23
1-2 Ga ŋayi Baylamdja waŋana bitjarra, “Ŋali yurru djäma barŋ, märr ŋali yurru mundhurr wekama wäyin bathan dhiyala.” Bala maṉḏa djämanydja ŋunhiyi barŋ, dhunupa bathara mundhurrnha wekaŋala buliki'na ga bembina.
3-5 Ga ŋuliŋurunydja dhurrwaraŋuru ŋayi Baylamdja marrtjina bala gänaŋulilina, bala ŋayi Garrayyunydja wekaŋala dhäruknha nhanŋu waŋanharawuna Baylamgu.
6 Bala ŋayi roŋiyinanydja ŋunhiyi Baylamdja, nhäŋala Balaknhanydja, ŋayi yukurrana dhärrana ŋunhili bäyma dhaliyarra'ŋurana galki, wiripu‐guḻku'wala dhambay ŋurikala ŋunhi Mawappuyŋuwala ŋurru'‐ŋurruŋuwala.
7 Bala ŋayi waŋanana dhunupana Baylamdja bitjarrana gam',
“Yo, ŋayi Balakthunydja gäŋala ŋarranha lili dhipala warray,
märr ŋarra yurru buku‐wuykthun yukurra yolŋu'‐yulŋunha Yitjuralpuyŋunha miṯtjinha.
8 Nhaltjan dhika ŋarra yurru walalanha buku‐wuykthundja? . . .
ŋunhi ŋayi ŋuli yaka Godthunydja walalanha buku‐wuykthun yukurra?
9 Dhipuŋurunydja gay' bukuŋurunydja ŋarra yukurra nhämana ŋunhayi yolŋu'‐yulŋunhanydja biyapulnha gal'ŋu dhaŋaŋnha miṯtji.
Wiripuŋuyunydja miṯtjiyu bäpurru'yu yukurra ḻakarama walalanha nhäŋiniŋ' ḻakaramana,
yurru ŋayi Godthunydja yukurra walalanha goŋmirriyama warray dhika wal'ŋu, biyapul warray ŋurikala wiripu‐guḻku'walanydja bäpurru'wala.
10 Ŋayinydja walalanha Garrayyunydja biyapul warray djäma dhaŋaŋguŋala,
biyapulnha wal'ŋu bothurrumiriwnha ŋunhiyi yulŋunydja,
ga ḻakaramanydja ŋayi ŋuli walalanha Godthu ŋayaŋu‐dhunupamirrina yana.
Ŋe, ŋarrana ŋuli rakunydhi biyakuyi ŋayaŋu‐yal'yunaranydja, bitjan walala.”
11 Bala ŋayi Balaktja mirithinana maḏakarritjthina Baylamgalanydja, ga waŋana bitjarrana, “Way, mukthurrana nhe! Nhäku nhe yukurra dhuwala waŋa bitjandhinydja?” bitjarra. “Ŋarranydja ŋunhi waŋana nhe yurru walalanha yukurra buku‐wuykthun, ga nhenydja walalanha goŋmirriyama yukurra dhiyaŋi nhokala dhärukthu warray.”
12 Ga ŋayi Baylamdja waŋana bitjarra, “Ŋarranydja yurru waŋa ŋunhi yana liŋgu dhäruk ŋunhi nhaltjan ŋayi yurru Garrayyu dhäruk wekama ŋarrakala.”
13-14 Bala ŋayi Balakthunydja garr'yurrunana Baylamnhanydja wiripuŋulilina wäŋalili, bala ŋuliŋuruyinydja ŋayi nhäŋala märr‐ḻurrkun'nhana Yitjuralpuyŋunhanydja. Ga biyapul ŋayi Balak waŋana Baylamgala, “Ma' biyaka buku‐wuykthurra walalanha,” bitjarra.
15-18 Bala biyapul ŋayi Baylamdja waŋana ŋunhiyi warray liŋgu yana Godku warray dhäruk, bitjarra gam'.
“Way Balak, mäkiri'‐witjurra dhiyaku dhärukku gam'.
19 Godtja dhuwala ganaŋ'thun yukurra yolŋu'‐yulŋuwalanydja.
Yolŋu'‐yulŋuyu warray ŋuli bothirrinydja ḻakarama yukurra,
yurru Godtja dhuwala gäna wal'ŋu,
yakana ŋayinydja ŋuli bothirri ḻakarama.
Ŋalinydja ŋuli yolŋuyunydja dhuwala djambi warray ḻiya ŋitjalaŋguway,
yurru Godthunydja ŋayipinydja ŋuli yaka warray djambi,
ŋayinydja ŋunhi warray liŋgu, ŋupanayŋu warray djambimiriw.
Ŋunhi ŋayi ŋuli dhawu'‐nherraṉdja ŋula nhä,
djämana ŋayi ŋuli yana yulŋunydja;
Ga waŋa ŋayi ŋuli dhäruktja,
bala ŋayi yurru maḻŋ'thunna yana.
20 Ŋayinydja Godtja waŋana bitjarra ŋarrakala, ‘Ŋunhanydja goŋmirriyaŋa yolŋunha walalanha ya',’ bitjarra,
ga ŋunhi ŋayi ŋuli Godthu goŋmirriyamanydja wal'ŋu ŋunhi yolŋu'‐yulŋunha,
ŋarranydja yurru yakana gulmarama ŋanya ḏaḏawmarama.
21 Yitjuralpuyŋunydja dhuwalanydja bäpurru' yakana yurru yukurra marrtji marikurru,
liŋgu Garray Godtja walalaŋgu warray Waŋarr,
ŋurruŋunydja wal'ŋu ŋayi buŋgawanydja walalaŋgu, galki ŋayinydja walalaŋgala yana.
22 Godtja dhuwala be wal'ŋu ganydjarr‐ḏumurru ŋayi,
ga walalaŋgala ŋayi gali'ŋuranydja ŋunha;
Ŋayipi yana walalanha dhawaṯmaraŋalanydja beŋuru Yetjipŋurunydja,
ga buma ŋayi ŋuli baḏuwaḏuyun warrpam'thun walalaŋgu miriŋunhanydja.
23 Yakana yurru ŋula yolthu buku‐wuykthundja Yitjuralpuyŋunha,
yakana yurru ŋula yolthu walalanha buma ŋula marrŋgitjkunharayunydja be romdhu.
Walala yurru yolŋu'‐yulŋuyunydja nhäma ŋunhiyi Yitjuralnhanydja miṯtjinha, bala waŋa yurru bitjanna,
‘Yuwalk warray ŋunha walalanha Godthunydja yukurra goŋmirriyama warray dhika wal'ŋu.’
24 Ŋunhiyi miṯtji Yitjuralpuyŋunydja ḏälmirrina wal'ŋu dhikana, bitjan maḏakarritjmirri wäyin;
yakana ŋayi yurru ŋunhiyi ŋorranydja yukurra,
yana liŋgu ga ḻuka ŋayi yurru dhawar'maramana yana ŋunhi, ŋunhi nhanukuŋu bunhara.”
25 Bala ŋayi Balaktja waŋana bitjarra, “Way yaka! Yaka walalanha biyakayi goŋmirriyaŋa yukirriya.”
26 Ga ŋayi Baylamdja waŋana bitjarra, “Liŋgu ŋarra nhuŋu ŋunhi ḻakaraŋalanydja, ŋarra yurru bukmak yana djäma dhika nhä ŋunhi ŋayi ŋuli ŋarrakala Garrayyu wekama.”
27—24:9
Ga biyapul ŋayi Balak waŋana Baylamgala bitjarra, “Go marrtjiya malthurra ŋarraku wiripuŋulili wäŋalili. Mak ŋayi yurru Godthu dhäruk wekama nhuŋu buku‐wuykthunarawu Yitjuralpuyŋuwu.” Bala ŋayi Garraywu Garrkuḻuktja ŋunhi walŋa bunana Baylamgala, ga biyapul ŋayi waŋana Godku dhäruk, goŋmirriyaŋala ŋunhi Yitjuralpuyŋunha.