16
1 Mi tana e tû a Job, me tuguvisua nina goko a Elipas me tsaria,
2 “E oka sosongo nogo inau au rongomigira na goko vaga girani.
Eo, ma na goko na vere tinoni amu sauvaniau amu paboginia moa niqu rota inau.
3 ?Megua igamu, sauba kamu goko babâ moa me ke utu ke sui?
?Me laka nagua e sekoligamu te amu goko babâ moa vaga ia?
4 Me ti vaga igamu kamu totu tana rota vaga inau au totu i konina kalina ia, minau kau mauri dou vaga moa igamu kalina ia,
me tangomana moa inau kau tsarivanigamu na omea sui vaga amu tsarivaniau inau,
ma kau lengulengu lovaqu vanigamu goto,
ma kau lumiginigamu na obona niqu tsaqina goko.
5 Me tangomana vaniau goto kau kakaisiginigamu niqu totokoe,
ma kau goko babâ moa gana kau vereginigamu.
6 “Me tagara goto sa goko kau tsaria e dona ke sangaginiau,
me ti vaga kau totu mui, me tau goto gini bisi niqu rota.
7 “God igoe nogo o adiligi poponoa na susuligaqu inau;
mo tamia kara labumatesigira sui na dalequ.
8 Igoe nogoria o molo galaqu inau mau gini qarosaga mau suli lê,
migira na kulaqu ara reia igoe o nauvaganana vaniau ia,
mara padâ laka igoe o kedeau tana rongona au tsutsukibo.
9 Eo, God e kore loki sosongo vaniau me sasi votaau;
me vusuliau tana tobakore.
10 Na toga ara masingerungeru vaniau;
mara sagavusai i koniqu, mara davâ na ngoraqu.
11 God nogo e moloau i limaqira na tinoni vanga tsutsukibo.
12 Tana idana minau au totu dou rago,
maia God e mai me tangolia na lioqu, me lumu rapasiau,
me moloau kau lia nina omea na sasanigado.
13 Maia e vanasi poliginiau nina pipili,
me gini taratsi na tobaqu, me viri rutsu na tinaequ,
me atsa moa ti God e reivaganana ia, maia e tau lele goto galuveau.
14 E totu matengana na bokaliaqu babâ moa;
me maiginiau vaga moa kesa na mane vaumate e gini bule na matesi tinoni.
15 Tana idana ara padalokiau igira na tinoni, mi kalina ia minau au totu sekoseko lê mau vangamâ,
mau sagelia moa na polo baubau papadana na melu.
16 Au ngangai babâ moa poi tsau kalina e tsitsi me kubi na mataqu, me rerei seko sosongo na ngoraqu.
17 Minau au dona laka au tau vati naua moa sa omea kau sekoliginigira na tinoni tavosi,
ma niqu nonginongi e male dou i matana God.
18 “Eo kiki igoe na barangengo ko laka na saro poiana na gabuqu kalina kau mate,
mo ko laka goto na tamivaniana niqu nono tana rongona na pedegoto ke puala lê.
19 Minau au dona nogo laka e totu i baragata kesa aia e dona ke isutuguqu inau,
me ke sanga tabana koluau.
20 Aia e dona ke goko tuguqu vania God,
kalina au ngangai babâ moa i matana.
21 Mau norua ke ngongoragi matequ inau i konina God,
vaga moa kalina kesa tinoni e ngongoragi sosongo matena na kulana.
22 Na bongiqu ara vano putsi nogo,
me sauba ke tau oka, minau kau liu tana sautu i tana e tau goto tangomana vania kesa ke visumaitugua.”