15
1 Umundu, ikyanya ashuvya ku bwitonde, ali mu hoohya uburaakari.
Si ikyanya ashuvya ku bute, ali mu shubi bukayisa.
2 Abitegeereza, ikyanya bali mu deta, bali mu yushuula ubumenyi.
Si abahwija boohe, bali vujuuka mu magambo.
3 Amasu ga Nahano gali mu bona byoshi.
Ee! Gayamiri gali ku babi, kiri na ku biija.
4 Amagambo malembu gali mu kiza, ganaleete ubugumaana.
Si amagambo goꞌbulyalya goohe, gali mu vuna umutima.
5 Umuhwija, ikyanya yishe ali mu múyerekeza, ali mu múgayiriza.
Si ulya úli mu simbaha yehe, ye mwitegeereza.
6 Umundu úkwaniini, mu nyumba yage muli mu ba ubugale katundu.
Si ngiisi byo banangora-mabi bali mu hembwa, biri bya kubaleetera amakuba.
7 Abitegeereza, ikyanya bali mu deta, bali mu kwiza ubumenyi.
Si abahwija, imitono yabo iri ya busha.
8 Amatuulo ga banangora-mabi, Nahano agashombiri.
Si amahuuno gaꞌbandu ábatungiini, gali mu músimiisa.
9 Imikolezi ya banangora-mabi, Nahano agishombiri.
Si ábali mu gira íbikwaniini, Nahano abakuuziri.
10 Ikyanya umundu ali mu habuka mu njira, ali mu hanirizibwa.
Ngiisi úli mu gayiriza ihano, agaafwa.
11 Ulufu neꞌnakwere, biyamiri biyanuusiri imbere lya Nahano.
Aahago! Imitono yaꞌbandu, ka itali yo haahe?
12 Umundu waꞌkazingati, atali mu looza ukuyerekezibwa.
Atanali mu looza mbwaꞌbitegeereza bakizi múhanuula.
13 Ikyanya umundu akeruuka ku malanga, biyerekiini kwoꞌmutima gushambiiri.
Si umwizingeerwe, guli mu vuna umutima.
14 Ngiisi mwitegeereza, umutima gwage guli mu kizi looza ubumenyi.
Si umuhwija yehe, ali mu kizi hohootera.
15 Imwoꞌmukeni, isiku zooshi ziri mu leeta amalibu.
Si iri umundu angaba ashambiiri, isiku zaage ziri mu ba za bugeni.
16 Umundu, nga angaba neꞌbindu biniini, anabe asimbahiri Nahano, iri ahiriirwi,
ho angaba neꞌbingi, anabe ali mu ndaania.
17 Umundu, nga angalya ishogo nzobeera mu kati koꞌrukundo, iri ahiriirwi,
ho angakizi lya inyama, neꞌkisuure kiri kwo.
18 Ngiisi úli mu raakara duba, ali mu vyula imilongwe.
Si umwigenderezi, yehe, ali mu gihoohya.
19 Injira yoꞌmwolo iri mu shaka neꞌmigenge.
Si injira yoꞌmundu útungiini, iri mu ba nga mutalimbwa.
20 Umusore mwitegeereza guli mu shambaaza yishe.
Si muhwija yehe, ali mu gayiriza nyina.
21 Umuzira bwenge, ali mu kizi shambaalira ubuhwija.
Si umwitegeereza yehe, ali mu kizi gira íbikwaniini.
22 Ikyanya ndaabo bahanuuzi, ishungi zooshi ziri mu fwa ubusha.
Si ikyanya abahanuuzi bali bingi, lyaꞌbandu bali mu genduukirwa.
23 Ikyanya umundu ashuvya bwija, ishuvyo lyage liri mu shambaazania.
Ee! Ikyanya adeta igambo liija ku kyanya kyalyo, liri mu simiisa!
24 Abitegeereza, ibyeꞌmwabo biri mu lola mwiꞌgulu,
banali mu yiyeka Nakuzimu.
25 Ábali mu yiheemya, Nahano ali mu hongola inyumba zaabo.
Si banamufwiri boohe, agakizi langa imbibi zoꞌtwaya twabo.
26 Inzaliro za banangora-mabi, ziri mu yagaza Nahano.
Si amagambo ágakwaniini, gali mu músimiisa.
27 Umundu munamahuku ali mu yingiza imbaga yage mwaꞌmakuba.
Si úshombiri ikitulire yehe, agaalama.
28 Umundu mwija, imbere lyoꞌkushuvya, ali mu tee yisaliza mu mutima gwage.
Si mu kanwa ka nangora-mabi, muli mu yami vujuuka amabi.
29 Banangora-mabi, Nahano ali mu bayisunga.
Si ikyanya abandu boꞌkuli bali mu mútabaaza, ali mu bayuvwa.
30 Amalanga ágakeyengiini, gali mu simiisa umutima.
Umwazi mwija guli mu sikamya indege.
31 Umundu, ikyanya alonga ihano, analiyuvwirize, ali mu genduukirwa,
anali mu yama atuuziri mu bitegeereza.
32 Umundu, ikyanya ali mu longa ikihano, anakigayirize, ali mu ba ayigayiriza yenyene.
Si ngiisi úli mu yemeera ukuhanuulwa, ali mu longa ukusobanukirwa.
33 Ikyanya umundu ali mu ba asimbahiri Nahano, ali mu longa ubwitegeereze.
Iri umundu angalooza ulushaagwa, akwiriiri akizi ba mutuudu.