6
ሲቁ ኡባፐ ዶረቴ
(6:1—7:6)
የሩሳላመ ዎዶሮቱዋ:
1 ማጫ አሳ ኡባፐ ማላንቻቴ!
ነ ላጊ ሀቃ ቤዴ? ኑንካ ኔናና እትፐ ኮያናዉ፥
እ ቤዳ ሳ ኑዉ ኦዳ ያጌድኖ።
ወዶራታ:
2 ታ ሲቁ ዶርሳ ዉድያ ሄማናዉነ፥
ሎእያ ጪሻ ሺሻናዉ፥
ሽቱዋ ሳዉዋ ማታይ ደእያ አታክልትያ ግዶ ዎꬌዳ።
3 ታን ታ ሲቁዋኖ፤ ታ ሲቁካ ታዋ።
እ ጪሻ ግዶን ዉድያ ሄሜ ያጋዱ።
ዎዳላይ:
4 ታ ሲቃቴ! ኔን ትርጻ ካታማይ ሎእያዋዳን ሎኣሳ፤
የሩሳላመዳን ዳሮ ሎኣሳ፤ ባንድራ ኦይቂደ፥
ሳልፕያን ብያ ኦላንቻይ ያሽያዋዳን ያሻሳ።
5 ሀያና ነ አይፍያ ታፐ ዎራ ዛራርኪ፥
አያዉ ጎፐ፥ ኡንቱንቱ ታና ዋይሲኖ።
ነ ብናናይ ጋላኣደ ደርያፐ ዎꬍያ ዴሻ ዉድያ ማላቴ።
6 ነ አቻይ ሜጨቲደ ከስያ፥ ኡባይካ ማንትያ የልያ፥
ኡንቱንቱ ግዶን ማይኒ ባይና ዶርሳ ዉድያ ማላ።
7 ነ ላኡ ጋጮቱዋ ሻርቢያ ግዱዋና ጼልያ ዎደ፥
ላኡ ከሴዳ ሮማንያ ቴራ ማላቲኖ።
8 ኡሱፑን ታሙ ማጫ ካተቱነ ኡሱፑን ታሙ ባኮቱ፥
ቃይ ፓይዱ ባይና ዎዶሮቱ ታዉ ደኢኖ።
9 ሽን ታ ሀራጳታ፥ ታ ቶሺ ባይናና፥ አ ታዉ ዱማ።
አ ባረ አትስካ መጽ እትኖ፤
እዞ የሌዳ አታካ አያፐነ አꬃደ እዞ ሲቃዉ።
ዎዶሮቱካ እዞ ጼሊደ፥ ሀና አንጀቴዳኖ ያጊኖ።
ማጫ ካተቱካ ባኮቱካ እዞ ሳቢኖ።
የሩሳላመ ዎዶራቱዋ:
10 ሀና ዎንታ ጻልቂያዳን ዶልያና፥ አግናዳን ፖእያና፥
አዋዳን ጫድያና፥ ባንድራ ኦይቂደ ሳልፕያን ብያ ኦላንቻዳን፥
ያሽያና እዛ ኦኔ? ያጊኖ።
ዎዳላይ:
11 ታን ዎምባን ቶከቴዳ ምꬃቱ ልጩዋ በአናዉ፥
ዎይንያ ቱራይ አጬደንቶነ ቃይ ሮማኒካ ጪሼደንቶነ ጼላናዉ፥
ዱገ አታክልትያ ሳኣ ዎꬋይ።
12 ታን አኬከናን ደእሺና፥ ታ አሙ ታና አፊደ፥
ታ ካትያ ማታን፥ ፓራ ጋርያን ታና ኡትሴዳ ያጌዳ።
የሩሳላመ ዎዶሮቱዋ:
13 ኔኖ ሹላመ ቢታፐ ዬዳዉነ፥ ሃያ፤
ሃ ስማ! ኔና ኑ ሎይꬂደ ጼላና፤ ሃ ስማ! ያጌድኖ።
ወዶራታ:
ዳሮ አሳ ስንꬃን የጽያ አሳዳን፥ ታኮ አያዉ ጼሊቴ? ያጋዱ።