18
1 Mi tana e sui nina goko a Job, me tû a Bildad me tsarivaganana iani:
2 “?Igoe a Job, sauba ke ngisa ti ko vongoa na mangamu igoe?
E dou bâ ti ko totu mui moa mo ko rongovata, mi tugami moa kami tu goko vanigo.
3 ?Egua igoe ti o padâ laka i tugami ami tu tau sasaga vaga moa na buluka?
4 Migoe o rotasi segenimu moa tana nimu momosatoba loki vaga ia.
?Me laka tana rongona moa nimu tobamomosa igoe me ke gini totu mangu lê na barangengo?
?Me laka sauba God ke ratsugira na vungavunga gana ke gini douvisutugua na tobamu igoe?
5 “Nina laeti kesa tinoni vanga tsutsukibo sauba moa kara uvi matesia;
me utu goto ke irutugua,
6 me ke rodo saviliu moa i laona na valena.
7 Kalina e mauri dou maia e dona ke tsotso kakai,
mi kalina ia maia e tutubulagi moa,
igira nina vorogoko segeni nogo ara tubulaginia me gini puka.
8 E liu bâ i laona na vugo me sogotia na tuana;
9 ma na pidipidi e kautia na bobouna tuana me tangolikakaia.
10 Gana taviti e totu popoi tana kao,
ma gana pidipidi ara molovania tana matana sautu.
11 “Na omea mamataguniga ara totupitua pipi moa tana nauna,
mara takuvitsaria.
12 I sau aia e tamani omea danga, mi kalina ia e gini rota na vitoa;
ma na toroutsa loki e tototu pitua.
13 Na lobogu seko e gania na kokorana popono,
me naua ma na limana ma na tuana ara viri mabulu sui.
14 Mara tsialigia tania na valena i tana e totu raviravi dou,
mara raqa bâ i matana na Taovia na Mate.
15 Mi kalina ti vaga ke mate aia, me sauba ke tagara goto sa dalena ke totuvia na valena.
Ma kara mai na tinoni tavosi ma kara rasavagini bamaia na papasa mila tana valena,
rongona kara matesiginia na naquna na lobogu seko ia,
mi muri migira nogo kara mai ma kara totuvia na valena.
16 Migira sui na lamuna ma na arana popono ara viri matsele sui mara makede.
17 Migira na tinoni sui ara padale saikesalia gana tangirongo,
me tagara goto ke kesa ke padavisutugua.
18 Ara tsialigia tania na vera na mauri,
ke baligi tania na marara, me ke ba totu tana vera na rodo.
19 Me tau lele goto pipidi sa kukuana,
se ke mauri sa nina tinoni.
20 Me tû i tana e dato na aso me tsau bâ tana e sû,
migira sui lakalaka ara rongomia na omea seko vaga ia e laba vania,
ara gini novo mate mara gariri tana matagu.
21 Aia nogoria e vaga na omea e totu pitua na tinoni vanga tsutsukibo,
migira sui goto ara tau lelê gini boe tana rongona God.”