17
1 Ma Job e goko baba moa me tsaria,
“Inau au seko pitsu nogo, me varangi nogo kau mate,
ma na qilu segeni moa e totu pituau.
2 Igira sui ara totu poliau ara tsiri sosongoliau, me utugana vaniau na nauana sa omea,
mau totu kiki moa, mau momoro.
3 Niqu God, igoe o dona nogo laka inau au tsaria na manana,
ti au nongigo ko tabevaniau niqu tsaqina goko,
rongona e tagara goto ke kesa ke sangâ na tabevaniaqu niqu tsaqina goko au tsaria.
4 Igoe nogo o vongo kapusia niqira papada gana kara gini tau dona na padagadovi omea,
mi kalina ia mo ko laka goto na tamivaniaqira kara tseqo poliau inau.
5 I laona kesa na gokotabana ni oka ara gini goko laka ti vaga kesa na mane e sauligigira na kulana tana rongona na qolo,
mara gini tsodorota igira na dalena segeni nogo.
6 Mi kalina ia migira na tinoni ara gini aqo na tsaqina na gokotabana vaga ia tana rotasiginiaqu inau;
mara mai mara tsuvelia na ngoraqu.
7 Au melu loki sosongo mau ngangai me varangi nogo ke gini koko na mataqu,
ma na limaqu ma na tuaqu ara vaga moa na pidi.
8 Igira ara padâ laka e goto sosongo nogo niqira sasaga, ara morosiau mara gini novo mate,
mara tû, mara kede sosongoliau vaga moa ti inau au tinoni sasi sosongo.
9 Eo, igira ara padâ laka e gotolaka nogo niqira sasaga,
ara gini livu suguradi sosongo laka e mana saikesa nomoa na omea ara tsaria.
10 Me ti vaga igira sui kara mai tû i mataqu inau,
minau sauba kau tau lele goto tsodovulagia ke kesa i laoqira ke sasaga loki.
11 “Na bongiqu ara vano putsi nogo; ma na omea sui inau au padâ na nauana ara puka lê sui.
Me tagara goto sa omea dou kau amesigotoa.
12 Minau au totu moa tana rodo, migira gaqu duli ara tsarivaniau, ‘Tagara. Igoe o totu nogo tana marara.’
Mara tsarigotoa, ‘Ko laka na gini boe sagata, e varangi nogo ke dani male.’
Minau au donaginia laka au tototu moa i laona na rodo.
13 Mau amesia moa kau tsuna tana barangengo na mate,
mi tana sauba kau tsaro ma kau maturu i laona na rodo.
14 Me sauba kau tsarivania na qiluqu, ‘Igoe nogo na tamaqu,’
me vanigira na meri ara ganiau, ‘Igamu nogo na tinaqu ma na vavinequ.’
15 ?Me sauba nagua goto kau amesia inau?
?Masei tugua ke tsarivaniau inau laka sauba kau douvisutugua?
16 Mi kalina inau kau ba tsuna tana barangengo na mate,
ma niqu amesi e utu goto ke dulikoluau bâ i tana.”