57
ማዱዋ ደማናዉ ሺቄዳ ዎሳ
ዛማረቱዋ ካፖ፥ ጎንጎሎ ግዶፐ ሳኦላፐ ባቃቲደ ብ ስምና ዳዊታ ዎሳ። “ꬋይሶፓ” ጌተትያ ዎሳን የጸቴዳ ዎሳ።
1 ታና ማራ፤ አቤት ጾሳዉ፥ ታና ማራ፤
ታን ኔኮ ባቃታይ።
ባሻይ አꬋና ጋካናዉ፥
ነ ቀፍያ ግዶን ባቃታደ አታይ።
2 ታን ኡባፐ ꬎቂያ ጾሳዉ፥
ታዉ ኡባባ ኦꬅያ ጾሳዉ ዋሳይ።
3 ጾሳይ ሳሉዋፐ ማዱዋ ኪቲደ፥ ታና አሻና፤
ታና ናቂያዋንታ ካዉሻና፤
ጾሳይ አገና ባረ ሲቁዋነ
ባረ ቱማተꬃ ታዉ ኪታና።
4 ታን ታ ሞርከቱዋ ግዶን፥
አሳ ቦንቂደ ምያ ጋሙዋ ማላቱዋ ግዶን ደአይ።
ኡንቱንቱ አቻይ ቶራነ ዎንዳፍያ ማላ፤
ኡንቱንቱ እንጻርሳይ ኩሳ ማሻ ማላ።
5 አቤት ጾሳዉ፥ ኔን ሳሎቱዋፐ ቦላና ꬎቁ ꬎቁ ጋ፤
ነ ቦንቹ ሳኣ ኡባ ቦላ ደኦ።
6 ኡንቱንቱ ታ ገድያዉ ጲርያ ዎꬄድኖ፤
ታን መቶታደ ሆካድ።
ኡንቱንቱ ታ ኦግያን ኦላ ቦኬድኖ፤
ሽን ሄ ኦላን ባረንቶ ኩንዴድኖ።
7 ታ ዎዛናይ ምኒደ ደኤ፤
አቤት ጾሳዉ፥ ታ ዎዛናይ ምኒደ ደኤ።
ታን ነዉ የጻናነ ኔና ሳባና።
8 ታ ሸምፓቴ፥ ቤጎታ!
ዲꬃዉነ ማስንቆ፥ ቤጎትተ!
ታንካ ዎንታ ጉራና ቤጎታና።
9 አቤት ጾሳዉ፥ ታን ኔና አሳ ግዶን ጋላታና፤
ቃይ ካዉተꬃ ግዶን ኔና ሳባና።
10 አያዉ ጎፐ፥ አገና ነ ሲቁ ዎልቃማ፤
ሳሎቱዋ ጋኬዳ።
ነ ቱማተꬃይካ ቦላ ሻርያዳን ꬎቄ።
11 አቤት ጾሳዉ፥
ሳሎቱዋፐ ቦላና ꬎቁ ꬎቁ ጋ!
ነ ቦንቹ ሳኣ ኡባ ቦላ ግዶ።