3
A Job e Vealaginia na Dani Tana Aia e Botsa
1 Mi tana susuina na vitunina dani maia Job e goko tugua me vealaginia na dani tana aia e botsa. Me tsaria:
2-3 “!Igoe God ko vealaginia na dani i tana inau au botsa;
ma na bongi i tana e tianaau na tinaqu!
4 Niqu God ko naua na dani ia me ke lia na rodo.
Ko laka saikesa goto na padavisuana na dani vaga ia;
mo ko laka goto tamivania na marara ke mararasia.
5 Ko nauginia moa na dani na ponopala ma na rodo pulipuli;
mo ko tsavupoiginia na parako, mo ko koko ponotia na aso me ke tau goto sinaria.
6 Ko saluvaligia na bongi ia tania na tsoko ngalitupa,
mo ko laka na tamiana kara tsokovisu tugua.
7 !E dou bâ ti na mane ma na daki kara tau magemage tana bongi ia, ma kara tau goto tiana na daki!
8 Ko tsarivanigira igira ara dona na solopoke, migira goto ara dona na tagaoviana na Leviatan, kara vealaginia na dani ia.
9 Ko tongovania na veitugusidani me ke tau datomai;
mo ko tongovania na bongi ia me ke tau goto amesia ke vovomai na dani.
10 Ko vealaginia na bongi ia rongona aia e tamivaniau mau botsa i konina,
mau gini gadovi rota ma na melu loki.
11 “?Megua nogo ti au tau mate i laona tobana tinaqu,
se kau mate saviliu nogo kalina au vasini botsa?
12 ?Egua tinaqu ti aia e tulangiau?
?Megua ti e tsutsuau?
13 Ti vaga kau mate nogo tana tagu ia, minau kau totu rago nogo kalina ia tana vera na mango,
14 kolugira igira na taovia tsapakae ma na tagaovera,
igira ara logovisugira i sau na valeqira na tinoni tataovia;
15 se kolugira igira na tinoni lokiloki
ara dangaliginia na valeqira na qolumila ma na siliva;
16 se kolugira na baka ara vasubutogira.
17 I laona na qilu igira na tinoni vanga tsutsukibo ara mololenogoa niqira nausasi,
migira ara kolae tana aqo ara tsodoa na mango.
18 Me atsa vaga goto igira ara totu tana vale sosori mara gini mage na tsodoana na rago,
ma na totu taniana na gu loki ma na gorara tinoni.
19 Igira sui lakalaka ara totu i tana, igira e tangi loki gaqira rongo, migira na tinoni lê,
kolugira goto na tseka ara totu tanusi tanigira gaqira taovia.
20 “?Megua ti igoe God o molovania na tinoni ke mauri babâ moa tana rota?
?Megua ti o tamivanigira kara reia na mararana na dani igira ara totu tana melu loki?
21 Igira ara totupitua na mate me tau lelê labamai;
ara lalave sosongolia liusia na laveana kesa na moi e totu popoi tana kao.
22 Igira e utu kara magemage poi tsau kalina kara mate ma kara qilugira.
23 God nogo e poia vanigira na omea ke laba tana tagu i muri,
me totu kapusigira pipi moa tana nauna.
24 Ngiti gaqu mutsa inau, na ngangai moa,
me utu goto kau mololea na kukungu.
25 Pipi sui na omea inau au kadangaginigira mau matagunigira igira sui ara labamai vaniau.
26 Au tau goto dona na totu tana goto, mau tau goto dona na mango,
ma niqu rota e tau goto tamani susuina.”