4
Na Kesanina na Vaigokovigi
(4:1–14:22)
1 Me tû a Elipas na mane ni Teman me tsarivania a Job,
2 “?Igoe a Job, laka sauba ko tau gini kore ti vaga inau kau goko vanigo?
E utu vaniau goto kau totu mui babâ moa.
3 Ko reia, igoe o sasanigira rago na tinoni danga,
mo kakaisigira igira ara maluku.
4 Mi kalina igoe o reia kesa e kolae, me maluku, me tubulagi,
mo tû mo ba verea, ma nimu goko o malagaisiginia me gini tu tugua.
5 Eo, mi kalina ia me laba nimu tagu igoe na totu tana rota loki,
me gini seko tobamu, me utu vanigo na bariana.
6 Igoe o tau kuti na samasama vaniana God, me gotolaka nimu sasaga tana maurimu popono.
Me vaga ia, me tuguragoa ko norua God me ke sangago.
7 “Mi kalina ia igoe ko papada dou, mo ko soamaia na asana kesa tinoni
igoe o dona e gotolaka nina sasaga me gadovia na rota loki.
8 Inau au reigira na tinoni ara qari kaona na uta na sasi,
mara rasavagini bamaia na vatuna na tsutsukibo;
mi kalina ia, migira ara tsurivia moa na lakana na tsutsukibo ma na nauseko.
9 Ma na korena God e mai vaga moa na tulonga loki me matesiginigira.
10 Igira na vanga tsutsukibo ara ngunguru mara kakanga loki vaga moa na laeone,
maia God e muisigira me bokua na livoqira.
11 Mara viri mate lê vaga moa na laeone kalina e tau tsodoa sa omea ke matesia me ke gania,
mara viri saranga bamai na dalena.
12 “Me kesa tana tagu, me kesa e goko gagasa mai tana kuliqu,
me tangi tetelo sosongo, me varangi nogo ke utu vaniau na rongomigadoviana na omea e tsaria.
13 Maia e laba vaniau tana bongi, me toro butosia niqu maturu.
14 Mau gini novo mate, mau matagu loki,
me gagariri popono na kokoraqu.
15 Me kesa na omea e mai pelea na ngoraqu.
me tû na kolina na ivuqu tana matagu.
16 Mau rei bâ ragoa kesa na omea e tutû i tana;
mau moro ba kakai i konina, mau tau moa tangomana na reigadoviana laka nagua vaga ia.
Mi laona na mui kutukutu tana bongi mau rongomia kesa e goko me tsaria:
17 ‘?Laka tangomana ke kesa ke totugoto i matana God,
se ke male saviliu i matana Aia e volâ?
18 God e tau goto norudougira nina maneaqo,
me atsa moa ti igira goto nina angelo, maia e tsodovulagigotoa na sasi i laoqira.
19 ?Megua igoe o padâ laka God ke norudoua na tinoni aia e aqosiginia moa na kao lê,
me dona ke mate tsaku vaga moa kalina ara pelea moa na bebe maia e tavongani mate lê?
20 E tau utu kesa tinoni ke mauri dou tana matsaraka,
me ke tavongani labanovo vania na mate ti ke tsau tana ngulavi.
21 Ma kara adiligi tania pipi na omea sui aia e tamanina;
maia e mate lê me tau goto moa vati tamani sasagana.”