48
Min fɔra Mohabukaw ta ko ra
1 Mohabu jamana ta ko:
Fangatigi Ala, Izirayɛli ta Ala ko:
«Bɔnɔ ka Nebokaw sɔrɔ, sabu o ta dugu cɛnna,
Kiriyatayimukaw maroyara, sabu o ta dugu minana;
minw tun siginin bɛ bonba barakamanw kɔnɔ, olugu maroyara, jatigɛ ka o mina.
2 «Mohabu jamana ta bonya bɛɛ bɔra a kan!
O bɛ kojugu le labɛnna a kama, Hɛsibɔn.
O ko: ‹Aw ye na, an y’a halaki k’a tɔgɔ bɔ siya tɔw cɛ ra!›
Aw Madimɛnikaw, aw fana mankan tɛna mɛn tuun;
sabu kɛrɛkɛmuru bɛ nana aw kɔ.
3 «Kulekan dɔ bɛ bɔra Horonayimu
cɛnri, ani halakiriba bɛ yi.
4 Mohabu jamana cira,
a denw bɛ kulera.
5 O yɛlɛntɔ ka taga Luhiti, o bɛ kasi;
o kasitɔ le bɛ yɛlɛn.
Mɔgɔ deguninw kulekan le bɛ bɔra,
Horonayimu sira jigijigi ra, halakiri kosɔn.
6 Aw ye bori ka aw yɛrɛ kisi,
aw ye taga to kongokolon kɔnɔ ka kɛ i ko kongofaliw.
7 «Aw ka aw jigi la aw yɛrɛ ta baara ni aw ta naforo le kan minkɛ,
o kosɔn, o bɛna aw fana mina;
Kemɔsi fana bɛna mina k’a labɔ jamana kɔnɔ,
ani a sɔnnikɛbagaw, ani a ɲamɔgɔw bɛɛ.
8 Cɛnrikɛbagaw bɛna ben dugu bɛɛ kelen kelen kan;
dugu si tɛna bɔsi.
Kurufurancɛw bɛna halaki,
kɛnɛgbɛyɔrɔw bɛna cɛn.
Matigi Ala ka o le fɔ.
9 «Aw ye kamanw di Mohabukaw ma,
janko o ye wuri ka taga!
Sabu o ta duguw bɛna kɛ yɔrɔ lakolonw ye;
mɔgɔ tɛna sigi o duguw kɔnɔ tuun.
10 Mɔgɔ min bɛ Matigi Ala ta baara kɛ ni farifaga ye,
Matigi Ala ye o tigi danga!
Mɔgɔ min bɛ a ta kɛrɛkɛmuru bari mɔgɔfaga ma,
Matigi Ala ye o tigi danga!
11 «Mohabukaw tun ɲasumanin lo kabini o denmisɛnman;
o tun bɛ i ko duvɛn ɲamalɔnin min buruburu sigira a jukɔrɔ,
min ma yɛlɛma ka bɔ minan dɔ kɔnɔ k’a don dɔ wɛrɛ kɔnɔ.
O ma deri ka mina ka bɔ o ta jamana ra ka ye;
o kosɔn o ta timiya tora o ra,
a kasa fana ma yɛlɛma.
12 «O kosɔn lon dɔ bɛna se, Matigi Ala ko ten, o lon na ne bɛna mɔgɔ dɔw ci ka na o yɛlɛma. O bɛna o yɛlɛma ka bɔ minanw kɔnɔ, ka dagaw cici.
13 O tuma ra Mohabukaw ta Kemɔsi ko maroya bɛna olugu yɛrɛ sɔrɔ, i n’a fɔ Betɛli ta ko maroya tun ka Izirayɛlimɔgɔw sɔrɔ cogo min na, sabu o tun ka o jigi bɛɛ la o yɔrɔ le kan.»
14 E, yala aw bɛ sɔn k’a fɔ ko aw ye cɛfariw le ye wa,
ko aw ye kɛrɛkɛcɛ jagbɛlɛnw le ye?
15 Mohabu jamana cɛnna pewu!
O juguw bɛ benna o ta duguw kan.
O ta kanbelendenw bɛɛ ra barakamanw le bɛna mina ka taga ni o ye o fagayɔrɔ ra.
Masacɛ le ko ten, masacɛ min tɔgɔ ye ko Fangatigi Ala.
16 Mohabu jamana halakiwagati bɛ ɲini ka se;
a ta bɔnɔ lon bɛ teliyara ka na.
17 Aw minw bɛɛ ye a lamini mɔgɔw ye, aw ye kasi a kunna.
Aw minw bɛɛ tun k’a tɔgɔ bonya ko mɛn,
aw y’a fɔ ko: E, nin masacɛbere barakaman le karira wa!
Nin bere nɔɔrɔman le karira wa!
18 Aw ye jigi ka bɔ aw ta bonya cɛ ra;
aw ye sigi dugukolo jalan kan,
aw Dibɔn dugumɔgɔw,
sabu Mohabu jamana halakibaga bɛ nana aw kama,
a bɛna aw ta masabonbaw cici.
19 Aw Arowɛri dugumɔgɔw,
aw ye lɔ sirada ra ka kɔrɔsiri kɛ;
cɛ minw bɛ borira, ani muso minw bɔsira
aw ye olugu ɲininka ko: Mun le kɛra?
20 Mohabukaw maroyara, sabu o benna.
Aw ye maɲumankokanw fɔ ka kule!
Aw y’a fɔ Arinɔn kɔda ra
ko Mohabu jamana cɛnna.
21 Ala ta kiti benna kɛnɛgbɛyɔrɔ jamana kan, ani Holɔn, ani Yahasa, ani Mefaati,
22 ani Dibɔn, ani Nebo, ani Bɛti Diblatayimu,
23 ani Kiriyatayimu, ani Bɛti Gamuli, ani Bɛti Mehɔn,
24 ani Keriyɔti, ani Bɔsira, ani Mohabu jamana dugu tɔw bɛɛ kan, minw yɔrɔ ka jan, ani minw yɔrɔ ka surun.
25 «Mohabukaw gban karira,
o boro karira,
Matigi Ala ko ten.»
26 «Aw ye o lamin, fɔ ka o ɲanamini, sabu Mohabukaw ka o yɛrɛ bonya Matigi Ala ɲa kɔrɔ. O ye ben ka kolonkolon o ta fɔɔnɔ ra, olugu fana ye kɛ yɛrɛkofɛn ye.
27 Yala aw tun ma Izirayɛlimɔgɔw kɛ yɛrɛkofɛn ye wa? Yala olugu tun minana sonyari le ra wa, fɔ ni aw tun bɛ o ko fɔ, aw bɛ aw kun kɔmikɔmi o ra?
28 Aw ye bɔ duguw kɔnɔ
ka taga sigi farakuruw cɛ ra,
aw Mohabukaw!
Aw ye kɛ i ko tugani
min bɛ a ta ɲaga la dingakolonbaw dakun kan.
29 An tun ka Mohabu jamana ta yɛrɛbonya ko mɛn,
o ta yɛrɛbonya dama tɛmɛnin,
o ta wasoya, ani o ta yɛrɛbonya, ani o ta yada;
o tun bɛ o yɛrɛ fisaya tɔw ma.
30 «Ne ka o ta yɛrɛyira lɔn, Matigi Ala ko ten, nka gbansan lo; o ta yɛrɛbonya fana ye gbansan le ye.»
31 O kosɔn ne bɛ kasi Mohabu kosɔn,
ne bɛ kule Mohabu jamana bɛɛ lajɛnnin kosɔn;
ne bɛ ŋuna Kiri Hɛrɛsi dugumɔgɔw kosɔn.
32 E, Sibima dugu ta rɛzɛnforo, ne bɛ kasi min kɛ ele kosɔn,
ne tɛ o kasi ɲɔgɔn kɛ Yazɛri ta mɔgɔw kosɔn.
Ele yiriborow tun janyara fɔ ka Kɔgɔji sanin cɛtigɛ,
ka se fɔ Yazɛri ta kɔgɔji ma;
nka cɛnrikɛbaga nana ben aw ta samiyayiridenw, ani aw ta rɛzɛnmɔw kan.
33 Ninsɔndiya ni ɲagari banna Mohabu yiriforow ra,
ani a jamana yɔrɔ tɔw ra.
Ne ka rɛzɛnjiw ja o ta minanw kɔnɔ.
Mɔgɔ si ɲagaritɔ tɛna rɛzɛn forogi ka to ka kule ci tuun;
kulecikan tɛ yi tuun!
34 «O kasikan bɛ bɔra, k’a ta Hɛsibɔn ka taga a bla fɔ Elale; o kan bɛ mɛnna fɔ Yahasi, k’a ta Sowari ka taga se fɔ Horonayimu, ani ka taga se fɔ Egilati Selisiya. Sabu hali Nimirimu jiw, o bɛɛ jara.
35 «Minw bɛ sarakaw bɔ sɔnnikɛyɔrɔw ra, ka wusunan sarakaw* bɔ o ta alaw ye, ne bɛna olugu halaki ka o ban pewu Mohabu jamana kɔnɔ; Matigi Ala ko ten.
36 «O kosɔn ne bɛ ŋunana Mohabu jamana kosɔn i ko sangadɔnkirilabaga ta filenfiyɛkan; ne bɛ ŋunana Kiri Hɛrɛsi dugumɔgɔw kosɔn i ko sangadɔnkirilabaga ta filenfiyɛkan, sabu o tun ka naforo minw lajɛn, o bɛɛ tagara.
37 Bɛɛ kun lira, bɛɛ bonbosi lira, murunɔ bɛ bɛɛ boro ra, bɔrɔfaniw bɛ bɛɛ cɛ ra.
38 Sangakasikan le bɛ biribon bɛɛ kunna, ani jamalajɛnyɔrɔw bɛɛ ra Mohabu jamana kɔnɔ, sabu ne ka Mohabu jamana ci i ko dagakolon. Matigi Ala ko ten.
39 E, Mohabu benna! Aw ye kasi! Mohabukaw maroyaninba ka o kɔ don. Mohabukaw ta ko kɛra yɛrɛko ko ye, ani jatigɛkoba, o ta jamana lamini mɔgɔw bɛɛ fɛ.»
40 Matigi Ala ko: «A flɛ, a bɛ i ko bɔn dɔ le bɛ tɛmɛna san fɛ; a b’a kamanw yanganna Mohabu jamana kunna.
41 Keriyɔti dugu minana,
o ka masabonbaw bɔsi;
o lon na Mohabu jamana cɛfariw jusukun bɛna kɛ
i ko muso jigibagatɔ jusukun.
42 «Mohabu jamana bɛna halaki ka bɔ siya tɔw cɛ ra,
sabu o ka o yɛrɛ bonya Matigi Ala ɲa kɔrɔ.
43 Jatigɛ, ani dingaba, ani jɔ,
o le bɛ aw Mohabukaw ɲa;
Matigi Ala ko ten.
44 Ni min ka bori jatigɛ ɲa
o bɛ ben dingaba kɔnɔ,
ni min ka bɔ dingaba kɔnɔ
o bɛ mina jɔ ra;
sabu ne bɛna o ta hakɛsarasan kiti ben o kan,
Mohabukaw ta hakɛsarasan;
Matigi Ala ko ten.
45 Boribagaw bɛ taga lɔ Hɛsibɔn dugu suma ra,
o y’a sɔrɔ o baraka banna,
sabu tasuma dɔ bɛ bɔra Hɛsibɔn,
tasumamana dɔ bɛ bɔra Sihɔn ta dugu cɛ ma;
a bɛ Mohabu jamana kɛrɛfɛyɔrɔw jɛni,
ka o mɔgɔ hinabariw kuncɛ jɛni.
46 «E, bɔnɔ bɛna aw sɔrɔ, aw Mohabukaw!
Kemɔsi ta mɔgɔw halakira;
sabu aw dencɛw minana ka taga jamana wɛrɛ ra,
aw denmusow fana minana.
47 Nka wagati nataw ra,
Matigi Ala ko ten,
ne bɛna Mohabu jamana lasekɔ a cogokɔrɔ ra tuun.»
Matigi Ala ka kiti kuma min fɔ Mohabu ta ko ra, o kuma bɛ laban yan.