
30 Te vaengah, ‘Israel aw, ka ol he ya lah, Jakob cadil aw ka ol dongah hnakaeng lah.
31 Nangmih te ka olkhueng kan tueng eh, te long ni na khuiah a thaih a thoeng sak vetih, dungyan thangponah la n'om sak eh,’ na ti.
32 Tedae a pa rhoek loh olkhueng a doe uh lalah, tuem uh pawt tih oltlueh te khaw ngaithuen uh pawh. Te cakhaw olkhueng kah a thaih tah phae thai pawh. Te khaw namah kah dongah ni a phae thai pawh.
33 Olkhueng aka doe rhoek boeih a poci te khaw amih ah a soem cangti then te a ngaithuen uh pawt dongah ni.
34 Amah rhilam he ana om coeng, diklai loh cangti a doe, tuili lah sangpho, bael dongah caakoi okkoi om. Tedae amah tue loh a pha vaengah tah a tuh te khaw, a caeh sak te khaw, a khuikah a khueh te khaw a phae.
35 Te rhoek te poci cakhaw a khueh te khaw poci. Telam te mamih taengah a om van moenih a?
36 Mamih khaw olkhueng n'doe dae n'tholh dongah n'poci ni. Te khaw mamih thinko ah a doe van bangla om coeng.
37 Te cakhaw olkhueng tah poci pawt vetih thangpomnah dongah om ni.,” ka ti.
Huta Nu Kah A Rhah
38 Ka thin ko ah he ol ka thui tih ka kaepvai ka sawt hatah ka bantang ah manu pakhat ka hmuh. Anih te nguek tih ol a len la rhap. A thinko ah kosi dung, a himbai khaw boeih pawn coeng, a lu dongah khaw hmaiphu om.
39 Te vaengah ka lungpoek neh ka moeh het te khaw pak ka toeng tih anih taengla ka mael.
40 Te phoeiah anih te, “Balae tih na rhah, balae tih na thinko a phoena,” ka ti nah.
41 Anih loh kai te, “Kamah bueng mai saeh ka Boeipa. Te daengah nih kamah ngaih ah ka rhah vetih phat ka nguek eh. Ka mueihla bahoeng ka khahing tih ka kosi he dung,” a ti.
42 Anih te, “Na taengah balae aka om?” ka ti nah.
43 Anih loh kai taengah, “Na sal he ka yaa tih ca ka khueh pawh. Ka va nen he kum sawmthum ka om rhoi coeng.
44 Hnin takuem, khonoek takuem, kum sawmthum khuiah khoyin khothaih ka thangthui.
45 Khum sawmthum phoeiah tah Pathen loh na sal ol he a yaak. Ka tlayae khaw a hmuh, ka ngaithae khaw a poek dongah capa pakhat m'paek. Te vaengah kamah khaw, ka va khaw, ka imben boeih khaw, a soah muep ka omngaih uh. Tloengkhoelh Boeipa te thangpomnah muep ka paek uh.
46 Te dongah anih te ngaithuen halue la ka khut.
47 Anih te a rhoeng hang vaengah a yuu ka bae pah tih,yulueinah poeih hnin khaw ka khueh pah.