12
1 Ngiisi úli mu siima ukuyerekezibwa, ali mu kulongera mwoꞌbumenyi.
Si útali mu siima ukukanukirwa, ali mu ba muhwija.
2 Umundu mwija ali mu simiisa Nahano.
Si ngiisi úshungisiri amabi, Nahano ali mu múhana.
3 Ikyanya umundu ali mu gira amabi, atangasikama.
Si ngiisi úkwaniini, yehe, ali ngeꞌkiti íkiyisiizi imizi mwiꞌdaho.
4 Umukazi úli mu simbahana, ali mu ba lushembe lwa yiba.
Si umukazi úli mu genda úgateezania ishoni, yehe, ali mu ba nga ahiiti ikibungu mu mavuha gaage.
5 Ikyanya umundu mwija ali mu shungika, ishungi zaage ziri mu ba zitungiini.
Si banangora-mabi, boohe, amahano gaabo gali mu tebana.
6 Banangora-mabi bali mu deta amagambo goꞌkutata hiꞌgulu lyoꞌkuyitana.
Si abandu biija, amagambo gaabo gali mu kiza.
7 Ikyanya banangora-mabi bali mu fwa, bali mu yami hera lwoshi-lwoshi.
Si imbaga yoꞌmundu mwija, iri mu yama isikamiri.
8 Umundu, ikyanya ali mu ba noꞌbwitegeereze, ali mu yivugwa.
Si ngiisi úli mu shobeka amagambo, bali mu múkeneka.
9 Umukiga, iri angaba ali noꞌmukozi woꞌkumúkolera,
ye mukulu ku munabwidundulike útahiiti hyo agaalya.
10 Umundu mwija ali mu kuya-kuya ibitugwa byage.
Si banangora-mabi boohe, kundu bangagira mbu bakejeererane, iri banakiri balangi naaho.
11 Ngiisi úli mu lima noꞌmwete, ali mu kizi longa ibyokulya bingi.
Si ngiisi úli mu yishinga amagambo mazira kamaro, yehe ali muhwija.
12 Banangora-mabi bali mu yifwija íbyanyukulwa.
Si abandu biija boohe, bali mu haana ku byo bahiiti.
13 Banangora-mabi, ikyanya bali mu deta amabi, gali mu yami bagwata.
Si umundu mwija yehe, ali mu yiyeka naꞌmakuba.
14 Ikyanya umundu ali mu deta amiija, ali mu galongera mwoꞌbunguke.
Anali mu bulonga ku byo agweti agaagira naꞌmaboko gaage.
15 Umuhwija abwini kwo ali mu gira íbikwaniini.
Si umwitegeereza, yehe, ali mu yemeera ukuhanuulwa.
16 Umuhwija ali mu yami yerekana ubute bwage duba-duba.
Si umutuudu yehe, atali mu twaza ibitusi.
17 Umundu mwija ali mu tanga ubumasi bwoꞌkuli.
Si umulyalya yehe, ali mu tanga ubumasi bweꞌbibeesha.
18 Amagambo gaꞌmalyogo gali mu tumitana nga ngooti.
Si amagambo goꞌmwitegeereza, gali mu kiza.
19 Amagambo goꞌkuli gali mu yama ho imyaka neꞌmyakuula.
Si amagambo geꞌbibeesha, gali mu lenga duba nga kugohya.
20 Ikyanya abandu bashungisiri ukugira amabi, bali mu beesha-beesha.
Si ikyanya bali mu shungika umutuula, bali mu ba noꞌbushambaale.
21 Umundu mwija, ndaago makuba ágangamútibukira kwo.
Si banangora-mabi boohe, bali mu yama bali mu malibu.
22 Ikyanya abandu bali mu beesha, bali mu yagaza Nahano.
Si ikyanya bali mu deta ukuli, bali mu músimiisa.
23 Umwitegeereza atali mu yihaya ku bwitegeereze bwage.
Si umuhwija yehe, ali mu yami yitulikania mu kudeta ubuhwija bwage.
24 Ngiisi úli mu kola ku mwete, agakizi twala abaabo.
Si umwolo yehe, agazinda ukuhimbukira mu buja.
25 Ikyanya umundu ali mu gerania, ali mu shenguka naaho.
Si igambo lyeꞌshagayo lyohe, liri mu múshambaaza.
26 Umundu úkwaniini ali mu yegerezibwa naꞌbiira baage.
Si banangora-mabi boohe, abaabo bali mu yami bahabura.
27 Umwolo, ikyanya ali mu hiiva, anayite inyamiishwa, atali mu giyokya.
Si abanamwete boohe, ngiisi byo bali mu longa, bali mu bisiimira.
28 Ikyanya umundu ali mu lenga mu njira íkwaniini, ali mu longa ubugumaana.
Iyo njira itali mu mútwala mu lufu.