13
1 Umwana mwitegeereza, ngiisi byo yishe ali mu múyigiriza, ali mu bisimbaha.
Si umwana woꞌkuhonyolezania yehe, atali mu twaza amahano.
2 Abandu biija bali mu deta amagambo goꞌbwitegeereze, banali mu gagenduukirwa mwo.
Si ábatali mu twazania boohe, bali mu yifwija naaho kwo bakizi komeresania.
3 Ngiisi úli mu yitonda mu kudeta, ali mu yikingira atafwe.
Si ngiisi úli mu yami vujuuka mu bitali nga byo, ali mu yishereeza.
4 Umwolo ali mu yifwija ikindu kirebe, si ndaahyo ali mu longa.
Si umundu woꞌmwete yehe, ngiisi byo ali mu looza, ali mu bilonga.
5 Umundu mwija ali mu shomba ibibeesha.
Si banangora-mabi boohe, bali mu tuma abandu bagabatyoza, noꞌkubahonyoleza.
6 Ngiisi úli mu gira íbikwaniini, biri mu múlanga.
Si banangora-mabi boohe, bali mu shereezibwa mu mabi gaabo.
7 Hali umundu úli mu yihaya kwo ali mugale, ndaanahyo ahiiti.
Ugundi ali mu yigira nga mukeni, kiziga ali naꞌkanyabungaka keꞌbindu!
8 Umugale, ikyanya ali mu teerwa, angakoleesa ubugale mu kuyiguluula.
Si umukeni yehe, ndaaye úli mu múbiika kweꞌkikando.
9 Abandu biija, bali mu tanguula bweneene!
Si banangora-mabi boohe, bali ngiꞌtara írizimiri.
10 Ikyanya umundu agweti agayiheemya, ali mu kizi longoola.
Si umwitegeereza ali mu yemeera ukuyerekezibwa.
11 Ibindu íbyatwibwa ku manyuku, biri mu mala duba.
Si ikyanya bali mu kuumania biniini-biniini, biri mu yushuuka.
12 Ikyanya umundu ali mu biika umulangaaliro kwiꞌgambo, linabe lyatinda, ali mu hebuura.
Si ikyanya ali mu libiika kwoꞌmulangaaliro, anayiji lilonga, iri alonga ubugumaana, anashambaale.
13 Ikyanya abandu bali mu gayiriza ihano, bali mu yiteera boonyene.
Si ngiisi ábali mu simbahana boohe, bali mu hembwa.
14 Amigirizo goꞌmwitegeereza, yo shyoko íri mu leeta ubugumaana.
Gali mu fuusa abandu mu mitego ya Narufu.
15 Abitegeereza bali mu longa ulushaagwa.
Si ábatali mu twazania boohe, bali mu kizi himbuka.
16 Umwitegeereza ali mu ba asobanukiirwi.
Si abahwija boohe, bali mu kizi yerekana ubuhwija bwabo.
17 Umutungwa mubi ali mu kizi leeta makuba.
Si umutungwa mwemeera, ali mu leeta ubukize.
18 Ngiisi útali mu twazania, ali mu herera mu bukeni, anateezibwe ishoni.
Si ngiisi úli mu yemeera ukuhanuulwa, ali mu kizi longa ulushaagwa.
19 Ikyanya umundu ali mu longa byo ashuba mu yifwija, umutima guli mu kizi shambaala.
Si umuhwija yehe, ikyanya wamúbwira kwo atwikire ku mabi gaage, ali mu yagalwa.
20 Ngiisi úli mu komeerana noꞌmwitegeereza, naye ali mu ba mwitegeereza.
Si úli mu kombeerana naꞌbahwija, ali mu longa amakuba.
21 Umundu, ikyanya ali mu gira ikyaha, ali mu yikululira amakuba.
Si ikyanya agira íbikwaniini, ali mu genduukirwa.
22 Umundu mwija, ali mu sigira abaana baage byo bagahyana, halinde na ku bijukulu.
Si umunabyaha yehe, ibindu byage biri mu singulirwa ábakwaniini.
23 Indalo yoꞌmukeni, hali ikyanya iri mu hemba bweneene!
Kundu kwokwo, abandu babi bali mu yiji múnyaga imimbu.
24 Umubusi, ikyanya atali mu hana umwana wage, iri amúshombiri.
Si ngiisi úkuuziri umwana wage, ali mu kizi múyerekeza ákiri mwanuke.
25 Umundu mwija ali mu lya, anayigute.
Si banangora-mabi, bali mu yama bashalisiri.