49
Min fɔra Amɔnkaw ta ko ra
1 Amɔn jamana ta ko:
Matigi Ala ko:
«Yala den tɛ Izirayɛli fɛ le wa?
Mɔgɔ t’a fɛ min b’a cɛn ta wa?
Mun kosɔn Amɔnkaw ta masacɛ ka Gadi mara mina?
Mun kosɔn a ta mɔgɔw sigira Gadi duguw kɔnɔ?
2 Ayiwa, wagati dɔ bɛna se,
Matigi Ala ko ten,
ne bɛna kɛrɛmankanw lawuri Amɔnkaw ta dugu kama, min ye Raba ye;
dugu bɛna kɛ yɔrɔ lakolon ye;
tasuma bɛna a kɛrɛfɛduguw bɛɛ jɛni.
O wagati ra minw tun ka Izirayɛli ta jamana bɔsi,
Izirayɛli fana bɛna olugu ta jamana bɔsi.
Matigi Ala ko ten.
3 «Hɛsibɔnkaw, aw ye kasi, sabu Ayi dugu cɛnna!
Raba dugumɔgɔw, aw ye kule,
aw ye bɔrɔfaniw siri aw yɛrɛ cɛ ra;
aw ye maɲumankokanw fɔ ka boribori ka kogow lamini,
sabu o bɛna Amɔnkaw ta masacɛ mina ka taga ni a ye,
ani a ta sɔnnikɛbagaw, ani jamana ɲamɔgɔw bɛɛ.
4 Aw mɔgɔ murutininw, mun kosɔn aw bɛ aw yɛrɛ bonyara aw ta dingakɔnɔyɔrɔw kosɔn,
aw ta dingakɔnɔyɔrɔw ta dugukolodimanw kosɔn?
Aw ka aw jigi la aw ta naforo le kan,
k’a fɔ ko: ‹Jɔn le bɛ se ka na ben an kan?›
5 A flɛ, ne bɛna siranya ben aw kan;
Matigi, Fangatigi Ala ko ten.
Siranya bɛna na ka bɔ aw fan bɛɛ ra;
o bɛna aw gbɛn, aw bɛɛ bɛ yɛrɛgɛ ka taga aw ta fan na,
mɔgɔ si tɛna boribagaw lajɛn.
6 «Nka o kɔ fɛ, ne bɛna Amɔnkaw ta jamana lasekɔ a cogokɔrɔ ra tuun. Matigi Ala ko ten.»
Min fɔra Edɔmu mara ta ko ra
7 Edɔmu mara ta ko:
Fangatigi Ala ko:
«O tuma hakiritigi tɛ Teman mara ra tuun le wa?
Ladibagaw banna o ta denw cɛ ra wa,
walama o ta hakiritigiya cɛnna le wa?
8 Aw ye aw kɔ don, ka bori,
aw ye taga to fɔ kuruwow kɔnɔnɔ yi,
aw Dedankaw!
Sabu ne bɛna cɛnri lase Esawu ta mɔgɔw ma;
o ta kojugu sarawagati lo.
9 Ni rɛzɛntigɛbagaw nana na aw fɛ,
o tɛna hali rɛzɛnden kelen bennin to o kɔ!
Ni sonw nana su fɛ,
fɛn o fɛn ka di o ye, o bɛna o bɛɛ ta!
10 Sabu ne kɔni bɛna Esawu ta mɔgɔw borolakolon le to;
ne bɛna o ta dogoyɔrɔw bɛɛ bɔ kɛnɛ kan,
o tɛna se ka dogo tuun.
Ne bɛna cɛnri lase o ta durujaw ma, ani o balemaw, ani o sigiɲɔgɔnw bɛɛ.
Mɔgɔ si tɛna to, min b’a fɔ ko:
11 ‹Aw ye aw ta feritaw to yi,
ne le bɛna o baro;
aw ta muso cɛ saninw ye o jigi la ne kan!› »
12 Matigi Ala ko: «A flɛ, kiti tun ma ben minw kan, ko o ye nin minnifɛn min, olugu bɛna a min. O tuma aw don, yala aw jarakibari bɛna to wa? Aw jarakibari tɛna to dɛ, aw fana ka kan k’a min.
13 Sabu ne bɛ kari ne yɛrɛ tɔgɔ ra, Matigi Ala ko ten, ko Bɔsira dugu ta ko bɛna kɛ jatigɛkoba ye, a bɛna kɛ mafiyɛnyarifɛn ye, ka kɛ tomo ye, ani yɔrɔ danganin. A kɛrɛfɛduguw bɛɛ bɛna kɛ tomow ye wagati bɛɛ, ka to ten.»
14 Ne ka kibaroya dɔ mɛn ka bɔ Matigi Ala fɛ;
a ka ciraden dɔ ci ka taga siya tɔw fɛ, ka taga a fɔ o ye ko:
«Aw ye aw yɛrɛ lajɛn ka na Edɔmu kama,
aw ye wuri ka na a kɛrɛ!
15 Edɔmukaw, ne bɛna aw dɔgɔya siya tɔw cɛ ra,
o tɛna aw jate ni adamaden tɔw ye.
16 «Aw ɲasiran min bɛ mɔgɔw ra, ani yɛrɛyira min bɛ aw jusu ra, o le ka aw lafiri,
aw minw tun siginin bɛ faraw cɛ ra,
aw minw tun bɛ kongoriw kunna.
Nka hali ni aw ka aw ta ɲaga la fɔ sanlegelege ra i ko bɔnw,
ne bɛna aw lajigi ka bɔ yi;
Matigi Ala ko ten.
17 «Edɔmu jamana bɛna kɛ yɔrɔ lakolon ye. Ni mɔgɔ o mɔgɔ nana tɛmɛ a kɔrɔ, o tigi dabari bɛna ban fɔ a bɛ filen fiyɛ, o ta tɔɔrɔw bɛɛ kosɔn.
18 Sodɔmu ni Gomɔri ni o kɛrɛfɛduguw halakira cogo min na, o cogo kelen na, mɔgɔ si tɛna sigi Edɔmu tuun, adamaden si tɛmɛtɔ tɛna jigi yi tuun; Matigi Ala ko ten.»
19 Matigi Ala ko:
«A flɛ, jara bɛ bɔ Zuridɛn kɔtuw ra cogo min na,
ka na ben bɛganw kan bɛganmarayɔrɔ ɲumanmanw na,
ne fana bɛna Edɔmukaw gbɛn o cogo le ra,
ka bɔ o ta jamana ra yɔrɔnin kelen na.
Ne yɛrɛ bɛna mɔgɔ dɔ ɲini min bɛna a ta fanga sigi o kan;
sabu jɔn le bɛ se k’a yɛrɛ suma ni ne ye?
Jɔn le bɛ se ka ne ɲininka ne ta kɛta ra?
Sagagbɛnbaga juman le bɛ se ka lɔ ka ne kɔnɔ?
20 «O ra, Matigi Ala ka ko min latigɛ Edɔmukaw kama,
ani a ka fɛn min labɛn Temankaw kama, aw ye o lamɛn!
Sigiya t’a ra, o bɛna o sama ka taga ni o ye i ko sagaden barakantanw;
sigiya t’a ra, o bɛna o ta jamana halaki k’a kɛ yɔrɔ lakolon ye.
21 O bentɔ mankan kosɔn, dugukolo bɛ yɛrɛyɛrɛ;
o kuletɔ mankan bɛ se fɔ Kɔgɔjiwulen ma.
22 A flɛ, a bɛ i ko bɔn dɔ le bɛ tɛmɛna san fɛ,
a b’a kamanw yanganna Bɔsira dugu kunna.
O lon na, Edɔmu jamana cɛfariw jusukun bɛna kɛ
i ko muso jigibagatɔ jusukun.»
Min fɔra Damasi dugu ta ko ra
23 Damasi dugu ta ko:
«Hamati ni Aripadi dugumɔgɔw maroyara,
sabu o ka kibarojugu mɛn.
O baraka bɛɛ banna,
o hakiri wurira,
ka kɛ i ko kɔgɔji min tɛ se ka mala.
24 Damasi dugumɔgɔw baraka dɛsɛra,
o ka o kɔ don ka bori.
O ja wurira;
kɔnɔnɔfiri ni dimi barara ka o mina,
i ko muso jigibagatɔ ta dimi.
25 E, mun le nana a to mɔgɔ bɛɛ banna Damasi ra sa,
nin dugu tɔgɔba,
ne tun bɛ ɲagari dugu min kosɔn?
26 O kosɔn o ta kanbelenw bɛna benben ka sa jamalajɛnyɔrɔw ra,
o ta kɛrɛkɛcɛw si mankan tɛna mɛn tuun o lon na.
Fangatigi Ala ko ten.
27 Ne bɛna tasuma don Damasi dugu laminikogo ra,
ka Bɛni Hadadi ta masabonbaw jɛni.»
Kedari ni Hazɔri ta maraw ta ko
28 Kedari mara ta ko, ani Babilɔni masacɛ Nebukadinɛsari tun benna Hazɔri mara minw kan, ka o kɛrɛ, nin le fɔra olugu ta ko ra:
Matigi Ala ko:
«Aw ye wuri ka taga Kedari kama,
aw ye taga cɛnri kɛ terebɔyanfan mɔgɔw fɛ.
29 O juguw ye o ta fanibonw ni o ta bɛganw bɛɛ cɛ,
ka o ta fanibonw datugufaniw, ani o ta minanw bɛɛ cɛ,
ka o ta ɲɔgɔmɛw mina!
Mɔgɔw y’a fɔ o ma ko: ‹Siranyakobaw bɛ aw fan bɛɛ ra!›
30 Aw ye bori ka taga joona,
aw ye taga dogo dingadunbaw kɔnɔ, ka to yi,
aw Hazɔrikaw!
Matigi Ala ko ten.
Sabu Babilɔni masacɛ Nebukadinɛsari ka ko dɔ latigɛ aw kama,
a ka fɛn dɔ labɛn aw kama.
31 «Aw ye wuri ka taga ben siya dɔ kan,
siya min siginin bɛ hɛra ni laganfiya ra;
Matigi Ala ko ten.
Datugunan tɛ o ta dugu donda ra, sɔgɔnan t’a ra;
o siginin bɛ o kelen na, o danna.
32 O juguw bɛna o ta ɲɔgɔmɛw mina,
ka taga ni o ta bɛgankuru caman bɛɛ ye.
Ne bɛna o fiyɛ ka o janjan ka taga fan bɛɛ ra,
o mɔgɔ minw bɛ o bonbosi kɛrɛfɛyɔrɔw li;
ne bɛna cɛnri ben o kan ka bɔ fan bɛɛ ra,
Matigi Ala ko ten.
33 O tuma Hazɔri mara bɛna kɛ kongowuruw dogoyɔrɔ le ye,
ka kɛ yɔrɔ lakolon ye tuma bɛɛ;
mɔgɔ si tɛna sigi yi tuun,
adamaden si tɛmɛtɔ tɛna jigi yi tuun.»
Min fɔra Elamu mara ta ko ra
34 Nin ye Matigi Ala ta kuma ye, a ka min fɔ cira Yeremi ye Elamu mara ta ko ra; o kɛra Zuda masacɛ Sedesiyasi ta masaya damina ra; a ko:
35 Fangatigi Ala ko:
«A flɛ, ne bɛna Elamukaw ta kalan kari,
sabu o le ye o ta baraka sɔrɔsababu ye.
36 Ne bɛna fɔɲɔ naani lana Elamu mara kan,
ka bɔ sankolo fan naani na.
Ne bɛna Elamukaw fiyɛ ka o janjan ka taga fan bɛɛ ra.
Jamana tɛna kɛ yi,
ni Elamuka dɔw tɛna mina ka taga jamana min na.
37 Ne bɛna siranya bla Elamukaw ra k’a to o ye yɛrɛyɛrɛ o juguw ɲa kɔrɔ,
o minw bɛ o fagayɔrɔ ɲinina.
Ne bɛna kojugu ben o kan,
ne ta dimiba kosɔn;
Matigi Ala ko ten.
Ne bɛna o nɔgbɛn ni kɛrɛkɛmuru ye,
fɔ ka taga o bɛɛ faga ka ban pewu.
38 Ne bɛna ne ta masasiginan sigi Elamu mara kɔnɔ,
ka o ta masacɛ ni o ta ɲamɔgɔw halaki;
Matigi Ala ko ten.
39 Nka wagati nataw ra,
ne bɛna Elamu mara lasekɔ a cogokɔrɔ ra tuun;
Matigi Ala ko ten.»