14
1 Umukazi mwitegeereza, ali mu yubaka inyumba yage.
Si ikizeeze kyoꞌmukazi kyohe, kiri mu gihongola.
2 Ngiisi ábali neꞌmikolezi miija, bali mu simbaha Nahano.
Si banangora-mabi boohe, bali mu múgayiriza.
3 Umuhwija ali mu deta amagambo goꞌkuyikululira ikihano.
Si umwitegeereza yehe, amagambo gaage gali mu múkinga.
4 Ikyanya ishuuli zoꞌkulima zibulisiri, iri ndaabyo mu kihinda.
Si ikyanya ishuuli iri mu kola ku mwete, hali mu ba umwimbu ku bwingi.
5 Akamasi koꞌkuli katali mu tebana.
Si akamasi keꞌbibeesha koohe, kali mu deta-deta ibinyoma.
6 Umundu woꞌkugayirizania, kundu ali mu looza ubwitegeereze, ndaabwo ali mu longa.
Si umwitegeereza yehe, ali mu bulonga duba-duba.
7 Ukizi yiyeka noꞌmuhwija.
Mukuba, ndaabyo angakuyigiriza.
8 Ngiisi ábali noꞌbwitegeereze, bali mu yisaliza ku bigaki yija.
Si abahwija boohe, bali mu kizi tebana naaho.
9 Ibizeeze biri mu saasa ibyaha.
Si ábakwaniini boohe, bali mu yilega, banalooze ukushubi nywana.
10 Ndaaye úwangamenya ngiisi kwoꞌwabo ali mu lyanirwa.
Kiri neꞌkyanya ashambiiri, ndaaye ye bangashambaalira kuguma.
11 Inyumba ya nangora-mabi igahongolwa.
Si iheema lya ábakwaniini ligakizi sikama.
12 Umundu, mu masu gaage, hali injira yo angabona kwo itungiini,
si ku mbeka, inabe ya kumútwala mu lufu.
13 Umundu angasheka, mu mutima munabe muyijwiri umwizingeerwe.
Ikyanya akasheko kagamalaga, hanasigale indaania naaho.
14 Abandu babi bagakizi hembwa ku mikolezi yabo mibi.
Umundu mwija, naye, agaki hembwa hiꞌgulu yeꞌmikolezi yage miija.
15 Umuhwija, ikyanya ali mu yuvwa igambo, ali mu yami lidumeereza.
Si umwitegeereza yehe, ali mu tee yisaliza.
16 Umwitegeereza ali mu simbaha Nahano, iri anayiyeka ukugira ibyaha.
Si umuhwija yehe, atali mu twazania, anakizi yifunda mu ngiisi mabi.
17 Ngiisi úli mu raakara duba, ali mu kizi yifunda mu buhwija.
Umulyalya kwakundi, ali mu shombwa.
18 Abahwija bayamiri bali mu hembwa ku bwobwo buhwija bwabo.
Si abitegeereza boohe, bali mu hembwa ubwitegeereze nga lushembe.
19 Abandu babi bagafukama imbere lyaꞌbandu biija.
Ee! Banangora-mabi bagakizi fukama ha miryango yaꞌbandu boꞌkuli.
20 Abakeni bali mu kenekwa kiri naꞌbatuulani baabo.
Si abagale boohe, bali mu ba naꞌbiira bingi.
21 Ngiisi úli mu gayiriza umutuulani wage, ali mu ba ayifuuziri mu kyaha.
Si ngiisi úli mu girira abakeni amiija, ali mu ba ahiriirwi.
22 Ngiisi úli mu shungika amabi, ali mu habuka.
Si ábali mu shungika ukugira amiija boohe, bali mu kundwa, banali mu yemeerwa.
23 Ngiisi mukolwa gwo wangahimbukira kwo, ugagugenduukirwa mwo.
Si ábali mu tyabiriza ululimi naaho, bali mu yingira mu bukeni.
24 Abitegeereza, ikyanya bali mu longa ubugale, luli lushembe lwabo.
Si abahwija boohe, ubuhwija bwabo buli mu buta ubundi buhwija.
25 Akamasi koꞌkuli kali mu kizania.
Si akamasi keꞌbibeesha koohe, kali mu teberezania.
26 Ngiisi úli mu simbaha Nahano, ali mu langwa bwija.
Kiri naꞌbaana baage nabo, bagakizi langwa.
27 Ikyanya abandu bali mu simbaha Nahano, bali mu longa ubugumaana,
banakizi yiyeka imitego ya Narufu.
28 Mwami ahundwa naꞌbandu.
Si iri angabula abandu, iri ubwami bwage bufwiri.
29 Umwitegeereza atali mu yagalwa duba.
Si úli mu raakara ku mulindi, ali mu yerekana ubuhwija bwage.
30 Ikyanya umutima gutuziizi, amagala nago gali mu ba magumaana.
Si ikyanya umundu agwatwa noꞌluugi, luli ngaꞌkabungu mu mavuha.
31 Umundu, iri angavindagaza umukeni, iri agayiriza na úkamúbumba.
Si ngiisi úwangatabaala úgoozirwi, iri asimbahiri na Rurema.
32 Banangora-mabi, ikyanya balonga ubuhanya, bali mu tindimazibwa.
Si umundu woꞌkuli, kundu angafwa, ali mu longa ubutibitiro.
33 Abitegeereza bali mu sobanukirwa.
Kiri naꞌbahwija, bayiji-yiji kwokwo.
34 Abandu beꞌkihugo kirebe, ikyanya bali mu gira íbikwaniini, bagakizi huuzibwa.
Si ikyanya bagira ibyaha, bali mu teezibwa ishoni.
35 Ikyanya umukozi ali mu kola ku bwitegeereze, kiri na mwami ali mu múshambaalira.
Si ikyanya umukozi ali mu kola ibihigo, mwami ali mu múrakarira.