5
ዎዳላይ:
1 ታ ሲቆ ምቻቶ ግድያ ታ ምሽራተ፥
በአ፤ ታን ታ አታክልትያ ግዶ ገላድ።
ታ ካርቢያነ ታ ሽቱዋ ጪሻ ቆራይ።
ኤሳ ኡክꬃ ዮልታያደ ማይ።
ታ ዎይንያ ኤሳነ ታ ማꬃ ኡሻይ ያጌዳ።
የሩሳላመ ዎዶራቱ:
ህንተኖ፥ አ ላገቶ፥ ሲቁዋ አላና ጋካናዉ ኡሽተ ያጌድኖ።
ወዶራታ:
2 ታን ቃማ ገምእሻድ፤ ሽን ታ ዎዛናይ ቤጎት ኡቴዳ።
ታ አኩሙዋን ታ ሲቁ ሀዋዳን ያጊደ፥
ፐንግያ ቆጺና ስሳድ፤ ታ ሙሹራቴ፥ ታ ሲቃቴ፥
ኔናን ዎꬅያዌ ባይና ታ ሀራጳተ፥ ታዉ ካርያ ዶያ፤
ታ ሁጲ ከተርሳን ካኤዳ።
ታ ብናናይካ ቃማ ፑስያን ናርካኬዳ ያጌ።
3 ታን፥ ታ ማዩዋ ቃራ ድጋድ፤ ዛራ ማዮየ?
ታ ገድያ ሜጨታ ክቻድ፤ ዛራደ ኡርቃዮየ? ያጋድ።
4 ታ ሲቁ እፍꬃ ጾእያና ባረ ኩሽያ ጎለ የዴዳ፤
ታ ዎዛናይ አ ድራዉ ፖድ ፖዴ።
5 ያትና፥ ታ ሲቆ ካርያ ዶያናዉ ደንዳድ።
ካርያ ዶይያ ኩልቡዋ ታን ኦይቂያ ዎደ፥
ታ ኩሽያፐ ካርቢ፥ ታ ብራꬍያፐ ሽቱ ጾኬ።
6 ታ ሲቆ ካርያ ዶያድ፤ ሽን ዶይያ ዎደ እ ባዋ ብ ክቼዳ።
አ ኮሻ ስሳናዉ ሎይꬅ አሞታድ።
ምንꬃደ አ ኮያድ፤ ሽን ደማናዉ ዳንዳያበይከ።
ጼጋድ፤ ሽን ታዉ ኮይቤና።
7 ዩዪደ ካታማ ናግያዋንቱ ታና ደሚደ፥
ዋꬌድኖነ ማዱꬄድኖ፤
ካታማ ድርሳ ናግያዋንቱ ታ ቁማዩዋ ቃር አኬድኖ።
8 ህንተኖ የሩሳላመ ጌላዮቶ፥ ታ ሲቁዋ ደሞፐ፥
ታን አ ሲቁዋፐ ደንዴዳዋን ሀርግያዋ፥
ሀዳራ፥ አዉ ኦድተ ያጋዱ።
የሩሳላመ ዎዶራቱ:
9 ኔኖ፥ ማጫ አሳ ኡባፐ አꬌዳ ማላንቻቴ!
ነ ሲቁ ቱሙ ሀራቱዋፐ ዋን ዱማቲ?
ኔን ሀዋ ኬሻ ኑና ጫልያዌ፥
እ ሀራቱዋፐ ዱማትያዌ አያኔ? ያጌድኖ።
ወዶራታ:
10 ታ ሲቁ ዳሮ ሎእያዋነ ምና፤
ታሙ ሻኡ አቱማ አሳ ግዶን አ ማል ባዋ።
11 አ ሁጲ ዎርቃ ሉልያ ማላቴ፤
አ ብናናይካ ሎአነ ቁሩዋ ማላ ካረꬃ።
12 አ አይፊ ሻፋ ላንቂያን ኤቄዳነ፥
ማꬃን ሜጨቴዳዋ ማላትያ ሀራጰቱዋ ማላቴ።
13 አ ጋጮቱካ ሳዉዋ ማታይነ፥
ቅማሚ ቶከቴዳ አታክልትያዳን ሎኢኖ፤
አ መተርሻቱ ካርቢያ ሽቱ ጾክያ ዎራ ጪሻዳን ሎኢኖ።
14 አ ኩሸቱ እንቁዋን አሌቀቴዳ ዎርቃ ጻምኣዳን ሎኢኖ፤
አ አሳተꬃይ ሳምፔርያ ግያ እንቁዋን አሌቀቴዳ፥
ዳንጋርሳ አቻ ማላ።
15 አ ገደቱ ዎርቃ ባሱዋን ቶከቴዳ፥
እብናባራድያ ቱሳ ማላቲኖ፤
አ ማላይ ዝጋን አሌቀቴዳ ሊባኖሳ አሳ ማላ።
16 አ ዶናይ ኤሳዳን ማልኤ። እ ኡባናካ ሎእያዋ።
ህንተኖ የሩሳላመ ዎዶራቶ፥
ታ ሲቁነ ታ ላጊ ሀዋ ማላቴ ያጋዱ።