7
ዎዳላይ:
1 ካትያ ናትዳን ሎእያኔ!
ነ ገደቱ ኔን ናጻላ ጫማ ዎꬅ ደእሽን በእያ ዎደ፥
አያ ሎኢኖ! ነ ሼቺ ኤራንቻ ዎጋጪ ቆጺደ፥
ሎይꬅ አሌቂሴዳ እንቁዋ ማላቴ።
2 ነ ጉልአይ ዎይንያ ኤሳይ ኩሜዳ ብርልያ ማላቴ፤
ነ ጼሳ ዩሹ ጪሻን ቃሸቴዳ ዛርጋ ምርቂያ ማላቴ።
3 ነ ꬋንꬃቱ ማንትያ የለቴዳ፥ ገንአት ማራቱዋ ማላቲኖ።
4 ነ ቆꬊ ዳንጋርሳ ዛልያን አሌቀቴዳ አዱሳ ግምቢያ ማላ።
ነ አይፊ ዎልቃማ ሀሰቦና ካታማ ፐንግያ ማታን ደእያ፥
ዜሩዋ ሃꬃ ማላቴ።
ነ ሲꬊ ዳማስቆ ጼልሲደ ግምቤዳ ሊባኖሳ ግምቢያ ማላቴ።
5 ነ ሁጲ ቃርመሎሳ አሳ ማላቴ፤
ነ ኦላሳ ብናናይ ቃጭና ጻꬃ ማላቴ፤
ካትያካ ነ ሁጲያ ዳꬃይ ናሸቼዳ።
6 ታ ሲቃቴ፥ ነ አያ ሎአይ! ነ አያ ማላንቻቲ!
ነ ሲቁ ታና አያ ናሸቺ!
ታንነ ኔንነ ጻላላይ
(7:7—8:4)
7 ነ ጌሳይ ዛምባ ጌሳ ማላቴ።
ነ ꬋንꬃይ ዛምባ አይፍያ ዉርጩዋ ማላቴ።
8 ታን፥ ሀ ዛምባ ግአና፤ አ ማራቱዋ ኦይቃና ያጋድ።
ነ ꬋንꬃይ ዎይንያ ቴራ ዉርጩዋ ማላ፤
ቃይ ነ ሲꬍያና ከስያ ፔኑ አፕልያ አይፍያዳን ሳዌ።
9 ነ የሩ መተርሻቱዋፐነ አቻፐ ግዱዋና፥
ዋላላቲደ ገልያ ዎይንያ ማላ፥
ወዶራታ:
ኡባፐ አꬊደ ማልእያ
ዎይንያ ኤሳ ማላ ያጌዳ።
10 ታን ታ አልኦ ሲቁዋኖ፤ እካ ታና አሞቴ።
11 ታ ሲቆዉ፥ ሃያ፤ ላኡ ካታማፐ ከሲደ ቢደ፥
ጋጻርያን አቆይተ፤ ቃማ ላኡ ሄዋን አꬃና።
12 ዎንታ ጉራን አነ ዎይንያ ቱራ ግዶ ቦይተ፤
ዎይንያ ቱራይ ጪሼደንቶ፥ ጪሺደ አይፍያ ዶርጾጼደንቶነ፥
ቃይ ሮማኒካ አይፌደንቶ አነ በኦይተ።
ታን ታ ሲቁዋ ኔና ሄዋን በሳና።
13 እንኮይያ አይፍያ ሳዉነ ሀራ ናሸችያ አታክልትያ አይፊ፥
ኑ ካረን በሴዳ፤ ታ ሲቆ!
ሀ አይፈቱዋፐ ቴሬዳዋንታነ ኦራꬃ ማጼዳዋንታ፥
ነዉ አሻ ዎꬃድ።