8
1 ነ ታዉ አላጋ ግደናን ታ ዳይ ꬋንꬃ ꬋሜዳ ታ እሻ ግዳርኪሻ!
ያትንቶ ታን ኔና ኦግያን ደማደ ሺሻ አካ የርና፥
ታና ኦንነ ቦረናሽን።
2 ታና ታማርሴዳ ታ ዳይ ጎለ ታን ኔና ካለꬃደ፥
ታ ዳይ ቆልኦ ገልሳ አግና፥
ሄዋን ታና ነ ሲቁዋባ ታማርሴዳዋ ግዳርኪ፤
ሮማንያ ጉምኤዳ ማልእያዋ፥
ሎእያ ዎይንያ ኤሳ ታን ኔና ሄዋን ኡሻርክታ።
3 ታና ሄዋን ነ ሀድርሳ ቄስያ ቦርኮትሳደ፥
ነ ኡሸቻ ኩሽያን ታና ቆሜዳዋ ግዳርኪ።
4 ህንተኖ የሩሳላመ ዎዶራቶ፥
ሲቁ ባረ ዎድያን ደንዳናዉ፥ ቃሰꬅ ደንናዳን፥
ታ ህንተዉ ሀዳራ ጋይ ያጋዱ።
ሲቁዋ ሳባ
(8:5-14)
የሩሳላመ ዎዶሮቱ:
5 ባረ ሲቁዋ ሀሽያን ዘምፓደ፥
ባዙዋፐ ይያና ሀና ኦኔ? ያጌድኖ።
ወዶራታ:
በን ነ አታ ኔና ባንካ የሌዳ፥
አፕልያ ላንቂያን ነ ግሳ ደእሽን፥
ኔና ታ ቃሰረꬃደ ደንꬃድ።
6 መꬍና ሲቁዋን ታና ነ ዎዛና ቦላ አታማ፤
ነ ቀስያንካ ማታፋዳን፥ ታ ጻላላ ኦይቃ።
አያዉ ጎፐ፥ ሲቁ ሀይቁዋ ማላ ምና፤
ምሹካ ዱፉዋ ማላ መቀꬃ ኢታ፤
አ ላጩካ ጾሳ ታማ ላጩዋ ማላ።
7 ሃꬃ ዳሩ ሲቁዋ ታማ ቶይሳናዉ ዳንዳየና፤
ድኡካ ሜጪደ አፋናዉ ዳንዳየና።
አሳይ ሲቁዋ ሻማናዉ ባረዉ ደእያ አቁዋ ኡባ እሞፐካ፥
ሲቁ ሻሉዋን ሻመተና ድራዉ፥
አሳይ ሄዋ ካꬌ ያጋዱ።
ዎዶራት እሻቱ:
8 ኑዉ ትራን ꬋንꬃይ ኡትቤና ምቻታ ደአዉ፤
አስናይ እዞ ኦቾፐ፥ ኑን እዉ ኦꬃናዌ አዬ?
9 እዛ ግምቢያ ድርሳ ግድንቶ፥ ኑን እ ቦላ ዎችያ አዱሳ፥
ብራ ግምቢያ ግምባና፤ አ ድርሳ ፐንገ ግድንቶ፥
ዝጋ ሳንቃን እዞ ዶድሳና ያጌድኖ።
ወዶራታ:
10 ሄኮ ታን ድርሳ ግምቢያ፤
ታ ꬋንꬃይካ ግምቢያ ቦላ ግምበቴዳ ዎችያ ሳ፤
ሄዋ ድራዉ፥ ታን ታ ሲቁዋና ደእያ ዎደ፥ እ ታናን ናሸቴ።
11 ሶሎሞነዉ ባኣል-ሀሞናን ዎይኒ ቶከቴዳ ሾይቃይ ደኤ፤
ሄ ዎይንያ ግዱዋ ኦꬅያዋንቶ ከራ እሜዳ።
ከራ አኬዳዋንቱ ቴራን ጎኤቴዳዋ ድራዉ፥
ሁጲያን ሁጲያን ሻኡ ብራ አዉ አሂኖ።
12 ሽን ታዉ ታ ቡዞ ዎይኒ ቶከቴዳ ሾይቃይ ደኤ፤
ሶሎሞና፥ ኔን ሻኡ ብራ አካ፤
አታክልትያ ኦꬅያዋንቱ ላኡ ጼቱ ብራ አክኖ ያጋዱ።
ዎዳላይ:
13 ኔኖ፥ አታክልትያ ግዶን ደእያ ታ ሲቃቴ፥
ነ ኮሻ ላገቱዋ ስሳናዉ ኮዪኖ፤
ነ ኮሻ ታና ስሳ ያጌዳ።
ወዶራታ:
14 ታ ሲቆዉ፥ ታኮ ኤለካ ሃያ!
ሳዊያ ማታይ ሞክያ ደረቱዋ ቦላና፥
ጉፕያ ገንእያ ዎይ ዶግያ ማራቱዋ ማላታደ ያጋዱ።