5
1 E goko babâ moa a Elipas me tsaria,
“Bâ, ko sosoa igoe a Job, mo ko reia ti vaga kesa ke mai me ke sangago.
?Laka e totu sa angelo tugua igoe ko nongia me ke mai sangago?
2 Kaira na tobakore ma na masugu ara ka dona
na matesiaqira igira ara tau sasaga.
3 Inau au reia na tinoni bubulega me vaga moa ti aia e totu raviravi dou i laona na valena,
mau nongia God ke ketsoa na valena, maia e naua me tavongani taveo lê.
4 Ma na dalena e utu goto kara tsodoa sa nauna i tana kara totu raviravi dou;
me tagara goto ke kesa ke isutuguqira tana tinete.
5 Na tinoni ara vitoa sauba kara gania nina omea tsukatsuka,
atsa moa na omea ara dato i laoqira na itai kokonaga,
migira ara marou sauba kara gini masugu nina omea levolevo danga aia e tamanina.
6 Igita a dona nogo laka na sasi ma na rota
e utu kara ka vovodato tana kao vaga na omea tsukatsuka.
7 !Tagara! Na tinoni segeni nogo e alomai na rota me gadovisegenia,
vaga saikesa na vividina na lake e lovodato talumai nogo i laona na lake.
8 “Me ti vaga inau kau gadovirota vaga igoe, me sauba kau pilo bâ i konina God
ma kau sauvulagi vania na omea e rotasiau.
9 E utu vanigita na padagadoviana na omea loki aia e naugira,
ma na omea ganataga aia e tau kuti na nauana.
10 Aia e molomaia na usa me tumulia na kao
me malobusiginigira na uta.
11 Eo, aia God nogo e molokaegira igira ara totu palatsuna,
me veregira igira ara tangitangi.
12-13 Aia e pualasia niqira aqo seko ara vangaraua na nauana igira na tinoni vanga valovalo,
me sogotigira igira na tinoni ara sasaga loki i laona nogo na omea ara vorogokona na nauana,
rongona kara gini tau tangomana na manaliana na omea ara vorogokona nogo.
14 Me atsa moa ti tana niaso vota, migira ara tataposasa bamai vaga moa ti i laona na rodo pulipuli.
15 Maia God e sogogaqira tania na mate igira ara tau tamanina sa omea;
me laumaurisigira igira ara kili sasanga tania na limaqira igira ara bingi sekoligira.
16 Eo, me vaga ia migira ara tau tamanina sa omea ara dona kara amesia God ke sangagira,
me ke muisigira igira na vanga tsutsukibo.
17 “!Ke mage aia na tinoni God e totosasaga vania!
Me vaga ia, migoe ko laka na gini momosatoba kalina God Susuliga Sosongo ke totosasaga vanigo.
18 Igita a dona laka ti vaga God ke bokalia kesa, maia nogo sauba ke talivania na bokana;
na limana nogo ia e labuginigo, ma na limana goto nogo ia sauba ke taliginigo.
19 Pipi moa tana tagu aia sauba ke didia tanigo na omea seko, me ke gini tau sekoligo sa omea;
20 mi kalina ke laba na uvirau loki, maia sauba ke palago mo ko gini mauri,
mi tana vailabu loki, maia sauba ke reitutugugo mo ko gini tau mate.
21 God sauba ke laumaurisigo tanigira igira ara dona na botsangi goko pero;
mo ko gini tau matagu kalina ke laba vanigo sa omea seko.
22 Tana tagu na vailabu loki, mi tana liuna na uvirau,
God nogo sauba ke reitutugugo, migoe ko totu rago mo ko kiakia,
me utu goto ko matagunigira na omea tuavati atsi kara sekoligo.
23 Na uta sui ko qarikaoqira sauba ke tagara goto sa vatu ko reia i koniqira;
me utu lelê goto ke gatigo sa omea tuavati atsi.
24 Me sauba igoe ko totu dou rago i laona nimu valepolo;
mi kalina ko moro bâ i koniqira nimu sipi, me sauba ko reigira kara totu raviravi dou moa.
25 Ma na dalemu ma na kukuamu sauba kara danga sosongo
vaga saikesa nogo na rauqira na buruburu tana kao.
26 Migoe sauba ko mate kalina ko tuqatuqa sosongo nogo,
vaga nogo kalina e ganoga na uiti mara anguni sagegira tana nauna na mani dudusi uiti.
27 A Job igoe, e oka nogo igami ami lalave rongona na omea vaga girani,
mami tsodovulagia laka ara mana nomoa.
Mi kalina ia ma nimu aqo nogo igoe ko rongomi vatagira mo ko tabedougira.”